Ko e Foha Lelei, mo e Foha Kovi

SIO ange kia Keini mo ʻĒpeli. Kuó na lalahi. Naʻe hoko ʻa Keini ko ha tokotaha faama. Naʻá ne tō ʻa e faʻahinga ʻakau ʻo hangē ko e uite, ʻakau fua mo e vesitapolo.

Naʻe hoko ʻa ʻĒpeli ko ha tokotaha tauhi-sipi. Naʻá ne saiʻia ke tokangaʻi ʻa e fanga kiʻi lamí. Naʻa nau tupu hake ʻo hoko ko e fanga sipi lalahi, ko ia naʻe ʻikai fuoloa kuo maʻu ʻe ʻĒpeli ha tākanga sipi ke ne tokangaʻi.

ʻI he ʻaho ʻe taha naʻe fai ʻa e foaki meʻaʻofa ʻe Keini mo ʻĒpeli ki he ʻOtuá. Naʻe ʻomai ʻe Keini ʻa e ngaahi fua mei he ngoue naʻá ne toó. Pea naʻe ʻomai ʻe ʻĒpeli ʻa e sipi lelei taha naʻá ne maʻú. Naʻe fiemālie ʻa Sihova ʻia ʻĒpeli mo ʻene meʻaʻofá. Ka naʻe ʻikai ke fiemālie ia kia Keini mo ʻene meʻaʻofá. ʻOkú ke ʻilo hono ʻuhingá?

Naʻe ʻikai ke ngata pē ʻi he lelei ange ʻa e meʻaʻofa ʻa ʻĒpelí ʻi he meʻaʻofa ʻa Keiní. Ko hono ʻuhingá he ko ʻĒpeli ko e tangata lelei. Naʻá ne ʻofa kia Sihova pea mo hono tokouá. Ka naʻe kovi ʻa Keini; naʻe ʻikai ʻofa ia ki hono tokouá.

Ko ia naʻe tala ʻe he ʻOtuá kia Keini ʻoku totonu ke liliu ʻene ngaahi foungá. Ka naʻe ʻikai ke tokanga ki ai ʻa Keini. Naʻá ne ʻita lahi koeʻuhi he naʻe saiʻia ange ʻa e ʻOtuá ʻia ʻĒpeli. Ko ia naʻe tala ange ʻe Keini kia ʻĒpeli, ‘Haʻu ke ta ō ki ʻuta.’ ʻI heʻena ʻi ai toko ua pē, naʻe taaʻi ʻe Keini hono tokoua ko ʻĒpelí. Naʻá ne taaʻi lahi ʻo ne mate ai. ʻIkai ko ha meʻa fakalilifu ʻeni ke fai ʻe Keini?

Neongo naʻe mate ʻa ʻĒpeli, ʻoku kei manatuʻi pē ia ʻe he ʻOtuá. Naʻe lelei ʻa ʻĒpeli, pea heʻikai ʻaupito ke ngalo ha tangata pehē ʻia Sihova. Ko ia ʻe ʻi ai ha ʻaho ʻe toe fakafoki moʻui mai ʻa ʻĒpeli ʻe Sihova ko e ʻOtuá. ʻI he taimi ko iá heʻikai ʻaupito ke toe mate ʻa ʻĒpeli ia. ʻE lava ke ne moʻui ʻi heni ʻi he māmaní ʻo taʻengata. ʻIkai ʻe hoko ko e meʻa lelei ke hoko ʻo maheni mo e faʻahinga ʻo hangē ko ʻĒpelí?

Ka ʻoku ʻikai ke fiemālie ʻa e ʻOtuá ki he faʻahinga ʻo hangē ko Keiní. Ko ia ʻi he ʻosi hono tāmateʻi ʻe Keini ʻa hono tokouá, naʻe tautea ia ʻe he ʻOtuá ʻaki hono fekau ia ke ʻalu ki he feituʻu mamaʻo mei he toenga ʻo e fāmilí. ʻI he ʻalu ʻa Keini ʻo nofo ʻi he feituʻu kehe ia ʻo e māmaní, naʻá ne ʻalu mo e taha ʻo hono ngaahi tuofāfiné, pea naʻe hoko ia ko hono uaifi.

Faifai atu pē naʻe kamata ke maʻu ʻe Keini mo hono uaifí ha fānau. Ko e ngaahi foha mo e ngaahi ʻofefine kehe ʻo ʻĀtama mo ʻIví naʻa nau mali, pea nau toe maʻu mo e fānau. Naʻe ʻikai ke fuʻu fuoloa kuo tokolahi ʻa e kakai he māmaní. Tau ako ange ʻo fekauʻaki mo ha niʻihi ʻo kinautolu.