Ngāueʻaki Hoʻo “Meʻaʻofa Fakalaumālie”

ʻOku tau koloaʻaki kotoa ʻa e fefakalototoʻaʻaki ʻoku tau maʻu mo hotau fanga tokouá mo e fanga tuofāfine Kalisitiané. Ka ʻoku kaunga ki he fakalototoʻa ko iá ʻa e meʻa lahi ange ʻi he fakatahatahá pē. ʻOku ui ʻi he Tohi Tapú ʻetau malava ke fakaivimālohiʻi ʻa e tui ʻa e tokotaha ʻe tahá ko ha “meʻaʻofa fakalaumālie.” (Loma 1:​11, 12) ʻE lava fēfē nai ke tau ngāueʻaki kakato ʻa e meʻaʻofa ko iá?

ʻOatu ha meʻaʻofa ʻo e ngaahi lea ʻosi filifili lelei. Ko e fakatātaá, ʻe lava ke tau fai ha tali ʻi he fakatahá ʻa ia ʻoku fakahangataha kia Sihova, ko ʻene Folofolá mo ʻene kakaí, kae ʻikai kiate kitautolu. ʻI he fetalanoaʻaki mo e kaungātuí, ʻe lava ke tau talanoa fekauʻaki mo e ngaahi kaveinga fakatupu langa hake.

Fakalototoʻaʻi ʻa e niʻihi kehé fakafou ʻi hoʻo ngaahi filí mo e tōʻongá. Ko e fakatātaá, kuo fili ʻa e niʻihi ke nofo ai pē ʻi he ngāue taimi-kakató neongo ʻa e fehangahangai mo e ngaahi pole fakafoʻituituí. Ko e niʻihi ʻoku nau poupouʻi maʻu pē ʻa e fakataha lolotonga e uiké neongo ha taimi-tēpile ngāue moʻumoʻua pe ko ha mahaki tauhi.

ʻOkú ke fakalototoʻaʻi ʻa ho fanga tokouá mo e fanga tuofāfiné ʻi hoʻo fakahāhā ʻa e tuí? Pea ʻokú ke tokanga ke tali ʻa e ngaahi meʻaʻofa fakalaumālie ko ení ʻi hono fakahāhā atu ia kiate koé?