Toetuʻú—Malava Ia ʻi he Huhuʻí

Ko e Fakamanatú ʻoku ʻomai ai kia kitautolu ha faingamālie lelei ke tapua atu ai ʻa e ngaahi tāpuaki ʻi he kahaʻú ʻoku malava ia ʻi he huhuʻí, hangē ko e toetuʻú. Naʻe ʻikai ʻaupito fakataumuʻa ʻa Sihova ke mate ʻa e faʻahinga ʻo e tangatá. Ko e ʻuhinga ia ko e taha ʻo e ngaahi ongoʻi mamahi taha ʻoku tau hokosiá ko e mate ha taha ʻoku tau ʻofa ai. (1 Kol. 15:26) Naʻe mamahi ʻa Sīsū ʻi heʻene sio ki heʻene kau ākongá ʻoku nau tangi ʻi he mate ʻa Lāsalosí. (Sione 11:33-35) ʻI he hoko ʻa Sīsū ko ha tokotaha ʻokú ne tapua haohaoa atu ʻene Tamaí, ʻoku tau fakapapauʻi ai ʻoku mamahi foki mo Sihova ʻi heʻene vakai mai ʻoku tau mamahi ʻi he mole atu ʻa e faʻahinga ʻoku tau ʻofa aí. (Sione 14:7) ʻOku fakatuʻotuʻa loto-vēkeveke ʻa Sihova ki he taimi te ne fakafoki mai ai ʻene kau sevānití mei he maté pea ʻoku totonu ke pehē pē mo kitautolu.—Siope 14:14, 15.

Koeʻuhi ko Sihová ko e ʻOtua ʻo e fokotuʻutuʻu maau, ʻoku ʻuhinga lelei ai ke tui ko e toetuʻú ʻe fakahoko ia ʻi ha founga maau. (1 Kol. 14:33, 40) ʻI he ʻikai ke fakahoko ha putu, ko ha taimi ia ʻo e talitali lelei ʻa e faʻahinga te nau toetuʻu maí. ʻOkú ke fakalaulauloto ki he toetuʻú, tautefito ki he ngaahi taimi ʻo e mamahí? (2 Kol. 4:17, 18) ʻOkú ke fakamālō kia Sihova ʻi hono tokonaki mai ʻa e huhuʻí mo hono fakaeʻa mai ʻi he Tohi Tapú ʻe toe moʻui mai ʻa e kau maté?​—Kol. 3:15.

• Ko hai ʻi ho ngaahi kaungāmeʻá mo e kāingá ʻoku tautefito hoʻo fakatuʻotuʻa atu ke toe sio ki aí?

• Ko hai ha taha ʻi he Tohi Tapú ʻoku tautefito hoʻo fakatuʻotuʻa atu ke fetaulaki mo talanoa mo ia?