Ko ha Tohi mei he Kulupu Pulé
Siʻi Kaungā Fakamoʻoni ʻa Sihova:
Ko e meʻa fakafiefia moʻoni ia ke tohi atu kia kimoutolu siʻi fanga tokoua! ʻOku mau ongoʻi ʻo hangē ko e ʻapositolo ko Sioné, ʻa ia naʻá ne pehē ʻokú ne “ofa mooni” ʻi hono kaungātuí pea fiefia ʻi heʻenau “aeva i he mooni.” (2 Sione 1, 4, PM) ʻOi, he toki tāpuaki ē ko e moʻoní kia kitautolu hono kotoa! Kuo fakatauʻatāinaʻi kitautolu ʻe he moʻoní mei Pāpilone ko e Lahi mo ʻene ngaahi tokāteline mo e talatukufakaholo ʻoku taʻefakalāngilangiʻi ai ʻa e ʻOtuá. Ko e talangofua ki he moʻoní kuó ne tokoniʻi kitautolu ke tau hoko ai ko e kakai ʻofa, anga-lelei mo faimeesi. Pea kuo fakaava ʻe he moʻoní ʻa e hala ke tau maʻu ai ha tuʻunga maʻa ʻi he ʻao ʻo e ʻOtuá pea pehē ki he ʻamanaki ki he moʻui taʻengata.
He houngaʻia moʻoni foki ko kitautolu, ʻi he laumālie ʻo Sihová, ʻa ia ʻokú ne tataki mo fakaivimālohiʻi fakaʻaho kitautolu! ʻOku mau falala pau naʻa mou fiefia ʻi hono sivisiviʻi ʻa e ngaahi tafaʻaki kehekehe ʻo e tokonaki ʻofa ko eni meia Sihová ʻi he ngaahi Fakataha-Lahi Fakavahe ki muí ni ko e “Tataki ʻe he Laumālie ʻo e ʻOtuá.” ʻI he fakaʻau ke toe kovi ange ʻa e ngaahi tuʻunga ʻo e māmaní, ʻoku mātuʻaki fiemaʻu ke tau falala ki he laumālie mālohi ʻo Sihová ke ne tataki kitautolu ʻi he ngaahi ʻaho faingataʻa ʻoku hanga mai mei muʻá.
ʻOku mau ongoʻi papau ne maongo ki homou lotó ʻa hono lau ʻa e ngaahi fakamatala fakafiefia ʻi he Yearbook ki hotau fanga tokoua kuo nau kātekina ʻa e faingataʻa lahi koeʻuhi ko ʻenau tuí. Pea ʻoku fakaofo ʻa e fakakaukau atu ko e tokolahi ʻo e faʻahinga faitōnunga ko ení naʻa nau papitaiso ʻi ha taimi nounou pē pe naʻe teʻeki ai te nau papitaiso ʻi he taimi naʻe malanga hake ai ʻa e ngaahi faingataʻá. He ʻofa moʻoni ko kitautolu ʻia kinautolu ʻi heʻenau mateaki mo ʻenau tuʻu maʻá e māʻoniʻoní. Ko e moʻoni, ko ʻenau faʻifaʻitakiʻanga leleí ʻoku ʻai ai ke mālohi ʻetau fakapapau ke hokohoko atu ʻa e mateaki ki he Puleʻangá ʻo tatau ai pē pe ko e hā ʻa e fakafili ʻe hoko mai nai kia kitautolú.—1 Tes. 1:6-8.
ʻOku mau ʻiloʻi, siʻi fanga tokoua mo e fanga tuofāfine, ʻoku lahi e ngaahi palopalema fakaʻekonōmika pea mo e ngaahi tafaʻaki kehe ʻo e moʻuí kuo pau ke mou fekuki mo ia ke haʻi fakataha homou fāmilí ʻi he ʻofa. Ki he niʻihi ʻo kimoutolu, ko ha pole ia ke poupouʻi maʻu pē mo mateaki ki he ngāue malangaʻi ʻo e Puleʻangá mo e ngaahi ngāue kehe ʻa e fakatahaʻangá ʻa ia ʻoku fiemaʻú. Ko e ʻuhinga ia ʻi he hili ʻa e lāulea lahi mo e lotu, kuo mau fai ʻa e ngaahi feʻunuʻaki ʻi he ngaahi fakataha ʻa e fakatahaʻangá ʻo kamata ʻi Sanuali 1, 2009. ʻOku mau falala atu te mou ngāueʻaongaʻaki ʻa e ngaahi fokotuʻutuʻu ko ení koeʻuhi ke ngāueʻaki ai ʻa e taimi lahi ange ki hoʻomou ako fakafoʻituituí mo fakafāmilí.
