ʻE Lava Ke Ke Sio Fakalaka Atu ʻi he Fōtunga Hā Maí?

KO DON, ko e taha ia ʻo e Kau Fakamoʻoni ʻa Sihová ʻi Kānata, ʻokú ne fai ha feinga makehe ke talanoa ki he kakai ʻoku nofo holo ʻi he halá. ʻI he fekauʻaki mo e taha ʻo e faʻahinga ko ení, ʻoku fakamatala ʻa Don: “Ko ha tangata ko Peter ʻa ia ʻoku ʻikai hano ʻapi ko e taha ia ʻo e kau tangata likoliko taha kuo faifai peá u sio ai ʻi he fanga kiʻi hala vahaʻa ʻapí. Naʻá ne palakū fau peá ne pōtoʻi ʻi hono ʻai ke mavahe meiate ia ʻa e kakaí. Naʻá ne toutou talitekeʻi ʻa e ngaahi tokoni ʻofa naʻe fai ange kiate ia ʻe he kakaí.” Neongo ia, naʻe ngāue anga-kātaki ʻa Don ʻo laka hake ʻi he taʻu ʻe 14 ʻi he anga-lelei ki he tangata ko eni naʻe ʻikai hano ʻapí.

ʻI he ʻaho ʻe taha, naʻe ʻeke ange ai ʻe Peter kia Don: “Ko e hā ʻokú ke hohaʻa mai ai kiate aú? ʻOku tukunoaʻi au ʻe he toko taha kotoa pē. Ko e hā ʻokú ke tokanga mai ai koé?” Naʻe ngāueʻaki pōtoʻi ʻe Don ʻa e konga Tohi Tapu ʻe tolu ʻi heʻene feinga ke aʻu ki he loto ʻo Peter. ʻUluakí, naʻá ne ʻeke ange kia Peter pe ʻokú ne ʻiloʻi ʻoku ʻi ai ʻa e huafa fakafoʻituitui ʻo e ʻOtuá pea kole ange ke ne lau hangatonu ia mei he Tohi Tapú ʻi he Saame 83:18. Ko hono hokó, ke fakahaaʻi ange ʻa e ʻuhinga ʻo ʻene tokangá, naʻe ʻai ʻe Don ke lau ʻe Pita ʻa e Loma 10:13, 14, ʻa ia ʻoku fakamatalaʻi ai ko e “tokotaha kotoa pē ʻoku ui ki he huafa ʻo Sihová ʻe fakahaofi.” Fakaʻosí, naʻe lau ʻe Don ʻa e Mātiu 9:36 peá ne kole ange leva kia Peter ke ne toe lau ia. ʻOku pehē ʻi he veesi ko iá: “ʻI he vakai atu ki he fuʻu kakaí, naʻá ne [Sīsū] ongoʻi fakaʻofaʻia ʻiate kinautolu, koeʻuhí ne ngaohikovia kinautolu mo liʻekina ʻo hangē ha fanga sipi taʻeʻiai hanau tauhí.” ʻI he taimi ko iá, naʻe fakatō loʻimata ʻa Peter, peá ne ʻeke ange: “Ko e taha au ʻo e fanga sipi ko ení?”

Naʻe kamata ai ke liliu ʻa Peter. Naʻá ne kaukau, kosikosi fakalelei hono kavá, pea tui ʻa e ngaahi vala lelei naʻe ʻoange ʻe Don kiate iá. Naʻe hokohoko atu hono tauhi ʻe Peter ha fōtunga maʻa.

