Ko ha Hingoa Fakatohitapu ʻi ha Foʻi Hina Motuʻa

ʻI he 2012, naʻe maʻu ai ʻe he kau keli fakatotoló ha ngaahi kongokonga ʻo e foʻi hina ʻumea naʻe taʻu ʻe 3,000 hono motuʻá. Naʻe fiefia ʻaupito ʻa e kau keli fakatotoló. Ko e hā hono ʻuhingá? Naʻe ʻikai ko e kongokonga hiná ka koeʻuhí ko e meʻa naʻe hiki ʻi aí.

ʻI he taimi naʻe fakatahatahaʻi ai ʻe he kau keli fakatotoló ʻa e kongokongá, naʻe malava ai ke nau lau ʻa e tohi faka-Kēnani ʻi he foʻi hiná. Naʻe pehē ai: “Eshba’al Ben Beda,” ʻa ia ʻoku ʻuhingá ko e “ʻEsipeali, foha ʻo Beda.” Ko e ʻuluaki taimi eni ke maʻu ai ʻe he kau keli fakatotoló ʻa e hingoa ko ení mei ha meʻa naʻe tohi ʻi he kuonga muʻá.

ʻOku lave ʻa e Tohi Tapú ki ha tokotaha ʻe taha naʻe hingoa ko ʻEsipeali. Ko e taha ia ʻo e ngaahi foha ʻo Tuʻi Saulá. (1 Kal. 8:33; 9:39) Ko palōfesa Yosef Garfinkel, ʻa e taha ʻo e faʻahinga naʻa nau maʻu ʻa e foʻi hiná, naʻá ne pehē: “ʻOku mahuʻinga ke fakatokangaʻi ko e hingoa ʻEsipealí ʻoku hā ia ʻi he Tohi Tapú, pea ʻoku toe hā eni ʻi he lēkooti ʻa e kau keli fakatotoló, ʻi he taimi pē naʻe pule ai ʻa Tuʻi Tēvitá.” Ko e fakatātā eni ʻe taha ʻo e anga hono poupouʻi ʻe he ngāue keli fakatotoló ʻa e Tohi Tapú!

ʻI he Tohi Tapú, ko e foha ʻo Saula ko ʻEsipealí ʻoku toe ui ia ko ʻIsipōseti. (2 Sām. 2:10) Ko e hā naʻe fetongi ai ʻa e “pealí” ʻaki ʻa e “pōsetí”? ʻOku fakamatala ʻa e kau fakatotoló ko e tokotaha-tohi ʻo e Ua Sāmiuelá naʻá ne fakaʻehiʻehi nai mei hono ngāueʻaki ʻa e hingoa ʻEsipealí koeʻuhí naʻe fakamanatu ai ki he kau ʻIsilelí ʻa Pēali, ʻa e ʻotua ʻo e afā ʻa ia naʻe lotu ki ai ʻa e kau Kēnaní. Kae kehe, ko e tohi ʻUluaki Kalonikalí ʻi he Tohi Tapú, ʻe lava ke tau kei maʻu ai ʻa e hingoa ʻEsipealí.