Ko e ʻUlungaanga Mahuʻinga Taha ʻo ha Faiako Lelei

1. Ko e hā ʻa e ʻulungaanga mahuʻinga taha ʻo ha faiako lelei?

¹ Ko e hā ʻokú ne fakamafeia ha taha ke hoko ko ha faiako Tohi Tapu lelei? Ko e ako fakamāmaní? Taukeí? Pōtoʻi fakanatulá? Ko hono moʻoní, ko e ʻulungaanga tatau ia ʻokú ne fālute ʻa e Laó, ʻa ia ʻoku fakaʻilongaʻi ai e kau ākonga ʻa Sīsuú, pea ko e ʻulungaanga tefito mo fakamānako taha ia ʻo Sihová. (Sione 13:35; Kal. 5:14; 1 Sio. 4:8) Ko e ʻofá. Ko e kau faiako leleí ʻoku nau fakahāhā ʻa e ʻofá.

2. Ko e hā ʻoku mātuʻaki mahuʻinga ai kia kitautolu ke maʻu ha ʻofa ki he kakaí?

² ʻOfa ki he Kakaí: Ko e Faiako Lahí, ʻa Sīsū, naʻá ne fakahāhā ʻa e ʻofa ki he kakaí, pea naʻe ueʻi ʻe he meʻá ni kinautolu ke fanongo kiate ia. (Luke 5:12, 13; Sione 13:1; 15:13) Kapau ʻoku tau tokanga ki he kakaí, te tau faifakamoʻoni he faingamālie kotoa pē. Ko e ngaahi fakafaingataʻaʻiaʻanga hangē ko e fakatangá mo e taʻemahuʻingaʻiá ʻe ʻikai taʻofi ai kitautolu. Te tau fakahāhā e mahuʻingaʻia fakafoʻituitui loto-moʻoni ʻi he faʻahinga ʻoku tau malanga ki aí, pea te tau feʻunuʻaki ʻetau fakaleá ke feʻunga mo e ngaahi meʻa ʻoku nau hohaʻa ki aí. Te tau loto-lelei ke vaheʻi ha taimi ʻo ʻikai ngata pē heʻetau feohi mo e tokotaha ako Tohi Tapu taki taha kae toe pehē foki he taimi ʻoku tau teuteu ai ki muʻa ki he ako taki taha.

3. ʻE anga-fēfē hono tokoniʻi kitautolu ʻe he ʻofa ki he ngaahi moʻoni Fakatohitapú ʻi he ngāue fakafaifekaú?

³ ʻOfa ki he Moʻoni Fakatohitapú: Naʻe toe ʻofa ʻa Sīsū ki he ngaahi moʻoni Fakatohitapú pea vakai ki ai ko ha koloa mahuʻinga. (Māt. 13:52) Kapau ʻoku tau ʻofa ki he moʻoní, te tau lea ʻi he loto-māfana, pea ʻe lava ke langaʻi heni ha fiefia ʻi heʻetau kau fanongó. Ko e ʻofa peheé ʻe tokoniʻi ai kitautolu ke tokangataha ki he fakamatala mahuʻinga ʻoku tau ʻoatú kae ʻikai ki heʻetau ngaahi fakangatangata fakafoʻituituí, pea ʻe siʻi leva nai ai ʻetau manavasiʻi he ngāue fakafaifekaú.

4. ʻE lava fēfē ke tau fakatupulekina ʻa e ʻofá?

⁴ Fakatupulekina ʻa e ʻOfá: ʻE lava fēfē ke tau fakatupulekina ʻa e ʻofa ki he kakaí? ʻAki e fakakaukauloto ki he ʻofa kuo fakahāhā ʻe Sihova mo hono ʻAló mo e tuʻunga fakaʻofa fakalaumālie ʻo e kakai ʻi hotau feituʻu ngāué. (Mk. 6:34; 1 Sio. 4:10, 11) Ko ʻetau ʻofa ki he ngaahi moʻoni Fakatohitapú ʻe fakalolotoʻi ia fakafou he ako fakafoʻituitui mo e fakalaulauloto tuʻumaʻu. Ko e ʻofá ko ha konga ia ʻo e fua ʻo e laumālié. (Kal. 5:22) Ko ia ʻe lava ke tau kōlenga kia Sihova ʻa hono laumālie māʻoniʻoní pea kole kiate ia ke ne tokoniʻi kitautolu ke tupulekina ʻi he ʻofá. (Luke 11:13; 1 Sio. 5:14) Tatau ai pē pe ko e hā hotau tuʻunga fakaako fakamāmaní, taukei ʻi he moʻoní, pe ko e ngaahi pōtoʻi fakanatulá, ʻe lava ke tau hoko ko ha faiako Tohi Tapu ola lelei ʻaki hono fakahāhā ʻa e ʻofá.