Ko e Hā Kuo Hoko ki he Fakaʻapaʻapa ki he Niʻihi Kehé?

ʻUHINGA ʻOKU MAHUʻINGA AI ʻA E FAKAʻAPAʻAPA KI HE NIʻIHI KEHÉ

Ko e fakaʻapaʻapaʻi ʻa e niʻihi kehé ʻokú ne fakasiʻisiʻi ai ʻa e palopalemá pea taʻotaʻofi ha tuʻunga mei haʻane ʻalu ke toe kovi ange.

ʻOku pehē ʻe ha palōveepi ʻi he Tohi Tapú: “Ko ha tali malū ʻoku lolou ai ʻa e tōlilí, ka ko ha lea fefeka ʻokú ne langaʻi ʻa e ʻitá.” (Palōveepi 15:1) Ko e ngaahi lea mo e tōʻonga taʻefakaʻapaʻapá ʻokú ne tafunaki ʻa e ʻitá pea faʻa iku atu ia ki he ngaahi ola fakatupu maumau.
Naʻe pehē ʻe Sīsū: “ʻOku mei he meʻa ʻoku hulu ʻi he lotó ʻa e meʻa ʻoku leaʻaki ʻe he ngutú.” (Mātiu 12:34) ʻI heʻetau lea taʻefakaʻapaʻapá, ʻoku tau fakahaaʻi atu ai ʻa e anga ʻetau ongoʻi moʻoni ki he kakai ʻoku kehe honau matakalí, anga-fakafonuá pe puipuituʻa fakasōsialé meiate kitautolú.

ʻI ha savea ki muí ni mai ko e pēseti ʻe 65 ʻo e kakai laka hake ʻi he toko 32,000 ʻi he ngaahi fonua ʻe 28, naʻa nau pehē kuo teʻeki ai ke nau sio ʻi ha taʻefakaʻapaʻapa lahi pehē ʻi he kakaí.

MEʻA ʻE LAVA KE KE FAÍ

Tatau ai pē pe ʻi he ʻapiakó pe ʻi he ngāueʻangá, fakaʻapaʻapa ki he kakai kotoa pē—naʻa mo e taimi ʻoku ʻikai ke mou loto-tatau ai ki ha meʻa. Fakapapauʻi ʻa e meʻa ʻe lava ke ke loto-tatau ai mo kinautolú. Te ne tokoniʻi ai koe ke fakaʻehiʻehi mei he hoko ʻo fakaangá pe faifakamāú.

“Tuku hoʻomou faifakamāú koeʻuhi ke ʻoua naʻa fakamāuʻi ai kimoutolu.”—Mātiu 7:1.

Fai ki he niʻihi kehé ʻa e meʻa ʻokú ke loto ke nau fai atu kiate koé. Kapau ʻokú ke fakaʻatuʻi pea faitotonu ki he niʻihi kehé, ngalingali te nau fai atu ʻa e meʻa tatau.

“Hangē tofu pē ko ia ʻoku mou loto ke fai atu ʻe he kakaí kiate kimoutolú, fai pehē pē kiate kinautolu.”—Luke 6:31.

Faʻa fakamolemole. Sio fakalaka atu ʻi he ngaahi lea mo e tōʻonga taʻeʻofa ʻa e niʻihi kehé.

“Ko e vavanga fakaefakakaukau ʻa ha tangata ʻoku fakatuotuai moʻoni ai ʻa ʻene ʻitá, pea ko e meʻa fakaʻofoʻofa ia kiate ia ʻene tukunoaʻi ha fakatupu ʻita.”—Palōveepi 19:11.

ʻI loto ʻi he Fale Fakatahaʻanga ʻa e Kau Fakamoʻoni ʻa Sihová ʻi he ki muʻa ʻa e fakatahá. Ko e kakai mei he ngaahi taʻumotuʻa mo e puipuituʻa kehekehe ʻoku nau fetalitalileleiʻaki mo fetalanoaʻaki.

MEʻA ʻOKU MAU FAÍ

ʻI he ngaahi feituʻu ʻoku nofo mo ngāue ai ʻa e Kau Fakamoʻoni ʻa Sihová ʻoku nau poupouʻi ʻa e fakaʻapaʻapa ki he niʻihi kehé.

ʻOku mau tuʻuaki ʻa e ako Tohi Tapu taʻetotongi ki he kakai kotoa, ka ʻoku ʻikai ke mau fakamālohiʻi ʻemau tuí pe fakakaukaú ki he niʻihi kehé. ʻI hono kehé, ʻoku mau feinga ke ngāueʻaki ʻa e faleʻi ʻa e Tohi Tapú ʻaki hono vahevahe atu ʻemau pōpoakí ʻi he “loto anga-malū mo e fakaʻapaʻapa loloto.”—1 Pita 3:15; 2 Tīmote 2:24.

ʻOku ʻikai ke mau filifilimānako pea ʻoku mau talitali lelei ki heʻemau ngaahi fakatahá ʻa e kakai mei he ngaahi puipuituʻa kehekehe ʻa ia ʻoku nau loto ke ako ʻa e Tohi Tapú. ʻOku mau feinga ke hoko ʻo anga-kātaki pea “fakaabaaba ki he kakai kotoabe.”—1 Pita 2:17, Paaki Motuʻa.

ʻOku mau fakaʻapaʻapa ki he mafai ʻo e puleʻanga ʻoku mau nofo aí. (Loma 13:1) ʻOku mau talangofua ki he laó pea totongi ʻa e ngaahi tukuhaú. Pea neongo ʻoku mau tuʻu-ʻatā fakapolitikale, ʻoku mau fakaʻapaʻapaʻi ʻa e totonu ʻa e niʻihi kehé ke fai ‘enau fili ʻi he ngaahi meʻa fakapolitikalé.