Talatupuʻa pe Moʻoni?

Ko e mātuʻa Kalisitiane ko Tīmoté naʻá ne fakahinohinoʻi ʻa e faʻahinga ko ia naʻe mahuʻingaʻia ʻi he lotu ki he ʻOtua moʻoní ke ʻoua te nau tokanga ki he “meʻa kehe” mo e “ngaahi talatupuʻa.” (1 Timote 1:3, 4) ʻOku fiemaʻu he ʻahó ni ʻa e fakatokanga peheé? ʻIo, koeʻuhi ko e ngaahi fakakaukau hala fekauʻaki mo e Tohi Tapú mo ʻene ngaahi akonakí ʻoku fakatafokiʻi ai ʻa e kakaí mei he lotu moʻoní. ʻOku ʻi lalo ʻa e ngaahi fakakaukau ʻoku tui ki ai ʻa e kakai tokolahi fekauʻaki mo e Tohi Tapú. Fakatokangaʻi ʻa e ngaahi fakamatala mei he Tohi Tapú tonu. ʻOku lava ke tokoniʻi koe ʻe he ngaahi meʻá ni ke ke fakamavaheʻi ʻa e talatupuʻá mei he moʻoní.

◼ Talatupuʻa: Ko e ngaahi mana ʻi he Tohi Tapú ʻoku ʻikai ala lava.

Moʻoni: ʻOku lahi ʻa e meʻa ke ako ʻe he tangatá fekauʻaki mo e fakatupu ʻa e ʻOtuá. ʻOku ʻikai ha faisaienisi ʻe lava ke ne fakamatalaʻi kakato ʻa e kalāvité, fakapapauʻi tonu mātē ʻa e fanga kiʻi kongokonga kotoa ʻo ha ʻātomi, pe fakamatalaʻi ʻa e natula tonu ʻo e taimí. “He te ke ilo ae Otua i he faa eke? he te ke faa kumi ke ilo haohaoa ae Mafimafi?” (Siope 11:7, PM) Koeʻuhi ko e fakatupú ʻoku mahulu atu ia ʻi heʻetau mahino kakató, ko e kau saienisi lavameʻá ʻoku nau hoko ʻo tokanga lahi fekauʻaki mo hono leaʻaki ha meʻa pau ʻoku ʻikai ala lava.

◼ Talatupuʻa: Ko e lotu kotoa pē ʻoku taki atu ai ki he ʻOtuá.

Moʻoni: “Kapau te mou nofo maʻu ʻi heʻeku akonaki,” ko e lea ia ʻa Sīsuú, “ko ʻeku kau ako moʻoni kimoutolu; pea ʻe faifai pea mahino kiate kimoutolu ʻa e moʻoni, pea ʻe fakatauʻatāina ʻa kimoutolu ʻe he moʻoni.” (Sione 8:31, 32) Kapau ko e lotu kotoa pē ʻoku taki atu ai ki he ʻOtuá, ʻe fiemaʻu ke toe fakatauʻatāinaʻi ʻa honau kau mēmipá? Ko hono moʻoní, naʻe akoʻi ʻe Sīsū ko ha kakai tokosiʻi pē ʻoku nau ʻi he “hala, ʻoku fakatau ki he moʻui.”—Mātiu 7:13, 14.

◼ Talatupuʻa: ʻOku ʻalu ʻa e kakai lelei kotoa pē ki hēvani ʻi heʻenau maté.

Moʻoni: “ʻE maʻu ʻa e fonua ʻe he faʻa kataki; pea te nau fefiefiaʻi ʻi he melino lahi. Ko haʻa fai totonu te nau maʻu ʻa e fonua, pea te nau nofo ai ʻo tuputupuʻa. Tatali kia Sihova, pea tauhi hono ʻalunga, pea te ne hakeakiʻi koe ke maʻu ʻa e fonua.” (Sāme 37:11, 29, 34) Ko e faʻahinga faitōnunga pē ʻe toko 144,000 ʻo e tangatá te nau ō ki hēvaní. Ko ʻenau ngāue kuo ʻomai ʻe he ʻOtuá ke “nau Hau ʻi mamani.”—Fakahā 5:9, 10; 14:1, 4.

◼ Talatupuʻa: Ko e “Fuakava Motuʻá” ʻoku ʻikai kei ʻaonga ia ki he kau Kalisitiané.

Moʻoni: “Ko e potu Folofola kotoa pe ne fakamanava mei he ʻOtua, ʻoku ʻaonga.” (2 Timote 3:16, 17) “ʻIlonga ha meʻa naʻe tohi muʻa naʻe tohi moʻotau akonekina; koeʻuhi ko e meʻa ʻi he fakakataki mo e poupou ʻoku fai ʻe he folofola ke tau maʻu ai ʻa e ʻamanaki lelei.” (Loma 15:4) Ko e “Fuakava Motuʻa,” ʻa e Ngaahi Konga Tohi Tapu Faka-Hepeluú, ko ha matavai mātuʻaki mahuʻinga ia ʻo e fakahinohino fakalaumālie pea ʻoku ʻomai ai kia kitautolu ʻa e makatuʻunga ki he tui ki he “Fuakava Foʻou,” ʻa e Ngaahi Konga Tohi Tapu Faka-Kalisi Kalisitiané.

◼ Talatupuʻa: Ko e konga lahi ʻo e tohi Senesí, ʻo kau ai ʻa e fakamatala fekauʻaki mo ʻĀtama mo ʻIví, ko e talanoa faʻu.

Moʻoni: Ko e laine hohoko ʻo Sīsuú ʻo foki ai kia ʻĀtama naʻe hiki ia ʻe he tokotaha-tohi Kōsipeli ko Luké. (Luke 3:23-38) Kapau ko e tohi Senesí ko e talatupuʻa, ko fē leva ʻi he laine hohokó ʻe ngata ai ʻa e ngaahi hingoa moʻoní pea kamata ai ʻa e ngaahi hingoa ʻoku taku ʻoku fakaetalatupuʻá? Ko Sīsū, ʻa ia naʻe ʻi hēvani ki muʻa ke ne haʻu ki māmaní, naʻá ne tui ki he meʻa naʻe hiki ʻi he tohi Senesí, ʻo kau ai ʻa e fakamatala kia ʻĀtama mo ʻIví. (Mātiu 19:4-6) Ko ia ai, ke fehuʻia ʻa e tohi Senesí ko hono fakavaivaiʻi ia ʻa e tuʻunga falalaʻanga ʻo Sīsuú tonu, pea pehē ki he kau hiki Tohi Tapu tokolahi.—1 Kalonikali 1:1; 1 Kolinito 15:22; Siutasi 14.