TALI ʻO E NGAAHI FEHUʻI FAKATOHITAPÚ
Ko e hā ʻoku fuʻu maʻungataʻa ai ʻa e melinó?
Ko ha founga-pule pē ʻe lava ke ne liliu ʻa e loto ʻo e kakaí te ne ʻomai ʻa e melinó ki he māmaní
ʻOku lave ʻa e Tohi Tapú ki he ʻuhinga tefito ʻe ua. ʻUluakí, neongo kuo lavaʻi ʻe he tangatá ʻa e ngaahi meʻa fakaofo, naʻe ʻikai ke fakatupu kinautolu mo e malava ke fakaʻuli ʻenau ʻalú. Uá, kuo taʻelavameʻa ʻa e ngaahi faʻufaʻu ʻa e tangatá koeʻuhí “ko e māmaní kotoa ʻoku tokoto ia ʻi he mafai ʻo e tokotaha fulikivanú,” ʻa Sētane ko e Tēvoló. Ko ia, ko e ngaahi feinga ʻa e tangatá kuo ʻikai malava ke ne ʻomai ʻa e melinó ki he māmaní.—Lau ʻa e Selemaia 10:23; 1 Sione 5:19.
Ko e siokita mo e sio tuʻunga ʻa e tangatá kuo toe ʻai ai ke maʻungataʻa ʻa e melinó ʻi he māmaní. Ko ha founga-pule pē ʻi he māmaní ʻe lava ke ne akoʻi ʻa e kakaí ke ʻofa ki he meʻa ʻoku totonú pea fetokangaʻakí te ne ʻomai ʻa e melinó ki he māmaní.—Lau ʻa e ʻAisea 32:17; 48:18, 22.
Ko hai te ne fokotuʻu ʻa e melinó ʻi he māmaní?
Kuo talaʻofa ʻe he ʻOtua Māfimafi-Aoniú ke fokotuʻu ha puleʻanga ke ne pule mai ki he kotoa ʻo e faʻahinga ʻo e tangatá. Te ne fetongi ʻa e ngaahi puleʻanga fakaetangatá. (Taniela 2:44) Ko e ʻAlo ʻo e ʻOtuá, ʻa Sīsū, te ne pule ko e ʻEiki ʻo e Melinó. Te ne fakaʻauha ʻa e koví mei he kotoa ʻo e māmaní pea te ne akoʻi ʻa e kakaí ki he founga ʻo e melinó.—Lau ʻa e ʻAisea 9:6, 7 (9:5, 6, PM); 11:4, 9.
ʻI he tataki ʻa Sīsuú, kuo ʻosi ngāueʻaki ai ʻe he laui miliona ʻi māmani lahi ʻa e Folofola ʻa e ʻOtuá, ko e Tohi Tapú, ke akoʻi ʻa e kakaí ki he founga ke nau femelinoʻaki aí. ʻOku vavé ni ke hoko moʻoni ʻa e melino ʻi he māmaní.—Lau ʻa e ʻAisea 2:3, 4; 54:13.