Ko e Faʻahinga Kakai Fēfē ʻa e Kau Fakamoʻoni ʻa Sihová?
Ko e kautaha fakavahaʻapuleʻanga kimautolu ʻoku ʻikai haʻamau pīkinga ki he ngaahi kulupu lotu kehé. Neongo ʻoku tuʻu homau ʻuluʻi ʻapitanga ki he māmaní ʻi ʻAmelika, ko e tokolahi taha ʻo e Kau Fakamoʻoni ʻa Sihová ʻoku nau nofo ʻi he ngaahi fonua kehe. Ko hono moʻoní, ko e toko valu miliona nai ʻo kimautolu ʻoku mau ako Tohi Tapu mo e kakai ʻi he fonua ʻe 230 tupu. ʻOku mau fai eni ko ʻemau tali ia ki he lea ʻa Sīsū: “Ko e ongoongo lelei ko ʻeni ʻo e Puleʻangá ʻe malangaʻi ia ʻi he kotoa ʻo e māmani kuo nofoʻí ko ha fakamoʻoni ki he ngaahi puleʻanga kotoa pē.”—Mātiu 24:14.
Tatau ai pē pe ʻoku mau nofo ʻi fē, ʻoku mau talangofua kakato ki he laó. Ka ʻoku mau feinga mālohi ke hanganaki tuʻu-ʻatā mei he meʻa fakapolitikalé. Ko hono ʻuhingá he ʻoku mau talangofua ki he fekau ʻa Sīsū ki he kau Kalisitiané ke “ʻikai ko ha konga . . . ʻo e māmaní.” Ko ia ʻoku ʻikai ke mau kau ʻi he ngaahi meʻa pe ngāue fakapolitikale pe poupouʻi ʻa e taú. (Sione 15:19; 17:16) Ko hono moʻoní, lolotonga ʻa e Tau II ʻa Māmaní, naʻe tuku pilīsone ʻa e Kau Fakamoʻoni ʻa Sihová, fakamamahiʻi pea toe kovi ange ai koeʻuhí ko e ʻikai ke fakangaloku ʻenau tuʻu-ʻataá. Naʻe tohi ʻe ha pīsope mālōlō ʻi Siamane: “ʻOku lava ke nau taukaveʻi moʻoni ko kinautolu pē naʻe ʻikai te nau tali ʻa e ngaahi ngāue fakakautaú ʻi he pule ʻa Hitilaá.”
“[Ko e Kau Fakamoʻoni ʻa Sihová] ko honau ʻulungāngá ʻoku ʻi he tuʻunga māʻolunga. ʻE lava ke tau ngāueʻaki ʻa e kakai taʻesiokita peheé naʻa mo e ngaahi ngāue fakapolitikale māʻolunga tahá—ka heʻikai ʻaupito ke mau maʻu mai kinautolu. . . . ʻOku nau fakaʻapaʻapaʻi ʻa e ngaahi mafai fakapuleʻangá ka ʻoku nau tui ko e Puleʻanga ʻo e ʻOtuá pē ʻe malava ke ne fakaleleiʻi ʻa e ngaahi palopalema kotoa ʻa e tangatá.”—Nusipepa Nová Svoboda, Lepupilika Seki.
Neongo ia, ʻoku ʻikai ke mau fakamavaheʻi kimautolu. Naʻe lotu ʻa Sīsū ki he ʻOtuá ʻo fekauʻaki mo hono kau muimuí: “ʻOku ou kole atu kiate koe, ʻo ʻikai ko e pehē ke toʻo kinautolu mei māmani.” (Sione 17:15) Ko ia ai, ʻe lava ke ke sio mai kiate kimautolu ʻi heʻemau ngāué, falekoloá mo ʻemau ʻalu ki he ʻapiako ʻi he feituʻu fakalotofonuá.