Fiefia Tuʻuloa ʻi he Tāpuaki mei Hotau Tokotaha-Fakatupú

Naʻe talaʻofa ʻe he ʻOtuá ki he palōfita ko ʻĒpalahamé ko e taha ʻi hono hakó ʻe fakafou mai ai ʻa e ngaahi tāpuaki ki he “ngaahi puleʻanga kotoa pē ʻo e māmaní.” (Sēnesi 22:18) Ko hai ʻa e hako ko iá?

ʻI he meimei taʻu ʻe 2,000 kuo maliu atú, naʻe ʻoange ʻe he ʻOtuá kia Sīsū, ʻa ia ko ha hako ʻo ʻĒpalahame, ʻa e mālohi ke ne fakahoko ʻa e ngaahi mana fakaofo. Naʻe fakahaaʻi ʻi he ngaahi mana ko iá ko e talaʻofa naʻe fai kia ʻĒpalahame fekauʻaki mo e ngaahi puleʻangá ʻe fakafou mai ia ʻia Sīsū.​—Kalētia 3:14.

Ko e ngaahi mana naʻe fai ʻe Sīsuú naʻe fakapapauʻi ai ko ia ʻa e toko taha kuo fili ʻe he ʻOtuá ke ne tāpuakiʻi ʻa e faʻahinga ʻo e tangatá, pea naʻe toe fakahaaʻi ai ʻa e founga ʻe ngāueʻaki ai ia ʻe he ʻOtuá ke tāpuakiʻi tuʻuloa ʻa e faʻahinga ʻo e tangatá. Fakatokangaʻi ʻa e anga hono fakamamafaʻi ʻe he ngaahi mana ʻa Sīsuú ʻa e niʻihi hono ngaahi ʻulungaanga fakamānakó.

Kaungāongoʻi​—Naʻe fakamoʻui ʻe Sīsū ʻa e puké.

ʻI he taimi ʻe taha naʻe kōlenga ʻe ha tokotaha kilia kia Sīsū ke ne fakamoʻui ia. Naʻe ala ʻa Sīsū kiate ia peá ne pehē: “ʻOku ou loto ki ai!” Naʻe puli atu leva ʻa e kiliá meiate ia.​—Maʻake 1:40-42.

Nima-homo​—Naʻe fafanga ʻe Sīsū ʻa e fiekaiá.

Naʻe ʻikai ke loto ʻa Sīsū ke fiekaia ʻa e kakaí. Naʻe ʻikai ke tuʻo taha pē ʻene fafangaʻi fakaemana ʻa e kakai ʻe laui afe ʻaki ʻa e ngaahi foʻi mā mo e fanga kiʻi mataʻiika. (Mātiu 14:17-21; 15:32-38) Hili ʻenau kaí, naʻa nau mākona kotoa pea naʻe toe lahi ʻa e meʻakaí.

Manavaʻofa​—Naʻe fokotuʻu ʻe Sīsū ʻa e maté.

ʻI he ueʻi ʻe he “fakaʻofaʻia” ʻa Sīsuú, naʻá ne fokotuʻu mei he maté ʻa e tama pē ʻe taha ʻa ha uitou naʻe mamahi koeʻuhi naʻe ʻikai ha taha ke ne toe tokangaʻi ia.​—Luke 7:12-15.