Naʻe Tuku Pilīsone ʻa Siosifa

NAʻE taʻu 17 pē ʻa Siosifa ʻi hono ʻave ia ki ʻIsipité. Naʻe fakatau atu ia ʻi ai ki he tangata naʻe hingoa ko Pōtifa. Naʻe ngāue ʻa Pōtifa ki he tuʻi ʻo ʻIsipite, ʻa ia naʻe hingoa ko Felo.

Naʻe ngāue mālohi ʻaupito ʻa Siosifa ki hono pule ko Pōtifá. Ko ia ʻi he tupu ʻa Siosifa ʻo motuʻa angé, naʻe fokotuʻu ia ʻe Pōtifa ke pule ki hono falé kotoa. Ko ia ai, ko e hā ʻa e ʻuhinga ʻoku tuku pilīsone ai heni ʻa Siosifá? Ko hono ʻuhingá ko e uaifi ʻo Pōtifá.

Naʻe tupu hake ʻa Siosifa ko e tangata matamata-lelei, pea naʻe fiemaʻu ʻe he uaifi ʻo Pōtifá ke ne mohe mo ia. Ka naʻe ʻilo ʻe Siosifa ko e meʻa ia ʻoku hala, pea naʻe ʻikai te ne fai ia ʻe ia. Naʻe ʻita ʻaupito ʻa e uaifi ʻo Pōtifá. Ko ia ʻi he foki mai ʻa hono husepānití ki hona ʻapí, naʻá ne loi ange ki ai ʻo pehē: ‘ʻOku kovi ʻaupito ʻa Siosifa he naʻá ne feinga ke mohe mo au!’ Naʻe tui ʻa Pōtifa ki hono uaifí, pea naʻá ne ʻita ʻaupito kia Siosifa. Ko ia naʻá ne ʻai ke lī ia ki he pilīsoné.

Naʻe vave ʻa e ʻilo ʻe he tangata ʻokú ne tauhi ʻa e pilīsoné ko ha tangata lelei ʻa Siosifa. Ko ia naʻá ne tuku ʻa Siosifa ke ne tokangaʻi ʻa e kau pōpula kehé hono kotoa. Ki mui mai naʻe ʻita ʻa Felo ʻi heʻene tangata tauhi ipú mo ʻene tangata taʻo mā, pea naʻá ne tuku pilīsone mo kinaua. ʻI he pō ʻe taha naʻá na mohe ʻo na taki taha ha misi makehe, ka naʻe ʻikai te na ʻilo hono ʻuhinga ʻo ʻena misí. ʻI he ʻaho hono hokó naʻe pehē ʻe Siosifa: ‘Fakahā mai hoʻomo misí.’ Pea ʻi heʻena fakahā angé, naʻe fakamatala ʻe Siosifa ʻi he tokoni ʻa e ʻOtuá ki he ʻuhinga ʻo ʻena misí.

Naʻe pehē ʻe Siosifa ki he tangata tauhi ipú: ‘ʻI he ʻaho hono tolu mei heni ʻe fakaʻatā koe mei he pilīsoné, pea te ke toe hoko pē ko e tangata tauhi ipu ʻa Felo.’ Ko ia naʻe toe hoko atu ʻe Siosifa: ‘ʻI he taimi te ke ʻatā aí, tala kia Felo ʻo fekauʻaki mo au, pea tokoniʻi au ke u ʻatā mei he feituʻú ni.’ Ka naʻe pehē ʻe Siosifa ki he tangata taʻo mā: ‘ʻI he ʻaho ʻe tolu mei heni ʻe tuʻusi ʻe Felo ho ʻulú.’

ʻI he ʻaho hono tolú naʻe hoko ʻo hangē ko e fakamatala ʻa Siosifá. Naʻe ʻai ʻe Felo ke tuʻusi ʻa e ʻulu ʻo e tangata taʻo mā. Ka naʻe tuku ange ʻa e tangata tauhi ipú, pea toe kamata ngāue pē ki he tuʻí. Ka naʻe ngalo kotoa ʻa e meʻa ʻo fekauʻaki mo Siosifá ʻi he tangata tauhi ipú! Naʻe ʻikai te ne tala kia Felo ʻo fekauʻaki mo ia, pea naʻe kei nofo pilīsone ai pē ʻa Siosifa.