Lau ʻa e Kakaí Fekauʻaki mo e Lotú
“ʻI heʻeku lotú, ʻoku ou ongoʻi ʻo hangē ʻoku ʻi hoku tafaʻakí ʻa e ʻOtuá, ʻo puke hoku nimá pea tataki au ʻi heʻeku tuēnoá.”—MARÍA.
“Naʻe mate hoku uaifí hili haʻane faitau mo e kanisaá ʻi he taʻu ʻe 13. ʻOku ou manatuʻi ʻeku lotu ʻi he ʻaho kotoa ki he ʻOtuá pea ongoʻi naʻá ne fanongo moʻoni mai ki heʻeku mamahí. Naʻá ku nonga.”—RAÚL.
“Ko e lotú ko ha meʻaʻofa fakaʻofoʻofa mei he ʻOtuá ki he tangatá.”—ARNE.
Naʻe vakai ʻa María, Raúl, Arne mo e tokolahi ki he lotú ko ha meʻaʻofa makehe. ʻOku nau ongoʻi ʻi heʻenau lotú, ʻoku nau talanoa ai ki he ʻOtuá, fakamālō kiate ia, pea kumi ki heʻene tokoní. ʻOku nau tui ʻaufuatō ki he fakapapau ʻa e Tohi Tapú fekauʻaki mo e lotu ki he ʻOtuá: “ʻOku tau falala kiate ia he ʻilonga ha meʻa ʻoku tau kole ʻo fakatatau ki hono finangaló, ʻokú ne fanongo mai kiate kitautolu.”—1 Sione 5:14.
ʻI he tafaʻaki ʻe tahá, ko e kakai tokolahi ʻoku faingataʻa ke nau tali ʻa e meʻa ʻoku leaʻaki ʻe he Tohi Tapú fekauʻaki mo e lotú. ʻOku fakamatala ʻa Steve ki heʻene ongoʻi fekauʻaki mo e lotú. “ʻI heʻeku taʻu 17, naʻe mate hoku kaungāmeʻa ʻe toko tolu ʻi ha fakatuʻutāmaki ʻe ua. Ko e tokotaha naʻe mate ʻi he fakatuʻutāmaki ʻi ha meʻalele pea ko e toko ua naʻá na melemo ʻi tahi.” Ko e hā naʻe fai ʻe Steve? “Naʻá ku lotu ki he ʻOtuá ki ha tali ki he ʻuhinga naʻe hoko ai ʻa e ngaahi meʻa ko iá, ka naʻe ʻikai ha tali. Ko ia naʻá ku ʻeke hifo, ‘Ko e hā ke lotu aí?’” Ko ia ai, ʻi hono ʻikai tali ʻa e lotu ʻa e tokolahi ʻoku taki atu ai ke nau fehuʻia pe ʻoku kei ʻaonga koā ʻa e lotú.
ʻOku toe ʻi ai mo e ngaahi ʻuhinga kehe ʻoku fehuʻia ai ʻe he kakaí ʻa e mahuʻinga ʻo e lotú. ʻOku pehē ʻe he niʻihi koeʻuhi ʻoku ʻafioʻi ʻe he ʻOtuá ʻa e meʻa kotoa pē, ʻokú ne ʻosi ʻiloʻi ʻetau ngaahi fiemaʻú pe ko ʻetau ngaahi palopalemá, ko ia ʻoku ʻikai ke fuʻu fiemaʻu ia ke tau tala ange ia kiate ia.
ʻOku tui ʻa e niʻihi ʻoku ʻikai ke fie fanongo ʻa e ʻOtuá ki heʻenau lotú koeʻuhi ko e ngaahi fehālaaki naʻa nau fai ʻi he kuohilí. ʻOku pehē ʻe Jenny, “Ko e palopalema lahi taha naʻá ku fekuki mo iá ko e ongoʻi taʻefeʻunga. Naʻá ku fai ʻa e ngaahi meʻa ʻoku ou fakaʻiseʻisa ai, ko ia ʻoku ou pehē loto pē ʻoku ʻikai ke u tuha ke fanongo mai ʻa e ʻOtuá.”
ʻOku fēfē hoʻo ongoʻi fekauʻaki mo e lotú? Kapau kuó ke ongoʻi hohaʻa pe veiveiua fekauʻaki mo e lotú, ʻe lava ke ke fiemālie ʻi hono ʻiloʻi ʻe lava ke ʻomai ʻe he Tohi Tapú ha ngaahi tali fakafiemālie. Ko e Tohi Tapú ʻe lava ke ne tokoniʻi koe ke maʻu ʻa e tali falalaʻanga taha fekauʻaki mo e lotú;a hangē ko e ngaahi fehuʻi ko ení:
ʻOku fanongo moʻoni mai ʻa e ʻOtuá ki heʻetau lotú?
Ko e hā ʻoku ʻikai tali ai ʻa e lotu ʻe niʻihi?
ʻE lava fēfē ke tali hoʻo lotú?
ʻE ʻaonga fēfē lotú kiate koe?
a ʻOku maʻu ʻi he Tohi Tapú ʻa e ngaahi lotu ʻa e kau sevāniti tokolahi ʻa e ʻOtuá, kau ai ʻa Sīsū Kalaisi. Ko e Ngaahi Konga Tohi Tapu Faka-Hepeluú, ʻoku anga-maheni hono ui ko e Fuakava Motuʻá, ʻoku maʻu ai ʻa e ngaahi lotu ʻe 150 tupu.