Naʻe Fehiʻa kia Siosifa ʻa Hono Ngaahi Tokouá

SIO ki he loto-mamahi mo e ʻikai ha ʻamanaki ʻa e tamasiʻi ko ʻení. Ko Siosifa ia. Naʻe toki fakatau atu ia ʻe hono ngaahi tokouá ki he kau tangata ko eni ko ʻenau fononga ki ʻIsipite. Naʻe hoko ai ʻa Siosifa ko e pōpula. Ko e hā naʻe fai ai kia Siosifa ʻa e meʻa ʻoku koví ni ʻe hono ngaahi tokoua tamai tahá? Koeʻuhi naʻa nau meheka kia Siosifa.

Naʻe fuʻu saiʻia lahi ʻa ʻenau tamai ko Sēkopé ʻia Siosifa. Naʻá ne fakahā ʻene leleiʻia ʻiate iá ʻaki ʻene ʻai ke ngaohi ha kote fakaʻofoʻofa moʻo Siosifa. ʻI he sio ʻa hono ngaahi taʻokete ʻe toko 10 ki he ʻofa pehē ʻa Sēkope ʻia Siosifá, naʻa nau kamata ke meheka mo fehiʻa kia Siosifa. Ka naʻe toe ʻi ai mo e ʻuhinga naʻa nau fehiʻa ai ʻiate iá.

Naʻe ʻi ai ʻa e ongo misi ʻa Siosifa. ʻI he ongo misi fakatouʻosi ʻa Siosifá naʻe punou ange ʻa hono ngaahi tokouá kiate ia. ʻI hono tala ʻe Siosifa ʻa e ongo misi ko ení ki hono ngaahi tokouá, naʻe toe lahi ange ai ʻenau fehiʻá.

ʻI ha ʻaho ʻe taha naʻe tokangaʻi ʻe he ngaahi taʻokete ʻo Siosifá ʻa e fanga sipi ʻa ʻenau tamaí, naʻe fekau ʻe Sēkope ʻa Siosifa ke ʻalu ʻo vakai pe ʻoku nau fēfē. ʻI he sio atu pē ʻa e ngaahi tokoua ʻo Siosifá ki heʻene haʻú, naʻe pehē ʻe honau niʻihi: ‘Tau tāmateʻi ia!’ Ka naʻe pehē ange ʻe Lūpeni ko e lahi tahá ia: ‘ʻIkai, ʻoua te mou fai ia!’ Ka naʻa nau puke ʻa Siosifa ʻo lī ia ki he vaikeli kuo maha. Pea naʻa nau toki tangutu leva ʻo fakakaukauʻi pe ko e hā ʻa e meʻa ʻe fai kiate iá.

Feʻunga mo e taimi ko ení naʻe fononga mai ai ha kau tangata ʻIsimeʻeli. Naʻe pehē ange ʻe Siuta ki hono ngaahi tokoua tamai tahá: ‘Tau fakatau atu ia ki he kau ʻIsimeʻelí.’ Pea ko e meʻa ia naʻa nau faí. Naʻa nau fakatau atu ʻa Siosifa ʻaki ʻa e konga siliva ʻe 20. Ko e toki meʻa māʻulalo mo taʻeanga-ʻofa eni!

Ko e hā leva ʻa e meʻa ʻe fakahā ʻe he ngaahi tokouá ni ki heʻenau tamaí? Naʻa nau tāmateʻi ha kosi pea toutou unu ʻa e kofu fakaʻofoʻofa ʻo Siosifá ʻi he toto ʻo e kosí. Pea nau toki ʻalu leva mo e kofú ki honau ʻapí ki heʻenau tamai ko Sēkopé ʻo nau pehē: ‘Naʻa mau maʻu ʻeni. Vakai mai ki ai, pe ʻoku ʻikai ko e kofu ʻeni ʻo Siosifá.’

Naʻe sio atu pē ʻa Sēkope ko e kofu ia ʻo Siosifá. Naʻá ne tangi ʻo pehē: ‘Ko e manu fekai naʻá ne tāmateʻi ʻa Siosifa.’ Pea ko e meʻa ia naʻe loto ʻa e ngaahi tokoua ʻo Siosifá ke tui ki ai ʻa ʻenau tamaí. Naʻe fuʻu loto-mamahi ʻaupito ʻa Sēkope. Naʻá ne tangi he ngaahi ʻaho lahi. Ka naʻe ʻikai ke mate ʻa Siosifa ia. Tau sio ange pe ko e hā ʻa e meʻa naʻe hoko ki ai ʻi he feituʻu naʻe ʻave ki aí.