ʻOkú Ke Tokoni ki ha Līpooti Tonu Matematē?
1 ʻOku lahi ʻa e ngaahi fakamatala Fakatohitapu ʻoku kau ai ha ngaahi fika pau, ʻoku tokoni ia ke fakahaaʻi ha fakatātā maeʻeeʻa ʻo e meʻa naʻe hoko. Ko e fakatātaá, naʻe ikunaʻi ʻe Kitione ʻa e ʻapitanga ʻo e kau Mitianí ʻaki ʻa e kau tangata pē ʻe toko 300. (Fkm. 7:7) ʻI he Penitekosi 33 T.S., ko e toko 3,000 nai naʻe papitaisó, pea hili siʻi pē iá ko e fika ʻo e kau tuí naʻe tupu ia ki he toko 5,000 nai. (Ng. 2:41; 4:4) ʻOku hā mahino mei he ngaahi fakamatala ko ení ko e kau sevāniti ʻa e ʻOtuá ʻi he kuonga muʻá naʻa nau fai ʻa e feinga lahi ke fakatahatahaʻi ha lēkooti ʻoku kakato mo tonu.
2 Ko e kautaha ʻa Sihova he ʻaho ní ʻokú ne fakahinohinoʻi kitautolu ke līpooti ʻetau ngāue ʻi he malaʻe malangá ʻi he māhina taki taha. Ko ʻetau fāitaha faitōnunga mo e fokotuʻutuʻu ko ení ʻoku tokoni ia ki hono tokangaʻi ola lelei ʻa e ngāue fakamalangá. ʻE fakaeʻa nai ʻe he ngaahi līpōtí ha tafaʻaki ʻo e ngāue fakafaifekaú ʻoku fiemaʻu ki ai ha tokanga pe ʻoku fiemaʻu ha kau ngāue tokolahi ange ʻi ha tafaʻaki pau ʻo e malaʻe ngāué. ʻI he fakatahaʻangá, ko e ngaahi līpooti malaʻe ngāué ʻoku tokoni ia ki he kau mātuʻá ke ʻiloʻi ʻa e faʻahinga ʻoku nau maʻu ʻa e malava ke fakalahi ʻenau ngāue fakafaifekaú pea pehē ki he faʻahinga te nau fiemaʻu nai ha tokoni. Pea ko e ngaahi līpooti fekauʻaki pea mo e fakalakalaka ʻo e ngāue malangaʻi ʻo e Puleʻangá ʻoku tokonaki ai ʻa e fakalototoʻa maʻá e fetokouaʻaki faka-Kalisitiané kotoa. ʻOkú ke fai hoʻo tafaʻakí ke tokoni ki ha līpooti ʻoku tonu?
3 Ko Ho Fatongia Fakafoʻituitui: Ko e hā ʻoku ʻikai lēkooti ai hoʻo ngāue ʻi he taimi taki taha ʻokú ke kau ai ʻi he malaʻe ngāué? ʻOku ngāueʻaki ʻe he niʻihi ha tohi māhina pe ko ha tohinoa. ʻOku toʻo holo ʻe he niʻihi ha lauʻipepa līpooti malaʻe ngāue ʻoku ʻikai tohiʻi ai ha meʻa. ʻI he fakaʻosinga ʻo e māhiná, fakavavevave ʻo ʻave hoʻo līpōtí ki hoʻo ʻovasia kulupú. Pe, kapau te ke fili, ke ke tuku hoʻo līpōtí ʻi he puha līpooti ʻi he Fale Fakatahaʻangá. Ko hono līpooti fakamātoato hoʻo ngāué ʻoku fakahaaʻi ai ʻa e ʻapasia ki he fokotuʻutuʻu ʻa Sihová pea mo e fakaʻatuʻi anga-ʻofa ʻa e fanga tokoua kuo vaheʻi ke nau tānaki mo hiki ʻa e ngaahi līpōtí.—Luke 16:10.
4 Ngafa ʻo e ʻOvasia Kulupú: ʻI he tuʻunga ko ha tauhi ʻāʻā mo tokangá, ko e ʻovasia kulupú ʻokú ne mahuʻingaʻia ʻi he ngāue ʻa e kulupú ʻi he kotoa ʻo e māhiná. (Pal. 27:23) ʻOkú ne ʻiloʻi pe ko e tokotaha malanga taki taha ʻokú ne kau tuʻumaʻu, mohu ʻuhinga, mo fiefia pea ʻokú ne vave ke fai ha tokoni kapau kuo teʻeki ke kau ha taha ʻi ha māhina kakato. Ko ha lea ʻo e fakalototoʻá, ko ha fokotuʻu ʻaonga, pe ko ha fakaafe ke ʻalu fakataha mo ia ʻi he malaʻe ngāué ʻoku faʻa hoko ko e meʻa pē ia ʻoku fiemaʻú.
5 ʻI he ngataʻanga ʻo e māhiná, ʻoku fakapapauʻi ʻe he ʻovasia kulupú ko e tokotaha kotoa ʻi he kulupú ʻoku nau fakahoko honau fatongia ke līpooti ʻenau ngāué koeʻuhi ke lava ʻa e sekelitalí ʻo ʻoatu ha līpooti fakaefakatahaʻanga tonu matematē ki he ʻōfisi vaʻá. Ko hono ʻoatu fakavavevave ʻetau ngaahi līpooti malaʻe ngāué ʻoku tokoni ia ki ha līpooti ʻoku tapua tonu matematē mei ai ʻa e meʻa naʻe fakahoko ʻi he malaʻe ngāué. Te ke fai ʻa hoʻo tafaʻakí ʻaki hono līpooti fakavavevave ʻa hoʻo ngāué ʻi he māhina taki taha?
[Fehuʻi ki he Ako]
1. Ko e hā ʻa e ngaahi fakatātā ʻoku fakahaaʻi ai ʻa e ʻaonga ʻo hono fai ʻo e līpōtí?
2. ʻOku ʻi ai ha ngaahi ʻaonga ki he kautahá hono fai ha līpooti tonu matematē?
3. ʻE lava fēfē ke ke tali ho fatongia fakafoʻituituí?
4, 5. Ko e hā ʻa e ngafa ʻoku fakahoko ʻe he ʻovasia kulupú?