ʻAʻeva ko e Faʻahinga Fakapotopoto
1 ʻI he taimi naʻe kole ange ai ʻe Sīsū ki he kau toutai ʻe toko fā ke nau hoko ko hono kau muimuí, naʻe ʻikai te nau toe tatali ka ‘naʻa nau muimui leva kiate ia.’ (Mt. 4:18-22) ʻI he taimi naʻe liliu ai ʻa Saula ʻo Tāsusí peá ne toki ʻaá, naʻe ʻikai te ne toe tatali ka ne “malangaʻaki ʻa Sisu ʻi he ngaahi falelotu.” (Ng. 9:20) ʻOku tā mo laka ʻa e taimí, ko ʻene ngaʻunú pē, ko ʻene mole ʻaupitó ia. Ko e ʻuhinga ia ʻoku mahuʻinga ai ke tau ‘ʻaʻeva ko e faʻahinga fakapotopoto’ ʻi hono ngāueʻaki hotau taimí.—Ef. 5:15, 16, NW.
2 Meʻa ʻOku Hoko Taʻeʻiloa: Ko e ngaahi faingamālie ʻoku tau maʻu he ʻahó ni ke tauhi ai kia Sihová ʻe mole nai ia ʻapongipongi. (Sem. 4:14) ʻOku ʻikai hao ha taha mei he “meʻa ʻoku hoko taʻeʻiloá.” (Koh. 9:11, NW) Tānaki atu ki ai, ʻoku tau fakaʻaʻau kotoa pē ke motuʻa, pea ko e “ngaahi ʻaho kovi” ʻoku haʻu fakataha mo e taʻumotuʻá ʻa ia ʻoku fakangatangata ai ʻa e meʻa ʻoku malava ke tau fai ʻi he ngāue kia Sihová ʻoku ʻikai ke ala kalofi ʻi he fokotuʻutuʻu ko ʻeni ʻo e ngaahi meʻá. (Koh. 12:2 [12:1, PM]) Ko ia ai, ʻoku fakapotopoto ke ʻoua ʻe tautoloi ʻa hono fai ha fakatapui ki he ʻOtuá pe ko e tali ki ha ngaahi tuʻunga lelei ki muʻa ke fakalahi ʻetau ngāue fakafaifekaú ki he lahi taha ʻe ala lava he lolotonga ní. (Luke 9:59-62) Naʻe maʻu ʻe ʻĒpalahame ʻa e fiemālie mo e nonga ʻi hono ngaahi taʻu motuʻá, ʻo ne mate ai kuó ne “toulekeleka mo aʻuaʻu” koeʻuhí he naʻá ne ngāueʻaki fakapotopoto ʻene moʻuí ʻi he līʻoa kakato kia Sihova.—Sen. 25:8.
3 Kuo Fuonounou ʻa e Kuongá: ʻOku toe fiemaʻu foki ke tau ngāueʻaki fakapotopoto hotau taimí koeʻuhí he “kuo fuonounou ʻa e kuonga.” (1 Kol. 7:29-31) Kuo vavé ni ʻaupito ke ngata ʻa e fokotuʻutuʻu ʻo e ngaahi meʻa motuʻá ni. ʻE ngata mo e ngaahi faingamālie ke kau ai ʻi hono fakatahatahaʻi lahi ʻo e faʻahinga hangē ha sipí lolotonga ʻa e “[utu-taʻu] ʻo mamani.” (Fkh. 14:15) Kuo pau ke tau tokanga ke ʻoua ʻe fakaʻatā ʻa e loto-moʻua ki he moʻuí mo e fakahohaʻá ke ne kaihaʻasia hotau taimi naʻe mei lelei ange ke ngāueʻaki ʻi he ngāue fakafaifekaú. (Luke 21:34, 35) He fakafiemālie ē ko ʻetau sio atu ki he kuohilí ʻo ʻiloʻi naʻa tau kau kakato ʻi he utu-taʻú!
4 Kuo pau ke tau tokanga maʻu pē koeʻuhí ke ʻoua naʻa tau liʻaki hotau monū fakafiefia ʻa ia ko e ngāue kuo tuku maí. Tau fakapapauʻi ke fai ʻa e meʻa kotoa te tau malavá ke tauhi ai kia Sihova “lolotonga ʻo e kei lau atu, Ko e ʻaho ni.” (Hep. 3:13) ʻI he fai peheé, te tau fakahāhā ai ʻoku tau fakapotopoto moʻoni, koeʻuhí “ko ia ʻoku ne fai ʻa e finangalo ʻo e ʻOtua, ʻoku ne nofo maʻu ʻo taʻengata.”—1 Sione 2:17.