The Wonders of Creation Reveal God’s Glory
ʻOku fiefia ʻa e tokolahi ʻi he mamata ki he fakatupú. Ka ko e tokosiʻi pē ʻoku nau fakatokangaʻi ko ʻenau fai peheé, ʻoku nau maʻu ai ha kiʻi maʻalifekina ʻo e ʻatamai mo e loto ʻo hotau Tokotaha-Fakatupu Maʻongoʻongá. (Loma 1:20) ʻI he kuohilí, naʻe ako ʻa Tēvita fekauʻaki mo Sihova fakafou ʻi Heʻene Folofola fakamānavaʻí. Ka naʻá ne toe “mamata” foki mo ʻunu ofi kiate Ia fakafou he fakatupú. (Saame 8:3, 4) Ko e foʻi vītiō ʻoku fakakaveinga ko e The Wonders of Creation Reveal God’s Glory ʻokú ne tokoniʻi kitautolu, ko ʻetau fānaú, mo ʻetau kau ako Tohi Tapú ke fai ha vakai ofi ki he niʻihi ʻo e fakatupu ʻa Sihová, sio ki he ngaahi ʻulungaanga mo e anga ʻo hotau Tokotaha-Fakatupu Maʻongoʻongá, pea ko hono olá ʻoku tau ʻunuʻunu ofi ange ai kiate ia. Hili ʻa e mamata ʻi he foʻi vitioó, sio pe ʻe lava ke ke tali ʻa e ngaahi fehuʻi ko ení.
(1) ʻOku anga-fēfē hanga ʻe he lahi mo e maau ʻo e ʻuniveesi fakamatelié ʻo ʻai ke loloto hoʻo houngaʻia kia Sihová? (ʻAi. 40:26) (2) ʻI heʻetau vakai ofi ange ki he vaí, ko e hā ʻe lava ke tau ako fekauʻaki mo e Tokotaha naʻá ne tisaini iá? (Fkh. 14:7) (3) ʻOku anga-fēfē fakahāhā ʻe he lahi mo e ofi ʻa e māmaní ki he laʻaá ʻa e poto ʻo Sihová? (4) Ko e hā ʻa e taumuʻa ʻoku fakahoko ʻe he māhiná? (Saame 89:37) (5) Kuo anga-fēfē fakataumuʻa ʻe Sihova ʻa e tangatá ke fiefia ʻi he moʻuí? (6) Ko e hā ʻa e DNA? (Saame 139:16) (7) ʻI he kotoa ʻo e ngaahi fakatupu fakaemāmani ʻa Sihová, ʻoku fēfē kehe ʻa e tangatá ia? (Sēn. 1:26) (8) Ko e hā ʻokú ke fakatuʻotuʻa atu ki ai ʻi he māmani foʻoú?
Ngaahi Tafaʻaki Kehe: (9) Ko e haʻu ʻa e ngaahi lanú mei fē? (10) ʻOku anga-fēfē ikuʻi ʻe he vaí ʻa e kalāvité ke aʻu ai ki he tumutumu ʻo e ʻulu ʻakaú? (11) Ko e hā ʻa e ngafa ʻoku fakahoko ʻe he vaí ʻi loto ʻi hotau sinó? (12) ʻOmi ha ngaahi fakatātā ʻo e feongoongoi ʻoku ʻi he vā ʻo e ngaahi meʻamoʻuí. (13) ʻOku anga-fēfē ʻilo ʻe he ngaahi meʻamoʻuí ʻa e hoangāue mo e niʻihi kehé? (14) Ko e hā ʻa e “ʻengikale koula,” pea ʻoku anga-fēfē hono fakahāhā ia ʻi he fakatupú?
“Siofi Fakalelei” ʻa e Nima-Meaʻa ʻa Sihová: Naʻe fakalototoʻaʻi kitautolu ʻe Sīsū ke “siofi fakalelei ʻa e fanga manupuna ʻo e langí” pea “ako mei he ngaahi lile ʻo e vaó.” (Māt. 6:26, 28) ʻI he fai peheé ʻe lava ke fakaloloto ai ʻetau tuí, fokotuʻu maʻu ʻa e falala pau ki he Tokotaha-Fakatupú, pea langa hake ʻa e houngaʻia ki he poto, mālohi fakaefakahaofi, mo e ʻofa ʻa Sihová. ʻI he ʻikai fakahohaʻasi tōtuʻa ʻe he māmani ko ení, tuku ha taimi mo ha feinga ke siofi ʻa e ngaahi fakaofo ʻo e fakatupu ʻa Sihová, pea fakakaukau ki he meʻa ʻokú ne tala mai kia kitautolu fekauʻaki mo hotau ʻOtuá.—Saame 19:1.