Naʻe Pule ha Tuʻi Kovi ʻi ʻIsipite

KO E kau tangata ko ʻení ʻoku nau fakamālohiʻi ʻa e kakaí ke nau ngāue. Sio ki he tangata ʻokú ne taaʻi ʻa e tokotaha ʻo e kau ngāué ʻaki ha uipi! Ko e kau ngāué ko e faʻahinga mei he fāmili ʻo Sēkopé, pea naʻe ui ko e kau ʻIsileli. Pea ko e kau tangata ʻoku nau fakamālohiʻi kinautolu ke nau ngāué ko e kau ʻIsipite. Naʻe hoko ʻa e kau ʻIsilelí ko e kau pōpula ki he kau ʻIsipité. Naʻe hoko fēfē ʻa e meʻa ko ʻení?

Naʻe nofo melino pē ʻa e fāmili tokolahi ʻo Sēkopé ʻi ʻIsipite ʻi he ngaahi taʻu lahi. Naʻe tokangaʻi kinautolu ʻe Siosifa, ʻa ia ko e tangata mahuʻinga taha ia ʻi ʻIsipite tukukehe ʻa Felo ko e tuʻí. Ka naʻe mate ʻa Siosifa ia. Pea naʻe hoko hake ha Felo foʻou ko e tuʻi ʻo ʻIsipite, pea naʻe ʻikai te ne saiʻia ʻi he kau ʻIsilelí.

Ko ia ko e Felo kovi ko ʻení naʻá ne ʻai ʻa e kau ʻIsilelí ko e kau pōpula. Pea naʻá ne fokotuʻu ha kau tangata anga-kovi mo anga-taʻeʻofa ke nau puleʻi kinautolu. Naʻa nau fakamālohiʻi ʻa e kau ʻIsilelí ke nau ngāue mālohi ke langa ʻa e ngaahi kolo ʻo Feló. Ka naʻe kei hokohoko atu pē ʻa e tupu ʻo tokolahi ʻa e kau ʻIsilelí. Faifai atu pē pea naʻe ilifia ʻa e kau ʻIsipité naʻa hoko ʻo fuʻu tokolahi mo fuʻu mālohi ʻa e kau ʻIsilelí.

ʻOkú ke ʻilo ʻa e meʻa naʻe fai ʻe Feló? Naʻá ne lea ki he kau fefine naʻa nau tokoni ki he ngaahi faʻē ʻIsilelí ʻi heʻenau fāʻeleʻi ʻenau fānaú ʻo ne pehē: ‘Kuo pau ke mou tāmateʻi ʻa e pēpē tangata kotoa pē ʻe fanauʻi mai.’ Ka ko e kau fefine lelei ʻeni ia, pea naʻe ʻikai te nau tāmateʻi ʻa e ngaahi pēpē.

Ko ia naʻe fai ʻe Felo ʻa e fekaú ni ki hono kakai kotoa pē: ‘Tāmateʻi ʻa e ngaahi pēpē tangata ʻIsileli kotoa pē. Tuku ke moʻui pē ʻa e ngaahi pēpē fefine kotoa.’ ʻIkai ko ha fekau fakalilifu ʻeni ke fai? Tau sio ange pe naʻe anga-fēfē ʻa e hao moʻui ʻa ha pēpē tangata ʻe taha.