Fanongonongo

◼ Tohi ke tuʻuaki ʻi Sanuali: Ko e Moʻungaʻi Tangata Lahi Taha Kuo Moʻui Maí. Fepueli: Ko ha polosiua pē ʻoku feʻungamālie. Maʻasi: ʻIlo ʻA Ia ʻOku Taki Atu ki he Moʻui Taʻengatá. ʻE fai ha feinga makehe ke kamata ha ngaahi ako Tohitapu. ʻEpeleli mo Mē: Ko e ngaahi makasini Taua Leʻo mo e ʻĀ Hake! ʻI he maʻu ha mahuʻingaʻia ʻi he ngaahi toe ʻaʻahí, fakakau ʻa e tokotahá ʻi hoʻo tukuʻanga makasini paú. Tuʻuaki ʻa e tohi Lotu ki he ʻOtua Moʻoni Pē Tahá fakataha mo ha fakakaukau ke kamata ha ngaahi ako Tohitapu.

◼ Kamata ʻi Fepueli, pea ʻikai tōmui ʻi Maʻasi 2, ko e malanga foʻou maʻá e kakaí ki he kau ʻovasia sēketí ko e “Fakatauʻatāinaʻi mei ha Māmani ʻo e Fakapoʻulí.”

◼ ʻOku totonu ke fai ʻe he ngaahi fakatahaʻangá ʻa e ngaahi fokotuʻutuʻu feʻungamālie ke fakamanatu ai ʻa e Fakamanatu ʻi he taʻu ní ʻi he Pulelulu, ʻEpeleli 16, hili e tō ʻa e laʻaá. Neongo ʻe kamata ki muʻa ange ʻa e malangá, ko hono paasi ʻo e maá mo e uainé ʻoku ʻikai totonu ke kamata ia kae ʻoua kuo tō ʻa e laʻaá. Vakaiʻi mei he ngaahi maʻuʻanga fakamatala fakalotofonuá ke fakapapauʻi ʻa e taimi ʻe tō ai ʻa e laʻaá ʻi ho feituʻú. ʻI he feituʻu ʻoku anga-maheniʻaki ai hono ngāueʻaki ʻe he ngaahi fakatahaʻanga lahi ʻa e Fale Fakatahaʻanga tataú, mahalo pē ʻe lava ke maʻu ʻo ngāueʻaki ʻe ha fakatahaʻanga ʻe taha pe lahi ange ha fale kehe ki he efiafi ko iá. ʻO ka malava, ʻoku mau fokotuʻu atu ha miniti ʻe 40 ko e siʻisiʻi tahá ia ʻi he vahaʻa ʻo e ngaahi polokalamá koeʻuhi ke maʻu ʻaonga kakato ʻa e tokotaha kotoa mei he kātoangá. ʻOku totonu ke toe fai ha fakakaukau ki he ngaahi tuʻunga fakameʻalelé mo e tauʻangá, ʻo kau ai hono fakahifo mo hono fakaheka ʻo e kau pāsesé. ʻOku totonu ke fakapapauʻi ʻe he kulupu ʻo e kau mātuʻá ʻa e ngaahi fokotuʻutuʻu ʻe lelei taha fakalotofonuá.

◼ Kamata ʻi he ʻīsiu ko ení, ko e lisi ʻo e ʻū tohi foʻou ʻoku ala maʻú ʻe ʻikai kei hā ia ʻi he ʻEtau Ngāue Fakafaifekau ʻo e Puleʻanga. Ko e “Fanongonongo ki he Ngaahi Fakatahaʻangá Kotoa” mo e fakahinohino ko ení ʻe hokohoko atu hono meiliʻi ki he fakatahaʻanga kotoa ʻi he māhina taki taha. Ko ha fakamanatu, ʻi hono maʻu pē ʻa e “Fanongonongo ki he Ngaahi Fakatahaʻangá Kotoa,” ʻoku totonu leva ke fai ha fanongonongo ʻi he Fakataha Ngāue hono hokó ʻo fekauʻaki mo e ngaahi meʻa ʻe mahuʻinga nai ki hoʻo fakatahaʻangá. Ko e fanongonongó ʻe fokotuʻu nai leva ia ʻi he papa fakahinohinó. Hili iá, ko e sevāniti ʻo e ʻū tohí ʻoku totonu ke ne tauhi ia ʻi heʻene failé.

◼ Ko e kau malanga ʻosi papitaiso kotoa pē ʻoku ʻi he Fakataha Ngāue ʻi he uike ʻo Fepueli 3 ʻe lava ke nau maʻu ʻa e kaati Fakahinohino/Fakaʻatā Fakafaitoʻo Tokamuʻa mo e Kaati Fakaʻilonga ki heʻenau fānaú.