Ko e Ngaahi Taʻu Lelei Tahá?
KO E 6:30 ia ʻi ha pongipongi momoko ʻīʻī ʻi Soweto, ʻi ʻAfilika Tonga. Kuo pau ke tuʻu hake ʻa ʻEvelini mei he mohengá.a ʻI hono falé ʻa ia ʻoku hala ha hita ʻi lotó, ko ha tuʻunga fakamamahi ʻaupito eni.
ʻOkú ne faofao mamahi ʻa hono ongo tui ʻoku langá ʻi he tapaʻi mohengá. Hili iá ʻokú ne tangutu leva ʻo tatali. ʻOku māmālie ʻa e holo hifo ʻa e langa ʻa hono ongo vaʻé. ʻOku mateuteu ʻa ʻEvelini he taimi ko ení peá ne tuʻu hake. ʻOkú ne toʻe ʻi he langá. ʻI he teke vakavaka hangē ko ha ‘heʻe ʻokú ne toho ʻa ia tonú,’ ʻoku toʻeu māmālie atu ʻa ʻEvelini ki he fale kaukaú.—Koheleti 12:5, NW.b
‘Ko ha lavameʻa moʻoni ē!’ ko e lea ia ʻa ʻEvelini kiate iá. ʻIkai ngata pē kuó ne moʻui ʻo sio ki ha toe ʻaho ʻe taha ka kuó ne toe ueʻi ʻa hono sino felāngaakí.
Kae kehe, ʻoku toe ʻi ai ʻa e meʻa kehe ʻokú ne hohaʻa ki ai. “Ko e sio atu ko ia ʻe hoko ʻo ‘ʻikai ngāue lelei’ ʻa hoku ʻatamaí,” ko e fakamatala ia ʻa ʻEveliní. ʻOkú ne fakamoleki ʻene kií ʻi he taimi ki he taimi, ka ʻoku kei māsila pē ʻa hono ʻatamaí. “ʻOku ou lotu pē ke ʻoua ʻe mole ʻa ʻeku fakakaukaú,” ko e lau ia ʻa ʻEveliní, “ʻo hangē ko e kau vaivai ʻe niʻihi.”
ʻI he ngaahi ʻaho ʻo ʻene kei siʻí, naʻe ʻikai ʻaupito ha fakakaukau ʻa ʻEvelini ʻo fekauʻaki mo e meʻa ʻoku hoko ʻi he taʻumotuʻá. Fakafokifā pē, ʻoku hā vave ʻa e ʻalu ʻa e ngaahi taʻú, pea ʻi he taimi ko ení ʻoku fakamanatuʻi maʻu pē kiate ia ʻe hono sino felāngaakí ʻokú ne taʻu 74.
Ko e niʻihi ko ia ʻoku ʻi ha tuʻunga lelei ange ʻia ʻEvelini pea ʻi ha tuʻunga ʻatā mei he puke lahí mo e loto-mafasiá ʻoku lava ke nau vakai ʻi he fiemālie ki heʻenau moʻui ki muí ko e ngaahi taʻu lelei tahá ia. ʻI he hangē ko e pēteliake ko ʻĒpalahamé, ʻoku nau aʻu nai ʻo ‘motua lelei, ʻo motua pea aʻu.’ (Senesi 25:8, PM) Ko e niʻihi kehé ʻoku nau hokosia “ʻa e ngaahi ʻaho kovi” pea ko e meʻa pē ʻoku lava ke nau leaʻakí: “ʻOku ʻikai vovo ha meʻa.” (Koheleti 12:2 [Koh 12:1, PM]) ʻI ha savea ʻe taha naʻe vakai ai ʻa e kakai tokolahi ʻaupito mo e fakatuʻatamaki ki he mālōlō mei he ngāué ʻo fokotuʻu ai ʻe he makasini Newsweek ke toe ui ʻa e ngaahi taʻu lelei tahá ko e “Ngaahi Kuonga Fakapoʻuli.”
ʻOku anga-fēfē hoʻo vakai ki he taʻumotuʻá? Ko e hā ʻa e niʻihi ʻo e ngaahi pole ʻoku fehangahangai mo e kau taʻumotuʻá? ʻOku taʻealakalofi ʻa e hōloa fakaeʻatamaí ʻi he taʻumotuʻá? Ko e hā ʻe lava ke fai ke pouakiʻaki ʻa e nonga ʻi he ngaahi taʻu lelei tahá?
[Fakamatala ʻi lalo]
a Kuo liliu ʻa e hingoa ʻe niʻihi ʻi he ngaahi holongā kupu ko ení.
b Ko e kupu ko eni ʻi he tohi Tohi Tapu motuʻa ʻa Koheletí kuo ʻiloʻi fuoloa ko ha fakamatala fakaemaau fakamaama ia ʻo e ngaahi tuʻunga faingataʻa ʻo e hoholo ke motuʻá.