Ko e ʻUluaki Tangatá mo e Fefiné

KO E HĀ ʻa e meʻa ʻoku kehe ʻi he fakatātā ko ʻení? ʻIo, ko e kakai ʻoku hā ai. Ko e ʻuluaki tangatá mo e fefiné ia. Ko hai naʻá ne ngaohi kinauá? Ko e ʻOtuá. ʻOkú ke ʻilo hono huafá? Ko Sihova. Pea naʻe fakahingoa ʻa e tangatá mo e fefiné ko ʻĀtama mo ʻIvi.

Ko e anga ʻeni hono ngaohi ʻo ʻĀtama ʻe Sihova ko e ʻOtuá. Naʻá ne toʻo ha efu mei he kelekelé pea naʻá ne ngaohi mei ai ha sino haohaoa, ko e sino ʻo ha tangata. Peá ne toki hō ki he avaʻi ihu ʻo e tangatá, pea naʻe moʻui leva ʻa ʻĀtama.

Naʻe ʻi ai ʻa e ngāue naʻe tuku ʻe Sihova ko e ʻOtuá ke fai ʻe ʻĀtama. Naʻá ne tala ange kia ʻĀtama ke ne fakahingoa ʻa e faʻahinga manu kotoa pē. Naʻe nofo nai ʻa ʻĀtama ʻo fakasio ʻi ha taimi lahi ki he fanga manú koeʻuhi ka ne lava ke ʻai ʻa e hingoa lelei taha kiate kinautolu kotoa pē. Lolotonga ʻa e taimi naʻe fakahingoa ai ʻe ʻĀtama ʻa e fanga manú naʻá ne kamata ke fakatokangaʻi ha meʻa. ʻOkú ke ʻilo pe ko e hā nai ia?

Naʻe ʻi ai ʻa e ngaahi hoa ki he fanga manu kotoa pē. Naʻe ʻi ai ʻa e ngaahi ʻelefānite tangata mo e ʻelefānite fefine, pea naʻe ʻi ai foki mo e laione tangata mo e laione fefine. Ka ko ʻĀtama naʻe ʻikai hano hoa. Ko ia naʻe ʻai ʻe Sihova ʻa ʻĀtama ke mohe maʻu, peá ne toʻo hono hui vakavaka ʻe taha. Naʻe ngāueʻaki ʻe Sihova ʻa e hui vakavaka ko ení ke ngaohi ha fefine kia ʻĀtama, pea naʻe hoko ia ko hono uaifi.

Ko e toki fiefia ē ka ko ʻĀtama! Pea ke fakakaukau atu ki he fiefia ʻa ʻIvi ʻi hono ʻai ia ke nofo ʻi ha ngoue mātuʻaki fakaʻofoʻofa pehē fau! Naʻe toki malava ke na maʻu ha fānau pea nofo fakataha ʻi he fiefia.

Naʻe fiemaʻu ʻe Sihova ke moʻui taʻengata ʻa ʻĀtama mo ʻIvi. Naʻá ne fiemaʻu kinaua ke na ngaohi ʻa e māmaní kotoa ke fakaʻofoʻofa ʻo hangē pē ko e ngoue ko ʻĪtení. Ko e toki fiefia ē ʻa ʻĀtama mo ʻIvi ʻi heʻena fakakaukau atu ke na fai ʻa e meʻá ni! Kapau naʻá ke ʻi ai te ke fie kau ʻi he ngaohi ʻo e māmaní ko ha ngoue fakaʻofoʻofá? Ka naʻe ʻikai ke fuoloa ʻa e fiefia ʻa ʻĀtama mo ʻIví. Tau sio pe ko e hā hono ʻuhingá.