Velá! Ko Fē ʻa e Meʻa Tāmate-Afi ʻOku Totonu Ke Ke Ngāueʻakí?

HE TUʻO fiha ē ʻetau lue fakalaka atu ʻi he kiʻi meʻa maluʻi fakalongolongo ko ia ʻoku tautau ʻi he holisí ʻo ʻikai ʻaupito fai ha fakakaukau ki ai! ʻOsi angé, te ne fakahaofi nai ʻi ha ʻaho hotau ʻōfisí pe falengāué pea aʻu ki hotau ʻapí mei haʻane vela. Ko e ngaahi meʻa tāmate-afi toʻotoʻó ʻoku malava ke tokoni ia ki hano taʻofi ha fanga kiʻi palopalema iiki—ko ha fakapaku ʻoku vela ʻi he sitoú pe ko e vela ʻa e puipuí ʻi ha hita—mei hano taʻemapuleʻi. Hangē ko e ngaahi meʻatau fakafepaki vavé, ʻoku faʻu kinautolu ke nau tāmateʻi ha fili fakatuʻutāmaki ki muʻa ke fakaʻau ke mālohi ange.

Koeʻuhi ko e fili ko ení ʻoku haʻu ʻi he kalasi kehekehe—vela ʻa e papá, vela ʻa e loló mo e kasá, vela ʻa e ʻuhilá—ko e ngaahi meʻa tāmate-afi toʻotoʻó ʻoku toe haʻu mo ia ʻi he kalasi kehekehe. ʻOku hā mahino leva, ʻoku fiemaʻu ke ke ʻiloʻi fakatouʻosi ʻa ho filí mo hoʻo meʻataú. ʻOku ʻikai ʻuhinga eni iá ko hono maʻu ʻa e vavanga ʻoku maʻu ʻe ha tangata tāmate-afi taukei, ka ʻoku ʻuhingá ko hono ʻiloʻi ha ngaahi moʻoniʻi meʻa tefito siʻi pē. Ko e fakatātaá, ko e hā naʻá ke mei fai ʻi he tuʻunga ko ení?

Ko ha tokotaha taʻo tou naʻá ne fakamafana ha laulau ʻoku ʻi ai ha kapa taʻo mā foʻou ʻe 20 kuo ʻosi vali lolo fakalelei ʻi ha ʻōvani ʻi heʻene teuteu ke taʻo ʻa e maá. Kae kehe, naʻe maumau ʻa e femositetí ia, pea fuʻu vela ʻaupito ai ʻa e ʻōvaní, ʻo kohu ʻa e loló. Naʻe fakaava fakavave leva ʻe he tokotaha taʻo toú ʻa e ʻōvaní ʻaki ha kofu-nima, peá ne tohoʻi mai ʻa e laulaú ki tuʻa. Ka ʻi heʻene fai peheé, naʻá ne fakaeʻa ai ʻa e lolo naʻe kohú ki ha ʻea lahi ʻaupito. Pahū! ʻI heʻene puho ʻiate ia peé naʻe mapuna hake ai ʻa e uló ʻo tau ki he ʻaofí. ʻI heʻene hao ʻikai velá, naʻe lele fakavave ai ʻa e tokotaha taʻo toú ʻo foki mai ʻi ha laui sekoni pē mo ha meʻa tāmate-afi kāponi taiʻokisaiti peá ne tāmateʻi fakavave ʻaki ʻa e afí. Ka naʻe ʻikai hano taimi kuo toe fakalalahi ʻa e kohú ia, pea toe vela ai ʻa e loló. Naʻe hokohoko pehē tuʻo fā ʻa e fefāingaʻaki ko ʻení! ʻI heʻene manavasiʻi naʻa maha ʻa e meʻa tāmate-afí, naʻe tohoʻi mai ʻe he tokotaha taʻo toú ha kafu tāmate-afi naʻe tuku ofi mai pē ʻi hono meʻa tukuʻangá ʻo ne lī atu ʻo ʻufiʻufi ʻaki ʻa e laulaú. ʻI he hoko ʻo fakanonga kiate iá, naʻe tāmateʻi ai ʻa e afí—pea mate ai pē.

