Ko ʻĒpalahame—Ko e Kaumeʻa ʻo e ʻOtuá

KO E taha ʻo e ngaahi feituʻu naʻe ʻalu ʻa e kakaí ʻo nofo ai he hili ʻa e Lōmakí naʻe ui ko ʻUa. Naʻe hoko ko ha kolo mahuʻinga ia pea naʻe ʻi ai ha ngaahi ʻapi lelei. Ka ko e kakai ʻi aí naʻa nau lotu ki he ngaahi ʻotua loi. Ko e meʻa ia naʻa nau toe fai foki ʻi Pēpeli. Ko e kakai ʻo ʻUa mo Pēpelí naʻe ʻikai te nau hangē ko Noa mo hono foha ko Semí, ʻa ia naʻá na kei tauhi pē kia Sihova.

Faifai atu pē, hili ʻa e taʻu ʻe 350 mei he lōmakí, naʻe mate ʻa e tangata angatonu ko Noá. Naʻe ʻosi pē ʻa e taʻu ʻe ua mei ai pea fāʻeleʻi ʻa e tangata ʻoku hā ʻi he fakatātā ko ʻení. Ko e tangata mātuʻaki makehe ia ki he ʻOtuá. Ko hono hingoá ko ʻĒpalahame. Naʻe nofo ia mo hono fāmilí ʻi he kolo ko ia ko ʻUá.

ʻI he ʻaho ʻe taha naʻe tala ʻe Sihova ki ʻĒpalahame: ‘Hiki koe mei ʻUa mo ho ngaahi kāingá, pea ʻalu ki he fonua te u fakahā kiate koe.’ Naʻe talangofua ʻa ʻĒpalahame ki he ʻOtuá pea naʻá ne tuku ʻa e ngaahi lelei kotoa ʻo ʻUá? ʻIo, naʻá ne fai pehē. Pea koeʻuhi naʻe talangofua maʻu pē ʻa ʻĒpalahame ki he ʻOtuá naʻe hoko ai ia ʻo ʻiloa ko e kaumeʻa ʻo e ʻOtuá.

Naʻe ʻi ai mo e niʻihi ʻo e fāmili ʻo ʻĒpalahamé naʻa nau ʻalu fakataha mo ia ʻi heʻene mavahe mei ʻUá. Naʻe fai pehē ʻene tamai ko Telá. Naʻe fai pehē foki mo hono ʻilamutu ko Loté. Pea naʻe fai pehē mo e uaifi ʻo ʻĒpalahamé ko Sela. Faifai atu naʻa nau aʻu kotoa ai ki he feituʻu naʻe ui ko Hālani, ʻa ia naʻe mate ai ʻa Tela. Naʻa nau fuʻu mamaʻo ʻaupito mei ʻUa.

Naʻe ʻosi ha taimi siʻi mei ai pea hiki ʻa ʻĒpalahame mo hono fāmilí mei Hālani ki he fonua ko Kēnani. Naʻe pehē ai ʻe Sihova: ‘Ko e fonua eni te u foaki ki hoʻo fānaú.’ Naʻe nofo ʻa ʻĒpalahame ʻi Kēnani ʻi ha ngaahi teniti pē.

Naʻe kamata ke tokoniʻi ʻe he ʻOtuá ʻa ʻĒpalahame pea ko ia ai, naʻá ne maʻu ha ngaahi tākanga sipi lahi mo e fanga manu kehe pea mo e kau sevāniti ʻe laui ngeau. Ka naʻe ʻikai ke ʻi ai haʻana fānau tonu mo Sela.

ʻI he taʻu 99 ʻa ʻĒpalahamé, naʻe pehē ʻe Sihova: ‘ʻOku ou talaʻofa kiate koe te ke hoko ko e tamai ʻo ha ngaahi puleʻanga.’ Ka naʻe malava fēfē ke hoko ʻa e meʻá ni, he naʻe fuʻu motuʻa ʻa ʻĒpalahame mo Sela ke toe maʻu ha fānau?