Ko e Tauhi ki he ʻOtuá ʻEne Faitoʻó!
ʻI he taimi naʻe fakaafeʻi ai ha ongo tāimuʻa ki ha fale ʻi Keniā, naʻá na ʻohovale ke sio ki ha kiʻi tangata siʻisiʻi ʻoku tokoto ʻi ha mohenga. Naʻe ʻasi mai pē hono sinó pea nounou mo e ongo nimá. ʻI heʻena vahevahe mo ia ʻa e talaʻofa ʻa e ʻOtuá ʻe “toki hopo ʻa e heke hange ha tia,” naʻá ne malimali fiefia.—ʻAi. 35:6.
Naʻe ʻiloʻi ʻe he ongo tāimuʻá ko e taʻu 30 tupu lahi eni ʻo Onesmus, pea naʻe fanauʻi ia mo e mahaki osteogenesis imperfecta, pe popo vave ʻa e huí. Naʻe fuʻu ngāvaivai ʻaupito hono ngaahi huí—naʻa mo ha kiʻi lave pē ki ai ha meʻa kuo maumau ia. Koeʻuhí ʻoku ʻikai ha faitoʻo lelei ki he mahakí, naʻe ʻamanekina ʻe Onesmus te ne fakamoleki ʻa e toenga ʻene moʻuí ʻi he mamahi pea heka saliote ai pē.
Naʻe tali ʻe Onesmus ha ako Tohi Tapu. Kae kehe, naʻe fakafepakiʻi ʻe heʻene fineʻeikí ʻa e ʻai ke ne maʻu ʻa e ngaahi fakataha faka-Kalisitiané, ʻo fakaʻuhinga ʻe fakatupunga nai ai haʻane lavea mo ha toe langa lahi ange. Ko ia naʻe hiki ʻe he fanga tokouá ʻa e ngaahi fakatahá pea fanongo ki ai ʻa Onesmus ʻi ʻapi. Hili ha ako ʻi he māhina ʻe nima, naʻe fakapapauʻi ʻe Onesmus ʻene loto ke maʻu ʻa e ngaahi fakatahá neongo ʻa e ngaahi faingataʻá.
ʻI heʻene maʻu ʻa e ngaahi fakataha faka-Kalisitiané naʻe toe tānaki atu ʻa e langá kia Onesmus? Ko e olá naʻe fehangahangai. “Naʻe hā ngali naʻe mōlia atu ʻa e langá he lolotonga ʻa e ngaahi fakatahá,” ko e manatu ia ʻa Onesmus. Naʻá ne fakakaukau ko ʻene ʻamanaki foʻoú ko e ʻuhinga ia naʻá ne ongoʻi lelei ange aí. Naʻe sio ʻa e fineʻeiki ʻa Onesmus ki he liliu ʻa e tōʻonga hono fohá pea naʻá ne fiefia ʻaupito ʻo ne loto mo ia ke ako ʻa e Tohi Tapú. “Ko e tauhi ki he ʻOtuá ʻa e faitoʻo ki hoku fohá,” ko ʻene laú ia.
ʻIkai fuoloa, naʻe hoko ʻa Onesmus ko ha tokotaha malanga teʻeki papitaiso. ʻI he faai atu e taimí, naʻá ne papitaiso pea ngāue he taimí ni ko ha sevāniti fakafaifekau. Neongo ʻoku ʻikai malava ke ne ngāueʻaki hono ongo vaʻé mo e taha hono nimá, naʻe maʻu ʻe Onesmus ʻa e holi ke fai ʻa e meʻa kotoa naʻá ne malavá ʻi he ngāue ʻa Sihová. Naʻá ne loto ke tāimuʻa tokoni kae toumoua ke kole. Ko e hā hono ʻuhingá? Koeʻuhí naʻá ne ʻiloʻi ʻe fiemaʻu ke ne fakafalala kakato ki ha tokotaha ke teke ʻene salioté. ʻI he taimi naʻá ne fakahaaʻi ai ʻene hohaʻá ki hono ngaahi kaungā-Kalisitiané, naʻa nau palōmesi te nau poupouʻi ia. Naʻa nau fai eni, ʻo tokoniʻi ʻa Onesmus ke tāimuʻa tokoni.
Naʻe fetaulaki ʻa Onesmus mo e hohaʻa tatau ʻi heʻene loto ke hoko ko ha tāimuʻa tuʻumaʻú. Kae kehe, ʻi he taimi ʻe taha, ko e konga tohi fakaʻahó naʻe ʻoange ai ʻa e fakalototoʻa naʻá ne fiemaʻú. Naʻe toʻo mei he Saame 34:8 (PM): “Mou kamata o vakai oku lelei a Jihova.” Hili ʻa e fakalaulauloto ki he veesi Tohi Tapu ko iá, naʻe fili ʻa Onesmus ke hoko ko ha tāimuʻa tuʻumaʻu. ʻOkú ne malanga he taimí ni ʻi he ʻaho ʻe fā he uike pea maʻu mo ha kau ako Tohi Tapu ʻe niʻihi ʻoku nau fai ha fakalakalaka lelei fakalaumālie. ʻI he 2010, naʻá ne kau ʻi he Ako Ngāue Tāimuʻá. He fiefia lahi ē ko Onesmus he ko ʻene faiakó ʻa e taha ʻi he ongo tokoua naʻá na ʻuluaki ʻaʻahi ange kiate iá!
Kuo mate he taimí ni ʻa e ongo mātuʻa ʻa Onesmus, ka ʻoku tokangaʻi ʻe he fanga tokoua mo e fanga tuofāfine ʻi he fakatahaʻangá ʻene ngaahi fiemaʻu fakaʻahó. ʻOkú ne houngaʻia ʻi he ngaahi tāpuaki kotoa ʻokú ne maʻu he taimi ní, pea ʻokú ne fakatuʻotuʻa atu ki he ʻaho ʻe ʻikai “ha nofo ai te ne pehe, ʻOku ou mahaki.”—ʻAi. 33:24.