Ko e Hā ʻa e Loto-Mafasia?

Ko e loto-mafasiá ko e anga ia ʻa e fakafeangai ho sinó ki ha tuʻunga faingataʻa. ʻOku tuku ange atu ai ʻe ho ʻutó ʻa e ngaahi hōmone lahi ki he ngaahi konga kotoa ho sinó. ʻOku ʻai ai heni ke tā vave ho mafú, puleʻi ʻa e māʻolunga ho totó, fakalahi pe fakasiʻisiʻi ʻa e lahi ʻo e ʻea ʻi ho maʻamaʻá pea fakafefekaʻi ho ngaahi uouá. Ki muʻa peá ke ʻiloʻi kakato ʻa e meʻa ʻoku hokó, ʻoku ʻosi mateuteu ho sinó ke ngāue. ʻI he mahili atu ha tuʻunga fakalotomafasia, ʻoku toe foki ho sinó mei heʻene “tuʻu mateuteú” ki he tuʻunga anga-mahení.

LELEI MO E KOVI ʻO E LOTO-MAFASIÁ

Ko e loto-mafasiá ko ha fakafeangai fakanatula ia ʻokú ne ʻai koe ke ke malava ʻo fekuki mo e ngaahi tuʻunga faingataʻá pe fakatuʻutāmakí. Ko e fakafeangai fakanatula ko ení ʻoku kamata ia mei ho foʻi ʻutó. Ko hono leleí he ʻokú ne ueʻi koe ke ke ngāue pe fakafeangai vave ki ha meʻa. Ko ha loto-hohaʻa ʻoku lava ke ne toe tokoniʻi koe ke aʻusia hoʻo ngaahi taumuʻá pe fakahoko lelei ange ha meʻa, ngalingali ʻi he lolotonga ʻa e siví, ko ha fakaʻekeʻeke ki ha ngāue pe kau ki ha feʻauhi.

Kae kehe, ko e loto-mafasia tōtuʻa ʻi ha vahaʻa taimi loloá ʻe lava ke ne uesia koe. ʻI he taimi ʻoku “tuʻu mateuteu” hokohoko ai ho sinó ke fakafeangai ki ha meʻa, ʻe kamata nai ke uesia fakaesino, fakaeongo mo fakaʻatamai koe. Ko hoʻo tōʻongá, kau ai ʻa e anga hoʻo fakafeangai ki he niʻihi kehé, ʻe liliu nai. Ko e loto-mafasiá ʻoku lava foki ke taki atu ki hono ngāuehalaʻaki ʻa e ʻolokaholó, faitoʻo kona tapú mo e foʻiʻakaú, kai ʻo fuʻu hulú, ifi tapaka mo e ngaahi tōʻonga kovi kehe. ʻE taki atu nai ki he loto-taʻotaʻomia, ongosia lahi fakaʻulia pe fakakaukau taonakita.

Neongo heʻikai nai ke uesia ʻe he loto-mafasiá ʻa e tokotaha kotoa ʻi he founga tatau, ʻe lava ke ne fakatupunga ʻa e ngaahi mahaki kehekehe. Pea ʻe lava ke ne uesia ʻa e meimei konga kotoa ʻo e sinó.