Naʻe ʻAhiʻahiʻi ʻe he ʻOtuá ʻa e Tui ʻa ʻĒpalahamé

ʻOKÚ KE sio ki he meʻa ʻoku fai heni ʻe ʻĒpalahamé? ʻOkú ne puke ha hele, pea ʻoku hangē ʻokú ne teu ke tāmateʻi hono fohá. Ko e hā hono ʻuhinga te ne fai ai iá? ʻUluaki, te tau sio pe naʻe anga-fēfē hono maʻu ʻe ʻĒpalahame mo Sela ʻa ʻena tamá.

Manatuʻi, naʻe talaʻofa ʻe he ʻOtuá kiate kinaua te na maʻu ha tamasiʻi. Ka naʻe hangē ʻe ʻikai ʻaupito malava eni, koeʻuhi he naʻe fuʻu motuʻa ʻa ʻĒpalahame mo Sela. Kaekehe, naʻe tui ʻa ʻĒpalahame ʻe malava pē ʻe he ʻOtuá ʻa e meʻa ʻoku hangē ʻe ʻikai malavá. Ko ia ko e hā naʻe hokó?

ʻI he hili ʻa hono fai ʻe he ʻOtuá ʻene talaʻofá pea ʻosi atu mo e taʻu kakato ʻe taha. Pea ʻi he taʻu 100 ʻa ʻĒpalahame pea taʻu 90 ʻa Selá, naʻá na maʻu ha pēpē tangata naʻe fakahingoa ko ʻAisake. Naʻe tauhi pē ʻe he ʻOtuá ʻene talaʻofá!

Ka ʻi he hoko ʻa ʻAisake ʻo lahi angé, naʻe ʻahiʻahiʻi ʻe Sihova ʻa e tui ʻa ʻĒpalahamé. Naʻá ne ui ia: ‘ʻĒpalahame!’ Pea tali ʻe ʻĒpalahame: ‘Ko au ʻeni!’ Pea toki pehē ʻe he ʻOtuá: ‘ʻE, ke ke ʻave ho fohá, ʻa ho foha pē taha, ko ʻAisake, pea ʻalu mo koe ki he moʻunga te u fakahā kiate koe. Pea tāmateʻi ho fohá ʻi ai ʻo foaki ia ko ha feilaulau.’

Naʻe fuʻu fakamamahi ʻa e ngaahi lea ko iá kia ʻĒpalahame, koeʻuhi he naʻe fuʻu ʻofa ʻaupito ʻa ʻĒpalahame ʻi hono fohá. Pea manatuʻi foki, naʻe talaʻofa ʻe he ʻOtuá ʻe nofo ʻa e fānau ʻa ʻĒpalahamé ʻi he fonua ko Kēnaní. Ka ʻe malava fēfē ke hoko ʻeni ʻo kapau ʻe mate ʻa ʻAisake? Naʻe ʻikai mahino ʻeni ia kia ʻĒpalahame, ka naʻá ne kei talangofua pē ki he ʻOtuá.

ʻI he aʻu ki he moʻungá, naʻe haʻi ʻe ʻĒpalahame ʻa ʻAisake ʻo hili ia ʻi he funga ʻōlita naʻá ne ngaohi. Peá ne toʻo hake ʻene helé ke tāmateʻi hono fohá. Ka ʻi he taimi pē ko iá naʻe ui mai ha ʻāngelo ʻa e ʻOtuá: ‘ʻĒpalahame, ʻĒpalahame!’ Pea tali ʻe ʻĒpalahame: ‘Ko au ʻeni!’

Naʻe pehē ʻe he ʻOtuá: ‘ʻOua te ke fakalaveaʻi ʻa e tamá, pe fai ha meʻa ki ai. ʻOku ou toki ʻilo ʻokú ke tui kiate au, koeʻuhi naʻe ʻikai te ke taʻofi meiate au ho fohá, ko ho foha pē taha.’

Ko e tui lahi ē naʻe maʻu ʻe ʻĒpalahame ki he ʻOtuá! Naʻá ne tui ʻoku ʻikai ha meʻa ʻe taʻemalava ʻe Sihova, pea ʻe toe lava ʻe Sihova ke fokotuʻu mai ʻa ʻAisake mei he maté. Ka naʻe ʻikai ko e finangalo moʻoni ia ʻo e ʻOtuá kia ʻĒpalahamé ke tāmateʻi ʻa ʻAisake. Ko ia naʻe ʻai ʻe he ʻOtuá ha sipi ke fihia ʻi he kiʻi ʻuluʻakau ofi ki ai, peá ne tala kia ʻĒpalahame ke faiʻaki ia ʻa e feilaulaú kae ʻikai ko hono fohá.