Tauʻatāina ʻi he Kahaʻú Koeʻuhi ko e ʻOtuá mo Kalaisi

Ko e hā ʻa e ngaahi palopalema ʻokú ke faʻa fehangahangai mo iá? Ko ha ʻulu koe ʻo e fāmilí ʻokú ke feinga ke tokangaʻi ha ngaahi fatongia lahí? Ko ha mātuʻa taʻehoa koe ʻokú ke feinga ke tokonaki maʻa ho fāmilí? Ko ha toʻutupu koe ʻoku fakamamahiʻi ʻe hoʻo toʻumeʻá ʻi he ʻapiakó? ʻOkú ke puke ʻi ha mahaki pe hoholo ke taʻumotuʻa angé? ʻOku ʻi ai pē ʻa e palopalema ʻa e tokotaha kotoa. Ko e tokolahi ʻo e kau Kalisitiané ʻoku taulōfuʻu ʻa e ngaahi faingataʻa ʻoku nau fekuki mo iá. Kae kehe, ʻoku tau ʻilo kuo vavé ni ke fakatauʻatāinaʻi kitautolu mei he ngaahi meʻa fakamamahi ko ení.​—2 Kol. 4:16-18.

Ka ʻi he taimi ní, ʻoku tau maʻu ʻa e fiemālie ʻi he ʻiloʻi ʻoku mahinoʻi ʻe Sihova ʻetau ngaahi palopalemá, fakamahuʻingaʻi ʻetau mateakí mo e kātakí, pea te ne tāpuakiʻi lahi kitautolu ʻi he kahaʻú. (Sel. 29:11, 12) Pehē foki, ʻoku mahuʻingaʻia fakafoʻituitui ʻa Sīsū ʻiate kitautolu. ʻI heʻetau fakahoko ʻetau ngaahi ngafa faka-Kalisitiané ʻoku tau maʻu ʻa e fiemālie ʻi heʻene pehē: “ʻOku ou ʻiate kimoutolu.” (Māt. 28:20) ʻI heʻetau fakalaulauloto ki he tauʻatāina ʻi he kahaʻú ʻi he Puleʻanga ʻo e ʻOtuá ʻoku tau fakaivimālohiʻi ai ʻetau ʻamanakí mo e loto-pau ke kātekina ha ngaahi ʻahiʻahi pē.​—Loma 8:19-21.

SIO ʻI HE VITIŌ ʻI HE OFI MAI ʻA E MATANGÍ, KE KE HANGANAKI TOKANGATAHA KIA SĪSŪ!​—NGAAHI TĀPUAKI ʻO E PULEʻANGÁ ʻI HE KAHAʻÚ, PEA TALI LEVA ʻA E NGAAHI FEHUʻI KO ENÍ:

• Naʻe anga-fēfē hoko ʻa e faʻahinga ʻo e tangatá ʻo mavahe mei he ʻOtuá? Ko e hā leva ʻa e nunuʻá?

• Ko e hā ʻa e kahaʻu ʻoku hanga atu ki ai ʻa e faʻahinga ʻoku faitōnunga kia Sihová?

• ʻOku malava fēfē ke hoko ʻa e kahaʻu fakaofo ko iá?

• Ko e hā ʻa e ngaahi talaʻofa ʻokú ke fakatuʻotuʻa atu ki ai ʻi he māmani foʻoú?