Kapau ʻOku ʻi he Matapaá ha Kiʻi Leka

Kapau ʻoku ʻi he matapaá ha kiʻi leka, ʻoku totonu ke tau kole ke lea ki heʻene ongo mātuʻá. ʻOku fakahaaʻi ai ʻetau tokaʻi hona tuʻunga ʻulú. (Pal. 6:20) Kapau ʻoku fakaafeʻi kitautolu ʻe he kiʻi leká ke tau hū ange, ʻoku totonu ke tau kiʻi tatali. Kapau ʻoku ʻikai faingamālie ʻa e ongo mātuʻá, ʻoku totonu ke tau toki foki ʻi ha taimi kehe.

Kapau ʻoku fuʻu lahi ʻa e kiʻi leká, mahalo nai ʻokú ne ʻi he taʻu hongofulu tupú, ʻoku kei totonu pē ke ʻeke ʻene ongo mātuʻá. Kapau ʻoku ʻikai ke na faingamālie, te tau ʻeke ange pe ʻoku fakangofua heʻene ongo mātuʻá ke ne fili pē ʻa e meʻa ʻokú ne fie laú. Kapau ko ia, ʻe lava ke tau tuʻuaki ha tohi pea fakahaaʻi ange ʻa e jw.org.

ʻI hono fai ha toe ʻaʻahi ki ha talavou naʻá ne fakahāhā ha mahuʻingaʻia, ʻoku totonu ke tau kole ke lea ki heʻene ongo mātuʻá. ʻOku lava heni ke tau maʻu ha faingamālie ke fakamatala ki he taumuʻa ʻetau ʻaʻahí pea fakahaaʻi kiate kinautolu ʻa e falalaʻanga ʻo e akonaki ʻoku ʻi he Tohi Tapú ki he ngaahi fāmilí. (Saame 119:86, 138) ʻI heʻetau fakahāhā ʻa e fakaʻapaʻapa mo e fakaʻatuʻi ki he ongo mātuʻá ko ha fakamoʻoni lelei ia pea malava ke tau maʻu ai ha faingamālie ke vahevahe ʻa e ongoongo leleí mo e fāmilí.—1 Pita 2:12.