ʻI he tuʻunga anga-mahení, ʻoku tau loto ke ngāueʻaki ʻa e ngaahi meʻangāue lelei taha ʻoku ala maʻú ke tāmateʻi ʻaki ha kiʻi vela siʻisiʻi kae fakamanavahē. Ka ʻo kapau naʻe ʻilo ʻa e tokotaha taʻo toú fekauʻaki mo e malava ke ulo ʻiate ia pē—ko ha tuʻunga ʻoku mātuʻaki malava ke hoko ʻi ha taimi pē ʻoku ʻi ai ha kohu—naʻá ne mei tāmateʻi pē ʻa e ʻōvaní, tāpuni ʻa e ʻū matapaá, pea tuku ʻa e ʻū meʻa ʻi he loto ʻōvaní ke mokomoko hifo ʻiate ia pē. Pe naʻá ne mei ʻuluaki ngāueʻaki ʻa e kafu tāmate-afí pea toki hoko atu kapau ʻe fiemaʻu, ki he meʻa tāmate-afi kāponi taiʻokisaití. Ko e hā pē ʻa e tuʻungá, ʻoku fakahaaʻi ʻe he meʻa naʻe hokosiá ʻa e mahuʻinga ʻo ha ʻilo tefito ki he ngaahi velá pea mo e founga lelei taha ke tāmateʻi ai kinautolú.

Ko e “Tapatolu” ʻOku Tānaki ʻo Maʻu Ai ʻa e Velá

Ko e meʻa ʻoku ui ko e tapatolu ʻo e velá ko ha foʻi lao ʻuhinga lelei ʻa ia ʻokú ne ʻomai ʻa e ngaahi tuʻunga ʻoku hoko ai ʻa e velá: fefie tānaki ʻosikena tānaki mafana tatau ia ki he velá. Toʻo ha foʻi konga pē ʻe taha, pea ʻe ʻikai ke ngata pē ʻi hoʻo tāmateʻi ʻa e afí ka te ke toe taʻofi ai ha vela lahi ange. Tau sio angé ki he founga ʻoku ʻaonga ai ení.

FEFIE: Hangē ko kitautolú, ʻoku mate ʻa e afí ʻi he ʻikai ha meʻakaí. ʻOku ngāueʻaki ʻe he kau tangata tāmate-afí ʻa e foʻi moʻoni ko ení ki he vela ʻa e vaotātaá mo e vao iikí ʻi he taimi ʻoku nau faʻu ai ha taʻofiʻanga ʻi he halanga vela tefitó. Kapau ko ha peito, ko hono tāmateʻi ʻa e fefié ʻoku ʻuhinga nai iá ko hono tāmateʻi pē ʻa e kasá. Kae kehe, ʻi he ngaahi ʻātakai kehé, ko hono tāmateʻi ʻa e fefié ʻe faingataʻa nai pea aʻu ʻo taʻemalava.

ʻOSIKENA: ʻI heʻene toe hangē ko kitautolú, kuo pau ke mānava ʻa e afí. Huhua ha sāvolo kelekele fonu pe lī ha kafu tāmate-afi ʻi he afí, pea te ke tāmateʻi ia. Kae kehe, ko e lēvolo ʻo e ʻosikená ʻoku ʻikai fiemaʻu ia ke ʻalu hifo ki he noá kae toki mate ʻa e afí. Kapau te ke fakasiʻisiʻi ʻa e lēvolo ʻo e ʻosikená mei hono tuʻunga anga-maheni ko e pēseti ʻe 21 ʻi he ʻea takatakai ʻiate kitautolú ki he pēseti ʻe 15, ko e ngaahi meʻa lahi—hangē ko e ngaahi huhuʻa velangofuá, pea aʻu ki he ngaahi meʻa fefeka ʻe niʻihi—ʻe ʻikai ke toe vela ia.

MAFANA: Ko e maʻuʻanga mafana ke kamataʻaki ha velá ʻoku malava ke haʻu ia mei ha hita mafana, ko ha sitou, ngaahi uaea ki ha foʻi poini ʻuhila ʻoku fakauta ʻo fuʻu hulu, ko ha mofisiʻi afi pe malala, tapa ʻa e ʻuhilá, pe ko e mafana ʻoku tupu mei he palapalangia ʻa e ʻakaú, ngaahi kemikale liliu mao ngofuá, pe ko ha ngaahi meʻa lahi kehe. Manatuʻi, kapau te ke sio ki ha kohu, tautefito kapau ʻoku tupu mei ha ngako pe lolo ngaohi kai ʻi ha maʻuʻanga mafana, ko ʻene ulo ʻiate ia peé ʻoku malava ke hoko ia ʻi ha laui sekoni pē.