ʻI he ngaahi ʻasemipilī mo e fakataha-lahi kehekehe ʻi he taʻu ní, ko e meʻa fakafiefia moʻoni ia ke sio ki he fuʻu tokolahi kuo nau taau ki he papitaisó. ʻOku kau ai ʻa e faʻahinga ʻoku nau kei taʻu siʻi ʻaupito. ʻOku fiemaʻu ke fakaongoongoleleiʻi kimoutolu ngaahi mātuʻá ʻi hono tauhi hake hoʻomou fānaú ke nau houngaʻia ki he moʻoní pea ʻi hono fakalototoʻaʻi kinautolu ke nau fai ha fakatapui ke tauhi kia Sihova ʻi he kei siʻí. Ko e fehangahangai ʻa e siʻi fānau ko iá mo e ngaahi pole lahi ʻi he ʻapiakó pea neongo ia naʻa nau taau ki he papitaisó ʻoku mahino ai kuo nau maʻu ha ako lelei ʻi ʻapi.—Sāme 128:1-6.
ʻOku ʻikai ngalo ʻia kimautolu ʻa e tupu ʻoku taau ke fakaongoongoleleiʻi ʻi he ngāue ako Tohi Tapú—pea ko ʻetau kau misinale ngāue mālohí mo e kau tāimuʻa makehé kuo nau kau lahi ʻi he ngāué ni. Ko kimautolu kotoa ʻi he Kulupu Pulé ʻoku mau fakamahuʻingaʻi lahi ʻa e konga mahuʻinga ʻoku fakahoko ʻe hotau fanga tokoua mo e fanga tuofāfine ʻi māmani lahí ʻi he lea “Haʻu” ki he faʻahinga loto-totonú, ʻo fakaafeʻi ʻa e faʻahinga kotoa ʻoku nau fieinuá ke nau ‘too taetotogi ae vai oe mouí.’ (Fkh. 22:17, PM) ʻOku mau talitali lelei loto-māfana ki heʻetau fetokouaʻaki ʻi māmani lahí ʻa e toko 289,678 naʻa nau fakahāhā ʻenau fakatapuí ʻaki ʻenau papitaiso ʻi he taʻu ko eni kuohilí!
ʻOku lelei foki ʻemau toutou fakamanatu ʻa e ngaahi lea ʻa e ʻapositolo ko Sioné, ʻa ia naʻá ne tohi: “ʻOku fakaʻaʻau ke mole ʻa mamani mo ʻene holi aʻana: ka ko ia ʻoku ne fai ʻa e finangalo ʻo e ʻOtua, ʻoku ne nofo maʻu ʻo taʻengata.” (1 Sione 2:17) Pea fakakaukau atu foki ʻoku tau moʻui ʻo mātuʻaki ofi ʻaupito ki he taimi ʻa ia ʻe “fakaʻaʻau ke mole” atu ai ʻa e māmani ko ení! He fakapotopoto moʻoni ia ke fakatefito ʻetau moʻuí ʻi hono fai ʻo e finangalo ʻo e ʻOtuá pea hanganaki “leʻo.” (Mt. 24:42) Heʻikai ʻaupito toe ʻi ai haʻatau fakaʻiseʻisa kapau te tau fai pehē, pea te tau utu ʻa e ngaahi ʻaonga ʻo e ʻaloʻofa ʻa Sihová.—Ai. 63:7.
ʻOku mau ʻamanaki pē ko e fakamatala fakaueʻiloto mei he ngaahi fonua lahi naʻe ʻi he Yearbook ko ení ʻe hoko ia ko ha fakalototoʻa kia kimoutolu kotoa ke fakamuʻomuʻa ʻa e ngaahi meʻa ʻo e Puleʻangá ʻi hoʻomou moʻuí. ʻOku mau loto ke fakapapauʻi atu ʻoku mou ʻi heʻemau fakakaukaú mo e lotú maʻu pē pea ʻoku mau ʻofa lahi atu. ʻOfa ke huaʻi atu ʻe Sihova ʻa e ngaahi tāpuaki lahi kia kimoutolu.
Ko homou fanga tokoua,
Kulupu Pule ʻa e Kau Fakamoʻoni ʻa Sihová