‘Koe Ogoogolelei Ni E Malaga Aki’!
1. ʻOku anga-fēfē ʻetau ʻiloʻi heʻikai ke ʻi ai ha meʻa te ne lava ʻo taʻofi ʻa e ngāue fakamalangá?
1 ʻOku halaʻatā ha meʻa ʻe lava ke ne taʻofi ʻa Sihova mei heʻene fakahoko ʻa hono finangaló. (Ai. 14:24) Neongo naʻe hā ngali taʻemalava ke ikunaʻi ʻe Fakamaau Kitione mo ʻene kau tangata ʻe toko 300 ha kau tau ʻe toko 135,000 ʻo e kau Mitianí, naʻe folofola ange ʻa Sihova kiate ia: “Te ke fakamoui ekoe a Isileli mei he nima oe kakai Mitiane: ikai kuou fekauʻi koe?” (Fkm. 6:14, PM) Ko e hā ʻa e ngāue ʻoku poupouʻi ʻe Sihova ʻi he ʻaho ní? Naʻe pehē ʻe Sīsū: “Koe ogoogolelei ni oe buleaga e malaga aki i mamani kotoabe.” (Mt. 24:14, PM) ʻOku ʻikai ha taha te ne malava ke taʻofi ʻa e ngāué ni mei hono fakahokó!
2. Ko e hā ʻoku lava ai ke tau ʻamanekina ʻe tokoniʻi tāutaha kitautolu ʻe Sihova ʻi he ngāue fakafaifekaú?
2 Tokoniʻi Tāutaha Kitautolu ʻe Sihova: Lolotonga ʻoku lava ke tau falala pau ʻe ʻai ʻe Sihova ke lavameʻa ʻene Kau Fakamoʻoní ʻi he tuʻunga ko ha kulupú, ʻe lava ke tau ʻamanekina ʻe tokoniʻi tāutaha kitautolu ʻe Sihova? Lolotonga ha taimi ʻo e faingataʻá, naʻe ongoʻi ai ʻe he ʻapositolo ko Paulá ʻa e poupou tonu ʻa Sihova fakafou ʻi hono ʻAló, ʻa Sīsū. (2 Tim. 4:17) ʻOku lava ke tau falala pau ʻe tāpuakiʻi tatau ʻe Sihova ʻa ʻetau feinga tāutaha ke fakahoko ʻa hono finangaló.—1 Sione 5:14.
3. Ko e hā ʻa e ngaahi tuʻunga ʻoku tokoniʻi ai kitautolu ʻe Sihová?
3 ʻOku hanga ʻe he loto-moʻua fakaʻaho ki he moʻuí ʻo ʻai ke siʻi ho ivi ki he ngāue fakafaifekaú? “Oku ne foaki ae malohi ki he vaivai.” (Ai. 40:29-31, PM) ʻOkú ke fehangahangai mo ha fakatanga pe fakafepaki? “Li hoʻo kavenga kia Sihova, he te ne poupou koe ʻe ia.” (Sāme 55:22) ʻOku ʻi ai nai ha taimi ʻoku ʻikai ai te ke falala pau? “Ke ke ʻalu pe, pea te u ʻi ho ngutu ʻe au.” (Eki. 4:11, 12) ʻOkú ke mahamahaki ʻo fakangatangata ai ʻa hoʻo kau ki he ngāue fakafaifekaú? ʻOku fakamahuʻingaʻi ʻe Sihova pea ʻoku lava ke ne ngāueʻaki ʻa hoʻo ngaahi feinga ʻaufuatoó, ʻo tatau ai pē pe ʻoku siʻi fēfē.—1 Kol. 3:6, 9.
4. ʻE ueʻi fēfē kitautolu ʻi he falala pau kia Sihová?
4 Ko e toʻukupu ʻo Sihová “kuo mafao, pea fakafoki ʻe hai?” (Ai. 14:27) ʻI he falala pau ki hono tāpuakiʻi ʻe Sihova ʻa ʻetau ngāue fakafaifekaú, ʻofa ke tau hokohoko atu ʻo ʻikai foʻi ʻi he malanga ‘mālohi [pe loto-toʻa] ko ʻetau falala ki he ʻEikí.’—Ng. 14:3.