Feʻunga ki he Faʻahinga Vela Iiki Kotoa Pē

Lolotonga ko e ngaahi ʻapi lahi ʻoku ʻikai ʻi ai haʻanau ngaahi meʻa tāmate-afi, ko e ngaahi falengāué, ngaahi ʻōfisí, mo e ngaahi fale fakapuleʻangá ʻoku faʻa fiemaʻu ʻe he laó ke ʻi ai haʻanau meʻa pehē. Ko hono kalasi tefitó ko e vai, huhuaʻi kemikale, koa, efuefu, mo e kāponi taiʻokisaiti. Ko e ngaahi meʻa tāmate-afi hāloní ʻoku fakaʻau pē ke ʻikai toe ngāueʻaki koeʻuhi ʻoku pehē ʻoku fakatupu ʻauha ia ki he tokaʻanga ʻōsone ʻi he ʻatimosifia ʻo e foʻi māmaní. Ke tokoniʻi ʻa e faʻahinga ʻoku nau ngāueʻakí ke fili ʻa e meʻa tāmate-afi totonú ʻi ha fiemaʻu fakavavevave, ko e ngaahi meʻa tāmate-afi lahi ʻoku ʻi ai hono ngaahi fakatātā ʻoku fakahaaʻi ai ʻa e feituʻu ʻe malava mo ʻikai malava ke ngāueʻaki ki aí, pe ʻoku fakaʻilongaʻi ʻaki kinautolu ha lanu. Pea ko e ngaahi meʻa tāmate-afi lahi ʻoku ʻi ai hono mataʻitohi, hangē ko e A, B, pe C, ʻo fakahaaʻi ai ʻa e kalasi pau ʻo e velá. ʻOku hanga ʻe he kasa teke mālohí, ʻo puhiʻi oma mai ki tuʻa ʻi he mata puhí ʻa e ngaahi meʻa ʻokú ne tāmateʻi ʻa e afí, ʻi he taimi ʻoku lomiʻi ai ʻa hono kaú. Koeʻuhi ʻoku ʻi ai ha kasa ʻoku taʻomi ʻi loto ʻi he ngaahi meʻa tāmate-afí, ʻoku fiemaʻu ai ke vakaiʻi ia ʻi he taimi ki he taimi. Pea ʻoku totonu maʻu pē ki he ngaahi meʻa tāmate-afí ke tuku ʻo ofi ki he hūʻanga ki tuʻá pea ʻoku totonu ke faingofua ʻa e aʻu ki aí. Tau vakai nounou angé he taimí ni ki he kalasi taki taha ʻo e meʻa tāmate-afí.

Ko e ngaahi meʻa tāmate-afi efuefú ʻokú ne taʻofi fakakemikale ʻa e velá pea ʻoku meimei ui pē ia ko e meʻa tāmate-afi fakalūkufua ki he velá. ʻOku ʻikai ngata pē ʻi he ʻaonga ʻa e efuefú ʻi hono taʻofi ʻa e ongo kalasi vela A mo e B ka ʻoku toe ʻaonga ʻi hono tauʻi ʻo e ngaahi kalasi vela C (naunau fakaʻuhilá). ʻOku mahino, ko e meʻa tāmate-afi mohu ʻaonga ko ení ʻokú ne ʻomai ha maluʻi lelei ʻaupito ki ho ʻapí. ʻOku faʻa fakatupunga ʻe he efuefú ha fakapalakū—ka neongo ia ko ha fakapalakū ʻe hoko nai ia ko ha kiʻi fakamole siʻisiʻi pē!

Ko e ngaahi meʻa tāmate-afi fana vaí ʻoku lelei ʻaupito ia ki he ngaahi vela ʻoku kau ai ʻa e pepá, papá, ngaahi pelesitikí, vevé, pe ngaahi tupenú. ʻOku faʻa ui eni ko e ngaahi kalasi vela A. Ko e mālohi ʻo e vaí ʻi hono tuʻunga ko e meʻa tāmate-afí ʻoku haʻu ia mei heʻene malava lahi ko ia ke mimisi ʻa e mafaná. ʻI ha lahi feʻunga, ʻoku vave ange hono toʻo ʻe he vaí ʻa e mafaná ʻi he malava ʻa e afí ke ne toe tafunaki mai iá, pea ko ia ʻoku mate ai ʻa e afí. Kae ʻoua ʻe ngāueʻaki ʻa e vaí ki he ngaahi huhuʻa vela ngofuá. Te ke fakamafola ai ʻe koe ʻa e afí—ʻo fakatupunga pā! Pea koeʻuhi ʻoku tafe ʻa e ʻuhilá he vaí, ʻoku ʻikai totonu ke ke ngāueʻaki ia pe ko ha faʻahinga meʻa tāmate-afi ʻoku kau ai ʻa e vaí ʻi ha feituʻu ʻoku ʻi ai nai ha ngaahi uaea ʻuhila moʻui.

