Naʻe Angatonu ʻa Siope ki he ʻOtuá

ʻOKÚ KE ongoʻi fakaʻofaʻia ʻi he tangata mahaki ko ʻení? Ko hono hingoá ko Siope, pea ko e fefiné ko hono uaifí ia. ʻOkú ke ʻilo pe ko e hā ʻokú ne tala ange kia Siopé? ‘Lau kovi ki he ʻOtuá ka ke mate.’ Tau sio ange pe ko e hā naʻá ne leaʻaki ai ha meʻa pehē, pea ko e hā hono ʻuhinga naʻe faingataʻaʻia lahi ai ʻa Siopé.

Ko Siopé ko e tangata angatonu naʻe talangofua kia Sihova. Naʻá ne nofo ʻi he fonua ko ʻUsa, ʻa ia naʻe ʻikai ke fuʻu mamaʻo mei Kēnani. Naʻe ʻofa lahi ʻaupito ʻa Sihova ʻia Siope, ka naʻe ʻi ai ʻa e tokotaha naʻe fehiʻa kiate ia. ʻOkú ke ʻilo pe ko hai?

Ko Sētane ko e Tēvoló. Manatuʻi, ko Sētané ko e ʻāngelo kovi ia ʻoku fehiʻa kia Sihova. Naʻá ne malava ke ʻai ʻa ʻĀtama mo ʻIvi ke na talangataʻa kia Sihova, pea naʻá ne fakakaukau te ne lava ke ʻai ʻa e tokotaha kotoa pē foki ke talangataʻa kia Sihova. Ka naʻá ne malava ke fai ʻa e meʻa ko ʻení? ʻIkai. Fakakaukau ange ki he kau tangata mo e kau fefine angatonu kuo tau ako ʻo kau ki ai. Ko e toko fiha te ke lava ke manatuʻi honau hingoá?

ʻI he hili ʻa e mate ʻa Sēkope mo Siosifa ʻi ʻIsipité, ko Siope ʻa e tangata naʻe angatonu taha ki he ʻOtuá ʻi he māmaní kotoa. Naʻe fiemaʻu ʻe Sihova ke ʻai ke ʻilo ʻe Sētane heʻikai te ne lava ʻo ʻai ʻa e tokotaha kotoa pē ke kovi, ko ia naʻá ne pehē: ‘Vakai kia Siope. Sio ki he lahi ʻo ʻene angatonu kiate aú.’

Naʻe kikihi ʻa Sētane: ‘ʻOkú ne angatonú koeʻuhi ko hoʻo tāpuakiʻi iá pea kuó ne maʻu ʻa e ngaahi meʻa lelei lahi. Ka ʻo kapau te ke toʻo ʻa e ngaahi meʻá ni, te ne lau kovi kiate koe.’

Ko ia naʻe pehē ʻe Sihova: ‘Sai. Toʻo kotoa ʻene ngaahi meʻá. Fai ʻa e meʻa kotoa ʻoku kovi ʻokú ke fie fai kia Siopé. Te tau toki sio pe te ne lau kovi kiate au. Kae ʻoua ʻe tāmateʻi ia.’

ʻUluakí, naʻe ʻai ʻe Sētane ha kau tangata ke kaihaʻasi ʻa e fanga pulu mo e fanga kāmeli ʻa Siopé, pea naʻe tāmateʻi mo ʻene fanga sipí. Pea naʻe toki tāmateʻi leva hono ngaahi foha mo e ngaahi ʻofefine ʻe toko 10 ʻi he afā. Ko hono hokó, naʻe taaʻiʻaki ʻe Sētane ʻa Siope ʻa e mahaki fakalilifú ni. Naʻe faingataʻaʻia lahi ʻaupito ʻa Siope. Ko hono ʻuhinga ia naʻe pehē ai ʻe he uaifi ʻo Siopé kiate ia: ‘Lau kovi ki he ʻOtuá ka ke mate.’ Ka naʻe ʻikai fai ia ʻe Siope. Naʻe toe haʻu foki ʻa e ngaahi kaungāmeʻa loi ʻe toko tolu pea nau tala kiate ia kuó ne moʻuiʻaki ha founga kovi. Ka naʻe kei tauhi angatonu pē ʻa Siope ia.

Naʻe ʻai ʻe he meʻá ni ke fiefia ʻaupito ai ʻa Sihova, pea ki mui mai naʻá ne tāpuakiʻi ʻa Siope ʻo hangē ko ia ʻokú ke sio ki ai ʻi he fakatātā ko ʻení. Naʻá ne fakamoʻui ia mei hono mahakí. Naʻe toe maʻu foki ʻe Siope haʻane fānau fakaʻofoʻofa ʻe toko 10, pea toe liunga ua ʻa e tokolahi ʻo ʻene fanga pulu, fanga sipi mo e fanga kāmeli ʻi he meʻa naʻá ne maʻu ki muʻa atú.

Te ke angatonu maʻu pē kia Sihova ʻo hangē ko Siopé? Kapau te ke pehē, ʻe tāpuakiʻi foki mo koe ʻe he ʻOtuá. Te ke malava leva ke moʻui taʻengata ʻi he taimi ʻe hoko ai ʻa e māmaní fakakātoa ʻo fakaʻofoʻofa hangē pē ko e ngoue ko ʻĪtení.