ʻUhinga ʻOku Mahuʻinga Ai ʻa e Talí

Ko e hā ʻoku mahuʻinga ai pe ʻoku ʻi ai ha Tokotaha-Fakatupu? Kapau ʻoku fakatuipauʻi koe ʻe he ngaahi fakamoʻoní ʻoku ʻi ai ha ʻOtua māfimafi-aoniu, te ke sivisiviʻi ʻa e fakamoʻoni naʻá ne fakamānavaʻi ʻa e Tohi Tapú. Pea kapau ʻokú ke falala ki he meʻa ʻoku leaʻaki ʻe he Tohi Tapú, te ke maʻu ʻaonga leva ʻi he ngaahi founga ko ení.

ʻE mohu ʻuhinga hoʻo moʻuí

ʻOKU PEHĒ ʻE HE TOHI TAPÚ: “[Ko e ʻOtuá] naʻe ʻikai te ne tuku taʻeʻomai ha fakamoʻoni fekauʻaki mo ia tonu ʻi heʻene faileleí, ʻaki hono foaki mai kiate kimoutolu ʻa e ʻuha mei he langí mo e ngaahi faʻahitaʻu mahu, ʻo ne fakamākona kimoutolu ʻaki ʻa e meʻakai pea fakafonu homou lotó ʻaki ʻa e fiefia.”—Ngāue 14:17.

KO HONO ʻUHINGÁ: Ko e meʻa kotoa pē ʻokú ke fiefia ai ʻi natula ko ha meʻaʻofa ia mei he Tokotaha-Fakatupú. Te ke houngaʻia lahi ange ʻi he ngaahi meʻaʻofa ko ení ʻi hoʻo ʻiloʻi ʻa e lahi ʻo e tokanga atu ʻa e Tokotaha-Foakí.

Maʻu ʻa e tataki falalaʻanga ki he moʻuí

ʻOKU PEHĒ ʻE HE TOHI TAPÚ: “Te ke mahinoʻi leva ʻa e māʻoniʻoní mo e totonú pea mo e faitotonú, ʻa e ʻalunga fakakātoa ʻo e meʻa ʻoku leleí.”—Palōveepi 2:9.

KO HONO ʻUHINGÁ: ʻI he tuʻunga ko ho Tokotaha-Fakatupu, ʻoku ʻiloʻi ʻe he ʻOtuá ʻa e meʻa te ke fiefia aí. ʻI hoʻo sivisiviʻi ʻa e Tohi Tapú, te ke ako ai ʻa e ngaahi lēsoni ʻe lava ke ke maʻu ʻaonga ai.

Maʻu ʻa e tali ki hoʻo ngaahi fehuʻí

ʻOKU PEHĒ ʻE HE TOHI TAPÚ: “Te ke maʻu ai ʻa e ʻiloʻi ʻo e ʻOtuá.”—Palōveepi 2:5.

KO HONO ʻUHINGÁ: Ko hono ʻiloʻi ʻoku ʻi ai ha Tokotaha-Fakatupú ʻe tokoni ia ke ke maʻu ʻa e tali ki he ngaahi fehuʻi mahuʻinga, hangē ko e: Ko e hā ʻa e taumuʻa ʻo e moʻuí? Ko e hā ʻoku lahi fau ai ʻa e faingataʻá? Ko e hā ʻoku hoko ʻi he taimi ʻoku tau mate aí? Te ke maʻu ha tali fakafiemālie ʻi he Tohi Tapú.

Hanga ki he kahaʻú mo e ʻamanaki

ʻOKU PEHĒ ʻE HE TOHI TAPÚ: “‘ʻOku ou ʻiloʻi lelei ʻa e ngaahi fakakaukau ʻoku ou fakakaukau ʻaki kiate kimoutolú,’ ko e fakahaaʻi ia ʻe Sihová, ‘ko e ngaahi fakakaukau ʻo e melino, ʻo ʻikai ko ha kovi, ke ʻoatu kiate kimoutolu ha kahaʻu pea mo ha ʻamanaki.’”—Selemaia 29:11.

KO HONO ʻUHINGÁ: ʻOku talaʻofa ʻa e ʻOtuá te ne toʻo ʻosi atu ʻi he kahaʻú ʻa e fulikivanú, faingataʻaʻiá, pea naʻa mo e maté. ʻI hoʻo falala ki he talaʻofa ʻa e ʻOtuá, ko hoʻo ʻamanaki ki ha kahaʻu peheé te ne tokoniʻi koe ke fekuki loto-toʻa mo e ngaahi palopalema fakaʻahó.

Founga kuo maʻu ʻaonga ai ʻa e niʻihi ʻi heʻenau tui ki ha Tokotaha-Fakatupú

“ʻOku ou ofoofo maʻu pē ʻi he sio ki he anga hono tokoniʻi kimautolu ʻe he ʻOtuá ʻi he tafaʻaki kehekehe ʻo e moʻuí. ʻOkú ne tokoniʻi kimautolu ke ʻiloʻi ʻa e meʻa ke fakamuʻomuʻa ʻi he moʻuí, ke fakaleleiʻi ha fetōkehekeheʻaki, pea hoko ko e kaumeʻa ʻo e ʻOtuá.”—Cyndi, ʻAmelika.

“Ko ʻeku tui ki ha Tokotaha-Fakatupú ʻokú ne ʻai ʻeku moʻuí ke fiemālie mo fakakoloa. ʻOku ueʻi ai ʻeku fakakaukaú, he ʻoku ʻikai ke toe ngata ʻa e ngaahi meʻa fakaofo ʻe lava ke u ako fekauʻaki mo ia, ko ʻene fakatupú, pea mo ʻene Folofolá.”—Elise, Falanisē.

“ʻOku ou fiefia ange ʻi heʻeku ngāueʻaki ʻa e meʻa ʻoku akoʻi mai ʻe hotau Tokotaha-Fakatupú ʻi he Tohi Tapú. ʻOku tokoni ia ke siʻisiʻi ange ai ʻeku fakaangá, ke u toe tokanga ange, pea moʻui fiemālie ange. ʻOku toe tokoni ia ke u hoko ko ha tamai lelei ange.”—Peter, Netaleni.

“Ki muʻá, ko ʻeku moʻuí ko e kai pē, mohe, pea fakatovave ke maʻu ʻa e taimi ngāué. Naʻe mafasia ʻeku moʻuí! ʻI he taimí ni, ʻoku ou vakai ki he moʻuí ko ha meʻaʻofa fakaofo—ko ha meʻa ke fiefia ai mo fakamahuʻingaʻi.”—Liz, ʻEsitōnia.

“ʻOku ou faʻa loto-moʻua. Ka ko hono ʻiloʻi ʻe ngata ʻa e fulikivanú, fakamaau taʻetotonú mo e faingataʻaʻiá ʻokú ne tokoniʻi au ke u fekuki mo ia.” —Adrien, Falanisē.