Ko e ngaahi meʻa tāmate-afi huhuʻa kemikalé ʻokú ne ngāueʻaki ha huʻi ʻo e māsima ʻalakalai ʻi he vai kuo pamuʻi mālohi pea ʻoku tautefito ʻa hono ʻaongá ki he ngaahi meʻa ngakó mo e lolo ngaohi kaí ka ʻoku ʻikai ʻaonga ia ki he ngaahi meʻa ngaohi mei he lolo ʻi lolofonuá. ʻOku toe ʻaonga foki ia ki he ngaahi kalasi vela A.

Ko e ngaahi meʻa tāmate-afi koá ʻoku ʻaonga ia, ʻo ʻikai ngata pē ki he kalasi vela A kae tautefito ki he ngaahi vela ʻoku kau ai ʻa e ngaahi huhuʻa velangofuá (ʻū lolo fakaloló, lolo-tīsolo mo e penisini, vali), ʻa ia ʻoku ʻiloa ko e kalasi vela B. ʻOku ʻi ai ʻa e kalasi ʻe ua ʻo e meʻa tāmate-afi koá, ko ia vakaiʻi ʻa e kalasi ʻoku feʻungamālie mo hoʻo fiemaʻú. ʻI he taimi ʻoku ngāueʻaki ai ki ha huhuʻa ʻoku vela, ʻoku kāpui ia ʻe he koá ʻaki ha huhuʻa maluʻi manifi ʻa ia ʻokú ne taʻofi ʻa e ngāue ʻa e mao velangofuá pea toe maluʻi foki ia mei he ʻosikená. Ko ia ai, kuo pau ke ngāue fakaalaala lahi ʻaki ʻa e koá koeʻuhi ke ʻoua ʻe hū ki loto ki he huhuʻá, ka ke mafola lelei ʻi ai. Tokanga ke ʻoua ʻe ngāueʻaki ʻa e koá ʻo ofi ki he ʻuhilá.

Ko e ngaahi meʻa tāmate-afi kāponi taiʻokisaití ʻoku malava ke ngāueʻaki ia ʻi he meimei faʻahinga vela kotoa pē tuku kehe ʻa e vela ʻa e kasá. ʻOku ngāue ia ʻi he tefitoʻi lao ko e hanga ʻe he kāponi taiʻokisaití ʻo toʻo ʻa e ʻosikená. Kae hangē ko ia naʻa tau tomuʻa vakai ki aí, kapau ʻoku kei maʻu ʻe ha meʻa velangofua hono mafaná, ko ʻene toe ulo ʻiate ia peé ʻe malava ke hoko. Ko e kāponi taiʻokisaití ko e kasa, ko ia ko ha ʻātakai havilivili, mo ʻatāloa te ne fakangatangata ʻe ia ʻa ʻene ngāué. Kae kehe, ko ʻene maʻá, ʻokú ne ʻai ai ia ko ha meʻa tāmate-afi ʻoku fili ke ngāueʻaki ki he ngaahi mīsini mo e ngaahi naunau fakaʻuhila ʻoku pelepelengesí. Neongo ia, ʻi he ngaahi feituʻu ʻoku ʻikai ʻataá, ʻoku malava ke fakafulutāmakia ʻa e kāponi taiʻokisaití, ko ia kapau ʻokú ke ngāueʻaki ia ʻi ha feituʻu pehē, fakapapauʻi ke mavahe leva ʻi he mate ʻa e afí pea tāpuni ʻa e matapaá ʻi hoʻo ʻalú.

