Hanganaki Tuli ki he Ngāue Fakateokalatí ʻi he Ngaahi Māhina he ‘Taimi Māfaná’

¹ ʻOku ʻomai ʻi he lelei ange ʻa e ʻeá ha ngaahi faingamālie ke kau ai ʻi ha ngaahi ngāue kehekehe. Ko e tokolahi taha ʻo kitautolú ʻoku tau ngāueleleiʻaki ʻa e taimi māfana ange ʻo e ʻeá ʻaki hono fai ʻa e meʻa ʻoku kehe mo fakafiemālie. Kae kehe, kuo pau ke tau maluʻi kitautolu mei hono fakaʻatā ʻetau founga-tuʻumaʻu fakateokalatí ke hoko ʻo veukí.​—Fili. 3:16.

² Kapau ʻe ala maʻu hao taimi, hangē ko ia ʻi he lolotonga ha tutuku ʻa e akó, kuó ke fakakaukau fekauʻaki mo e kakapa atu ke kau lahi ange ʻi he ngāue fakafaifekaú? Kuo ʻiloʻi ʻe he tokolahi ko ha taimi lelei eni ke hū ai ʻo kau ʻi he tāimuʻa tokoní. ʻOku faʻa fakaʻatā ʻe he meʻá ni ʻa e faingamālie ki he ngaahi monū lahi ange ʻo e ngāué. ʻE lava ke hokosia ʻe he ngaahi fāmilí ʻa e fiefia moʻoni ʻi hono fakamoleki fakataha ʻa e ngaahi ʻaho kakato ʻi he ngāue fakafaifekaú. Ko e hā pē ʻa e tuʻungá, ʻe lava ke ke fakalahi ʻa e taimi kuó ke fakamoleki ʻi he ngāué? ʻI he lelei ange ʻa e ʻeá pea lōloa ange ʻa e ngaahi houa ʻahó, ʻoku totonu ke malava ai ʻa e tokolahi ange ke utu ʻa e ngaahi ʻaonga ʻo e kau ʻi he faifakamoʻoni he efiafí.

³ Fēfē ʻa hono tokoniʻi ha fakatahaʻanga ʻa ia ʻokú ne fiemaʻu ʻa e tokoni ki hono ʻosiki ʻa ʻene feituʻu ngāué? ʻE ʻi ai nai ʻa e niʻihi ʻi hoʻo fakatahaʻangá te nau saiʻia ke kau mo koe ʻi he ngāue ʻi ha uike ʻe taha pe ua ʻi he feituʻu ʻoku lahi ange ai ʻa e fiemaʻú. Kapau ʻoku tokosiʻi hoʻo kulupú, mahalo pē ʻe saiʻia ha kau malanga ʻi ha fakatahaʻanga kaungāʻapi ke ʻalu mo koe. Kapau ʻoku fakangatangata pē ʻa e mamaʻo ʻo hoʻo fonongá, ʻe malava nai ʻa e ʻovasia sēketí ke ne fakahā ki ha fakatahaʻanga ofi mai ʻa ia te nau houngaʻia ʻi hoʻo tokoní.

⁴ ʻOkú ke palani ha mālōlō ʻo mamaʻo mei ʻapi? Kapau ko ia, ʻokú ke fai ha ngaahi palani ke maʻu ʻa e ngaahi fakataha ʻi he feituʻu te ke ʻaʻahi ki aí? Fēfē ʻa e ngāue ʻi he malaʻe ngāué mo e fanga tokoua ʻi aí? Ko hono fakakau eni ʻi hoʻo mālōloó ʻe lava ke hoko ia ʻo mātuʻaki fakafiemālie kiate koe pea ki he niʻihi kehé. (Loma 1:​11, 12) Pehē foki, ʻe lava ke ke faifakamoʻoni ʻikai ʻi he founga anga-mahení ʻi hoʻo folaú? Fakapapauʻi ke ʻave ʻa hoʻo Tohitapú mo ha ʻū tohi. Ngāueʻaki ʻa e niʻihi ʻo ho taimi ʻataá ke tuli ai ki hoʻo lau Tohitapú mo e akó. Manatuʻi neongo ʻoku tau fiemaʻu ʻi ha taimi ha mālōlō mei he ngaahi ngāue fakamāmaní, ʻoku ʻikai ke tau loto ke toʻo ha taimi mei he tauhi kia Sihová.

⁵ ʻOku totonu ke tokanga ʻa e kau mātuʻá ke hanganaki fokotuʻutuʻu lelei ʻa e ngaahi ngāue ʻa e fakatahaʻangá. Kapau ʻe mamaʻo ha niʻihi ʻo e kau mātuʻá pe kau sevāniti fakafaifekaú, ʻoku totonu ke fai ha ngaahi fokotuʻutuʻu ki ha niʻihi kehe ke tokangaʻi honau ngaahi fatongiá. Ko hono fakahā ki muʻa ki he ʻovasia tauhí ʻa e ngaahi ʻaho ʻe mamaʻo ai ʻa e fanga tokoua ko ení ʻe tokoniʻi ai ia ke ne sio ke fai ha ngaahi feʻunuʻaki feʻungamālie.

⁶ ʻIo, ko e ngaahi ʻaho lōloa angé ʻe lava ke hoko ia ko e ngaahi ʻaho femoʻuekina. Ka ʻe lava ke faingofua hono veuki ʻa hoʻo founga-tuʻumaʻu lelei ʻo e ngāue ki he Puleʻangá ʻe he ngaahi fakahohaʻá. Ngāueleleiʻaki ʻa ho ngaahi faingamālié ʻi he lelei ange ʻa e ʻeá. Fakapapauʻi ʻa e ngaahi meʻa muʻomuʻa fakalaumālie leleí, pea pipiki ki ai.​—Fili. 1:10.