MOʻUI KO HA KALISITIANE
Founga ke Hoko ko e Tokotaha Ako Tōtōivi ʻo e Folofolá
Te ke saiʻia ke faitōnunga ʻi he malumalu ʻo e ʻahiʻahí ʻo hangē ko Tanielá? Naʻe ako tōtōivi ʻe Taniela ʻa e Folofola ʻa e ʻOtuá, ʻo kau ai ʻa e ngaahi kikite. (Tan. 9:2) Ko e ako tōtōivi ʻo e Tohi Tapú ʻe lava ke ne tokoniʻi koe ke ke hanganaki faitōnunga. ʻI he founga fē? ʻOku lava ke fakatupulekina ai hoʻo tui ko e ngaahi talaʻofa ʻa Sihová ʻe hoko moʻoni. (Sios. 23:14) ʻOku toe tokoni ia ke fakatupulekina hoʻo ʻofa ki he ʻOtuá, ʻa ia ʻe ueʻi ai koe ke ke fai ʻa e meʻa ʻoku totonú. (Saame 97:10) Ka ʻoku totonu ke ke kamata ʻi fē? Fakakaukau ki he ngaahi fokotuʻu ko ení.
Ko e hā ʻoku totonu ke u akó? Ko ha founga ako tuʻumaʻu ʻoku kau ki ai ʻa e teuteu ki he ngaahi fakataha ʻa e fakatahaʻangá. Ko e lau Tohi Tapu fakauiké ʻe lava ke ke maʻu ʻaonga lahi ange mei ai kapau te ke ʻai ha taimi ke fekumi ai ki he ngaahi poini ʻoku ʻikai te ke mahinoʻí. Tānaki atu ki aí, ʻoku fili ʻe he niʻihi ke ako lahi ange fekauʻaki mo e kikite ʻi he Tohi Tapú, ngaahi tafaʻaki kehekehe ʻo e fua ʻo e laumālie ʻo e ʻOtuá, ko e fononga fakamisinale ʻa e ʻapositolo ko Paulá, pe naʻa mo e ngaahi meʻa fakatupu hā mai Sihová. Kapau te ke fakakaukau ki ha fehuʻi ʻi he Tohi Tapú lolotonga ʻo e ʻahó, tohiʻi pea ʻai ia ko e kaveinga hoʻo ako hono hokó.
Te u maʻu mei fē ʻa e fakamatalá? Ke maʻu ha ngaahi fokotuʻu, sio ʻi he vitiō Ngaahi Meʻa Ngāue Fekumi ki Hono Maʻu ʻa e Makakoloa Fakalaumālié. Ke siviʻi hoʻo pōtoʻí, fekumi ki he ngaahi puleʻanga hau ʻo e māmaní ʻoku nau fakafofongaʻi ʻa e fanga manu ʻi he Taniela vahe 7.
Ko e hā ʻa e lahi ʻo e taimi ʻoku totonu ke u ako aí? Ko e ako tuʻumaʻú ko e kī ia ki he moʻui fakalaumālié. ʻE lava ke kamataʻaki hoʻo akó ha taimi nounou pē, kapau ʻe fiemaʻu, pea fakalahi māmālie ʻa hono lōloá. Ko e ako ʻo e Folofola ʻa e ʻOtuá ʻoku hangē ia ha keli ki ha ngaahi koloa fufuú; ko e lahi ange koloa te ke maʻú ko e lahi ange ia ʻa e koloa te ke loto ke kelí! (Pal. 2:3-6) ʻE tupulaki ai hoʻo holi ki he Folofola ʻa e ʻOtuá, pea ʻe hoko hoʻo ako tuʻumaʻu ʻa e Tohi Tapú ko hoʻo founga moʻui tuʻumaʻú ia.—1 Pita 2:2.
KO E HĀ ʻOKU FAKAFOFONGAʻI ʻE HE FANGA MANU ʻI HE TANIELA VAHE 7?
FEHUʻI TĀNAKI:
Naʻe anga-fēfē hono fakahoko ʻa e Taniela 7:8, 24?
POLOSEKI HOKÓ:
Ko e hā ʻoku fakafofongaʻi ʻe he fanga manu ʻi he Fakahā vahe 13?