Ko e kafu tāmate-afía ko ha meʻa tāmate-afi ʻaonga pea ʻoku lelei ʻaupito ia ki he fanga kiʻi vela iikí hangē ko haʻane hoko nai ʻi ha funga sitou pe ʻi ha konga kāpeti siʻisiʻi. Ko hoʻo tohoʻi mai pē ʻa e kafú mei hono kiʻi meʻa tukuʻanga he holisí, falō ia ʻi muʻa ʻiate koe ke maluʻi koe mei he afí, pea ʻufiʻufi hifo ʻaki ʻa e afí. Ko e moʻoni, kapau kuo teʻeki ke ke fai pehē, tāmateʻi leva ʻa e meʻa maʻuʻanga mafana tefitó kapau ʻoku malava.

ʻOku toe hoko ʻa e kafu tāmate-afí ko ha ngaahi meʻa fakahaofi moʻui kapau ʻoku maʻu ho valá ʻe he afí. ʻI he meʻa ko iá, manatuʻi ʻa e lao mātuʻaki mahuʻinga ko ení: “Tuʻu, tō, pea teka.” ʻOua ʻaupito ʻe lele; te ke hanga ai ʻe koe ʻo tapili ʻa e afí. Kapau ʻokú ke malava pe ko ha tokotaha kehe ke ne takaiʻi koe ʻaki ha kafu tāmate-afi ʻi hoʻo teká, te ke tāmateʻi vave ange ai ʻa e afí.

Lelei Ange Ia ʻi he Ngaahi Meʻa Tāmate-Afí

Ko e moʻoni, ko e meʻa maluʻi lelei taha mei he velá, ko e fakaʻehiʻehi mei he afí; ko ia ngāueʻaki ʻa e fakakaukau leleí. Tauhi ke mamaʻo ʻa e masí mo e ngaahi meʻa tutú mei he fānaú. Toʻo ʻa e ngaahi meʻa kotoa pē ʻi he funga sitoú pe ofi ki ai ʻa ia ʻe malava ke maʻu ʻe he afí. ʻOua ʻaupito ʻe feimeʻatokoni lolotonga ia ʻokú ke tui ha vala ʻoku ngatōtō mo tāupe hono ongo nimá ʻa ia ʻe malava nai ke maʻu ʻe he afí. Fokotuʻu ʻi ho ʻapí ʻa e ngaahi meʻa ʻokú ne tala ʻa e ʻahú.

Ko ha ngaahi toe faleʻi eni ʻe niʻihi. ʻOua ʻe fakauta tōtuʻa ʻa e ngaahi poini ʻuhilá pe ngaahi uaea takí. ʻOua ʻe tuku taʻetokangaʻi ʻo ka fai ha fakapaku ʻaki ʻa e ngakó pe loló ʻi ha sitou vela. Tokanga ki he feituʻu ʻokú ke tuku ai ʻa e ngaahi hita fakamafana lokí. Kapau ʻoku ʻi ai haʻo ngaahi hina kasa ʻoku tuku ofi ki he falé, fakahanga hono valo maluʻí—ko ha meʻa ʻoku malava ke puhi afi ʻi ha vela—ʻo mamaʻo mei he falé. Ngāueʻaki ʻa e ngaahi fiusi ʻuhila lahi totonu. Fetongi ʻa e ngaahi uaea ʻuhila maumaú.

Kuó ke ʻosi fakakaukau ki hono ʻahiʻahiʻi ʻa e ngaahi meʻa ke fai ʻi ʻapi ʻi he hoko ha velá? ʻOku malava moʻoni ke fakahaofi ʻe he ngaahi meʻá ni ʻa e moʻuí. Fokotuʻutuʻu ki he fāmilí ke nau fakatahataha ki ha foʻi feituʻu pau—ha faʻahinga feituʻu pē ʻoku ʻilo ngofua mo malu ʻa ia ʻe faingofua ke ʻiloʻi he ʻahó pe poʻulí. Pea ko e ngaahi fatongia ke vaheʻí: Ko hai ʻe tokoni ki hono fakahaofi ʻa e fanga kiʻi valevalé pe kau faingataʻaʻiá? Ko hai ʻe tā ki he potungāue tāmate-afí? ʻIo, ko e akoʻí ʻokú ne fakahaofi ʻa e moʻuí koeʻuhi ʻoku nau ʻahiʻahiʻi ʻa e meʻa totonu ke faí, ʻo ʻai ia ke vave pea fakahoko ʻo ʻikai toe fekauʻi.