Naʻe tauhi ʻe Peter haʻane tohi noa. Ko e ngaahi konga ki muʻa ʻi heʻene tohí naʻe ʻikai ha ʻamanaki ai mo ha taumuʻa, ka ko ʻene fakamatala ki muí naʻe kehe. Naʻe pehē ʻi he fakamatala ʻe taha: “Naʻá ku ʻilo he ʻahó ni ʻa e huafa ʻo e ʻOtuá. ʻI heʻeku lotú he taimí ni, ʻoku lava ke u lotu kia Sihova. ʻOku fakaofo ʻa e ʻiloʻi ʻa hono huafá. ʻOku pehē ʻe Don ʻe lava ke hoko ʻa Sihova ko hoku Kaumeʻa fakafoʻituitui, ko e tokotaha ʻoku ʻi ai maʻu pē hono taimi ke fanongo mai kiate au, neongo pe ko e hā ha taimi pe ko ha faʻahinga tuʻunga.”

Ko e fakamatala fakaʻosi ʻa Peter naʻe fai ia ki hono tehiná mo hono tuofefiné. Naʻá ne tohi:

“ʻOku ʻikai te u ongoʻi sai he ʻahó ni. ʻOku ou tui pē kuo haʻu e taʻumotuʻá. Ka neongo kapau ko hoku ʻaho fakaʻosí eni, ʻoku ou ʻiloʻi te u toe sio ki hoku kaumeʻá [ʻa Don] ʻi Palataisi. Kapau te mo lau eni, ʻoku ʻikai te u kei ʻi heni. Ka ʻo kapau te mo sio ʻi hoku putú ki ha tangata ʻoku ʻikai hā ngali ʻoku totonu ke ne ʻi ai, mo talanoa ki ai, peá mo kātaki ʻo lau ʻa e kiʻi tohi lanu pulū ko ení [ʻuhinga ki he tohi tokoni ʻi he ako Tohi Tapú “Ko e Moʻoni ʻa ia ʻoku fakatau ki he Moʻui Taʻengata” ʻa ia naʻá ne maʻu ʻi he ngaahi taʻu ki muʻá].a ʻOku pehē ai te u toe sio ki hoku kaumeʻá ʻi Palataisi. ʻOku ou tui ki he meʻá ni ʻaki ʻa e kotoa ʻo hoku lotó. Ko homo tokoua ʻofeina, Peter.”

ʻI he ʻosi ʻa e putú, naʻe fakamatala ʻa e tuofefine ʻo Peter ko Ummi: “ʻI he taʻu nai ʻe ua kuo maliu atú, naʻe fetuʻutaki mai ai ʻa Peter kiate au. Ko e ʻuluaki taimi ia ʻi he ngaahi taʻu lahi, naʻá ne hā fiefia ai. Naʻe aʻu ʻo ne malimali.” Naʻe tala ange ʻe Ummi kia Don: “Te u lau ʻa e tohí koeʻuhí ko ha meʻa pē naʻe lava ke aʻu ki he loto hoku tuongaʻané ʻoku pau pē ko ha meʻa makehe.” Naʻe toe loto-lelei ʻa Ummi ke talanoa mo e taha ʻo e Kau Fakamoʻoni ʻa Sihová ki he tohi ki muí ni mai Ko e Hā ʻOku Akoʻi Moʻoni ʻe he Tohi Tapú?

Ko kitautolu foki ʻe lava ke tau sio fakalaka atu ʻi he fōtunga hā maí, ʻo fakahāhā ʻa e ʻofa moʻoni, pea anga-kātaki ki he faʻahinga kakai kotoa pē. (1 Tīm. 2:3, 4) ʻI heʻetau fai peheé, te tau malava nai ai ke ueʻi ʻa e kakai, ʻa ia ʻi he hangē ko Peter, ʻoku ʻikai nai te nau matamatalelei ki he vakai ʻa e tangatá ka ʻoku nau maʻu ha loto lelei. ʻOku lava ke tau fakapapauʻi ko e ʻOtuá, ʻa ia ‘ʻoku sio ki he lotó,’ te ne ʻai ke tupu ʻa e moʻoní ʻi he loto ʻo e faʻahinga ʻoku hehema totonú.—1 Sām. 16:7; Sione 6:44.