Ko ha Tohi Laulōtaha

LAKA hake he taʻu ʻe 550 kuohilí, ko e tokotaha ʻilo meʻa foʻou Siamane ko ʻIoane Kutenipeeki, naʻe kamata ai ke ne paaki tohi ʻo ngāueʻaki ʻa e mataʻi taipe fetongitongí. Ko e fuofua tohi ʻiloa naʻá ne pākí ko ha Tohi Tapu.a Talu mei ai, kuo pulusi ha ngaahi tohi ʻe laui piliona ʻi he kaveinga kotoa pē ʻoku ala fakaʻuta atu ki ai. Kae kehe, ko e Tohi Tapú ʻoku māʻolunga taha ʻi he ʻū tohi kotoa ko iá.

• ʻOku fakafuofua kuo pulusi ʻa e Tohi Tapu (kakato pe ko hano konga) laka hake he 4.7 pilioná. ʻOku laka hake liunga nima ia ʻi he ngaahi tatau ʻo e tohi naʻe tufaki lahi taha hono hokó, ko e Quotations From Chairman Mao.

• ʻI he taʻu pē ʻe taha ki muí ni, naʻe tufaki ai ʻa e ngaahi tatau laka hake he 50 miliona ʻo e Tohi Tapú pe ko hono ngaahi konga. “Ko e Tohi Tapú ʻa e tohi fakataua lelei taha ʻo e taʻú, ʻi he taʻu kotoa pē,” ko e lau ia ʻa ha līpooti ʻi he makasini The New Yorker.

• Kuo liliu ʻa e Tohi Tapú fakakātoa pe ko hano konga, ki he lea laka hake he 2,400. Ko ha konga ʻo e Tohi Tapú ʻoku ala maʻu ia ʻi he ngaahi lea ʻoku leaʻaki ʻe he peseti laka hake he 90 ʻo e faʻahinga ʻo e tangatá.

• Ko e vaeua nai ʻo e kau hiki Tohi Tapú naʻe ʻosi ʻenau hiki tohí ki muʻa ʻi he fanauʻi fakatouʻosi ʻo Konifusiō ko e Siaina poto ʻiloá mo Sitaata Kautama ko e tokotaha fokotuʻu ʻo e Lotu-Putá.

• ʻOku tākiekina lahi ʻe he Tohi Tapú ʻa e ʻātí, ʻo kau ai ʻa e niʻihi ʻo e ngaahi tā valivali, fasi mo e faʻu-tohi lahi taha ʻi he māmaní.

• Kuo haofaki mai ʻa e Tohi Tapú ʻi he ngaahi fakataputapui ʻa e ngaahi puleʻangá, tutu ʻe he kau fakafepaki fakalotú mo e ngaahi ʻohofi ʻe he kau fakaangá. ʻOku ʻikai ha toe tohi kehe ʻi he hisitōliá kuo fehangahangai mo e fakafepaki lahi ange—pea haofaki mei ai.

ʻIkai ʻoku tuʻu-ki-muʻa ʻa e ngaahi moʻoniʻi meʻa kuo lave ki ai ʻi ʻolungá? Kae kehe, ko e ngaahi fakaikiiki mo e ngaahi fika fakaueʻilotó pē ʻoku ʻikai ke fakamoʻoniʻi ai ʻoku alafalalaʻanga ʻa e Tohi Tapú. Te tau hoko atu leva ʻo sivisiviʻi ʻa e ngaahi ʻuhinga ʻe nima ʻoku tuipau ai ʻa e kakai ʻe laui miliona ʻoku taau ʻa e Tohi Tapú ke falala ki ai.