Ka Faifai Kuo Hoko ʻa e Tuʻunga Kovi Tahá

Manatuʻi, ko e koloá ʻoku malava ke fetongi ka ʻoku ʻikai malava ke fetongi ʻa e moʻuí. ʻOua ʻe tuku hoʻo moʻuí ki ha tuʻunga fakatuʻutāmaki ke tauʻi ʻaki ha vela. Kae kehe, kapau ʻoku malu pē kiate koe ke tauʻi ʻa e velá, fai ia mei ha tuʻuʻanga te ne fakaʻatā ai koe ke ke ala hū ki tuʻa. Ka ʻo kapau ʻokú ke veiveiua pe ko e meʻa tāmate-afi totonú ʻokú ke maʻú pe ʻokú ke manavasiʻi naʻa ʻoku fuʻu lahi ʻa e velá ia ki ai, hū vave ki tuʻa pea tā ki he potungāue tāmate-afí.

Fakatokangaʻi ange foki, ko e ʻahú, tautefito ki he ʻahu kona mei he ngaahi meʻa ngaohi mei he kemikalé, ʻoku lahi ange ʻene tāmateʻi ʻa e kakaí ʻi he afí—ʻoku malava ke tāmate ia ʻo siʻi hifo he miniti ʻe uá! Ko ia ʻi he hola mei ha fale ʻoku vela, tauhi ofi ki he falikí. ʻOku siʻi ange ʻa e ʻahu ʻoku ofi ki he falikí, pea ʻoku mokomoko ange ai ʻa e ʻeá. Kapau ʻoku malava, puke ha konga tupenu viku ʻi ho ngutú. Ki muʻa ke ngāueʻaki ha matapā, ala ki ai ʻaki ho tuʻaʻi nimá. Kapau ʻoku mafana, ko e velá ʻoku ʻi he tafaʻaki ʻe tahá; kumi ki ha hūʻanga ki tuʻa ʻe taha. Pea tāpuni kotoa ʻa e ʻū matapaá ʻi hoʻo ʻalú. ʻOku fakasiʻisiʻi ʻe he meʻá ni ʻa e hū ʻa e ʻosikená ki he velá. ʻOku moʻoni, ko e lifí, ko ha meʻa ke mātuʻaki tapu ʻaupito ke ngāueʻaki ia ʻi ha vela—te ke fihia ai pea hoko ia ko ha ʻōvani!

Ko ia kapau ʻokú ke palani ke fakatau mai ha meʻa maluʻi afi ki ho ʻapí, kaá, pe pisinisí, ʻoku lelei nai ke ke fetalanoaʻaki ki ai mo e potungāue tāmate-afi ʻi ho feituʻú. Ko ha ngaahi fakaikiiki pau lahi ange ʻe kehekehe nai ia mei he fonua ki he fonua pea ko ia ai ʻoku ʻikai malava ke fakaaʻu atu ia ʻi he kupu ko ʻení.

Kae kehe, ko e taimi hono hoko te ke sio ai ki ha taha ʻo e fanga kiʻi meʻa maluʻi fakalongolongo ko ení, kiʻi tuʻu pea ʻai ke maheni ange mo ia. Te ke fakamālō lahi nai ki ai ʻi ha ʻaho.

[Fakamatala ʻi lalo]

[Taeakalami/Fakatātā ʻi he peesi 27]

(Ki he konga tohi kuo fokotuʻu kakató, sio ki he tohi)

VELA

fefie

mafana

ʻosikena

[Ngaahi Fakatātā]

KALASI A

KALASI B

[Maʻuʻanga ʻo e Tā]

Chubb Fire Safety

[Taeakalami ʻi he peesi 28]

(Ki he konga tohi kuo fokotuʻu kakató, sio ki he tohi)

Kapau ʻoku maʻu ho valá ʻe he afí, ʻoua ʻe lele

1. TUʻU

2. TŌ

3. TEKA

[Maʻuʻanga ʻo e Tā]

© Coastal Training Technologies Corp. Reproduced by Permission

[Fakatātā ʻi he peesi 26]

ʻOku lahi ʻa e ngaahi meʻa tāmate-afi mohu ʻaonga maʻá e ʻapí

[Maʻuʻanga ʻo e Tā]

Fakatātā ʻi ʻolungá: Reprinted with permission from NFPA 10 - 1998, Portable Fire Extinguishers, Copyright © 1998, National Fire Protection Association, Quincy, Massachusetts 02269. This reprinted material is not the complete and official position of the NFPA on the referenced subject which is represented only by the standard in its entirety.