Takimuʻa ʻa e Kau ʻOvasiá​—Ko e ʻOvasia Tauhí

¹ Ke ngāue ko ha ʻovasia ʻi he fakatahaʻangá ko ha fatongia mamafa ia. (Ng. 20:28; 1 Tim. 3:1) Ko e ʻuluaki ʻeni ʻo ha ngaahi holongā kupu ʻe fakamatalaʻi ai ʻa e ngaahi fatongia kehekehe ʻo e kau mātuʻa Kalisitiané koeʻuhí ke lava ʻe he kotoa ʻo kitautolú ʻo houngaʻia ʻi he ngāue mahuʻinga ʻoku nau fai maʻatautolú.

² ʻOku fakanofo ʻe he Sōsaietí ʻa e ʻovasia tauhí ke ngāue ʻi ha vahaʻa taimi ʻoku ʻikai ke pau hono ngataʻangá. ʻI hono tokangaʻi ʻe he ʻovasia tauhí ʻa e ngaahi meʻá, ʻoku tokoniʻi ai ʻa e kau mātuʻá ke nau fai ha tokanga lelei ki honau ngaahi fatongia kuo vaheʻi angé. (Organized to Accomplish Our Ministry, p. 42) Ko e hā ʻoku iku ki ai ʻení?

³ ʻOku maʻu ʻe he ʻovasia tauhí ʻa e meili ʻa e fakatahaʻangá pea ʻoatu vave ia ki he sekelitalí ke ne tokangaʻi. ʻI hono teuteu ʻa e ngaahi fakataha ʻa e kau mātuʻá, ʻoku maʻu ʻe he ʻovasia tauhí ʻa e ngaahi fokotuʻu mei he kau mātuʻá ʻi ha ngaahi meʻa ʻoku fiemaʻu ke fetalanoaʻaki ki ai pea tānaki ia ʻi he ʻasenitá. ʻOkú ne toe hoko ko ha tokotaha-sea ʻi he ngaahi fakataha ʻa e kau mātuʻá. ʻI hono fai ha ngaahi fili, ʻokú ne vakai ki ai ʻoku fai ha muimui lelei ki ai. ʻOkú ne tokangaʻi ʻa hono teuteu ʻo e Ngaahi Fakataha Ngāué pea mo hono fakataimi-tēpileʻi ʻa e ngaahi malanga maʻá e kakaí. ʻOkú ne tali ʻa e kotoa ʻo e ngaahi fanongonongo ʻoku fai ki he fakatahaʻangá, fakamafaiʻi ʻa hono totongi ʻa e kotoa ʻo e ngaahi fakamole anga-mahení, pea fakapapauʻi ʻoku fai ʻa hono ʻaotitaʻi fakakuata ʻa e fakamatala paʻanga ʻa e fakatahaʻangá.

⁴ ʻI he tuʻunga ko e tokotaha-seá, ʻoku fokotuʻutuʻu ʻe he ʻovasia tauhí ʻa e ngāue ʻa e Kōmiti Ngāue ʻa e Fakatahaʻangá. ʻI he taimi ʻoku kole ai ha tokotaha ako Tohitapu ke hoko ko ha tokotaha malanga teʻeki papitaiso pe ʻi he taimi ʻoku fiemaʻu ai ʻe ha tokotaha malanga teʻeki papitaiso ke hoko ʻo papitaiso, ʻoku fokotuʻutuʻu ʻe he ʻovasia tauhí ha kau mātuʻa ke nau fakataha mo ia. ʻOku toe takimuʻa foki ʻa e ʻovasia tauhí ʻi he teuteu ki he ʻaʻahi ʻa e kau ʻovasia fakafeituʻú koeʻuhi ke lava ʻa e fakatahaʻangá ʻo maʻu ha ʻaonga kakato mei he ngāue ʻo e uike makehé.

⁵ ʻOku lahi pea kehekehe ʻa e ngaahi fatongia ʻo e ʻovasia tauhí. ʻI heʻene tokanga anga-fakatōkilalo ki hono ngaahi fatongiá ʻi he “nima mo e vaʻe,” ko e kotoa ʻo kitautolú ʻe lava ke tau fai ʻetau tafaʻakí ʻaki ʻa e fengāueʻaki fakataha mo e kau mātuʻá. (Loma 12:8) Kapau te tau “tuitala” pea “fakavaivai” ki he faʻahinga ʻoku takimuʻa ʻi hotau lotolotongá, ʻe lava ke nau fakahoko ʻenau ngāué ʻi he fiefia moʻoni lahi ange.​—Hep. 13:17.