Ongo Foʻi Koini ʻOku Siʻi Hona Mahuʻingá

Ko e founga mahuʻinga ʻe taha ke tau poupou ai ki he ngaahi meʻa ʻo e Puleʻangá ko hono fai ha tokoni fakapaʻanga ki he ngāue fakamalanga ʻi māmani lahí. Kae fēfē kapau ʻoku ʻikai ke fuʻu lahi ʻetau paʻangá?

ʻI he taimi ʻe taha naʻe sio ai ʻa Sīsū ki ha uitou masiva ʻokú ne tokoni ki he puha paʻanga ʻi he temipalé ʻaki ha ongo foʻi koini ʻoku siʻi hona mahuʻingá. Ko e ʻofa kia Sihová naʻá ne ueʻi ia ke ʻoatu “mei heʻene fusimoʻomó, . . . ʻa e meʻa naʻá ne maʻú, ʻa ʻene moʻuí kotoa.” (Mk. 12:41-44) Naʻe fakatokangaʻi ia ʻe Sīsū, ʻo fakahaaʻi ai ko ʻene tokoní naʻe mahuʻinga lahi ʻi he vakai mai ʻa e ʻOtuá. ʻI he tuʻunga meimei tatau, ko e kau Kalisitiane ʻi he ʻuluaki senitulí naʻe ʻikai ke nau vakai ki he fatongia ʻo hono fai ha poupou fakaepaʻanga ki he ngāue fakafaifekaú ko ha monū pē ia ʻo e kau Kalisitiane tuʻumālié. Naʻe lave ʻa e ʻapositolo ko Paulá ki he faʻifaʻitakiʻanga ʻa e kau Masitōniá ʻa ia, neongo “ʻenau masiva ʻangoʻangó . . . ʻenau hanganaki kole . . . ʻiate kinautolu pē ke nau maʻu ʻa e monū ʻo hono fai ha foaki ʻofa.”—2 Kol. 8:1-4.

Ko ia ai, kapau ʻe lava ke tau tokoni ʻaki pē ʻa e ‘ongo foʻi koini ʻoku siʻi hona mahuʻingá,’ ʻoku totonu ke tau manatuʻi ko e ngaahi tokoni siʻisiʻi lōlahí ʻe lava ke tātānaki ia ʻo maʻu ai ha paʻanga lahi. Ko ʻetau foaki mei he lotó ʻe hōifua ai ʻa ʻetau Tamai fakahēvani nima-homó, he “ʻoku ʻofa ʻa e ʻOtuá ʻi ha tokotaha foaki fiefia.”—2 Kol. 9:7.