Ko e ʻAkau Naʻe Ulo

NAʻE ʻalu ʻa Mōsese ʻo aʻu ki he moʻunga ko Hōlepí ke kumi ha mohuku ki heʻene fanga sipí. Naʻá ne sio ai ki ha ʻakau ʻoku ulo ka naʻe ʻikai ke vela ia!

Naʻe fakakaukau ʻa Mōsese, ‘Ko e meʻa ngali kehe eni. Te u ʻalu ʻo ofi ange pea ke u toe vakai lelei ange.’ ʻI heʻene fai pehē, naʻe ʻi ai ʻa e leʻo mei he loto ʻakaú naʻe pehē mai: ‘ʻOua te ke toe ʻunuʻunu ofi mai. Toʻo ho senitoló, koeʻuhi he ʻokú ke tuʻu ʻi ha feituʻu toputapu.’ Ko e ʻOtuá naʻe lea ʻo fakafou mai ʻi ha ʻāngelo, ko ia naʻe ʻufiʻufi ʻe Mōsese hono matá.

Naʻe pehē mai leva ʻe he ʻOtuá: ‘Kuo u mamata ki he faingataʻaʻia ʻa ʻeku kakaí ʻi ʻIsipité. Ko ia te u fakatauʻatāinaʻi kinautolu, pea ko koe ʻoku ou fekau atu ke ke taki mai ʻeku kakaí mei ʻIsipité.’ Naʻe teu ʻave ʻe Sihova ʻene kakaí ki he fonua fakaʻofoʻofa ko Kēnaní.

Ka naʻe pehē ange ʻe Mōsese: ‘ʻOku ʻikai ko ha tokotaha mahuʻinga au. Pea ʻe malava fēfē ke u fai ʻa e meʻá ni? Pea kapau te u ʻalu, ʻe pehē mai ʻe he kau ʻIsilelí kiate au, “Ko hai naʻá ne fekau mai koe?” Pea ko e hā te u leaʻaki?’

Naʻe tali ange ʻe he ʻOtuá: ‘Ko e meʻa eni te ke leaʻakí. ‘“Ko SIHOVA ko e ʻOtua ʻo ʻĒpalahame, ko e ʻOtua ʻo ʻAisake, ko e ʻOtua ʻo Sēkope kuó ne fekau mai au kiate kimoutolu.”’ Pea naʻe tānaki atu ʻe Sihova: ‘Pea ko hoku huafá ia ʻo taʻengata.’

Naʻe tali ʻe Mōsese: ‘Ka ʻe fēfē ʻo kapau heʻikai te nau tui mai kiate au ʻi heʻeku pehē naʻá ke fekau au?’

Naʻe fehuʻi ange ʻe he ʻOtuá: ‘Ko e hā ʻoku ʻi ho nimá?’

Pea tali ange ʻe Mōsese: ‘Ko e tokotoko.’

Naʻe pehē ʻe he ʻOtuá: ‘Lī ia ki he kelekelé.’ Pea ʻi hono fai ʻeni ʻe Mōsesé, naʻe liliu ʻa e tokotokó ko e ngata. Naʻe fakahā foki ʻe Sihova ha mana ʻe taha kia Mōsese. Naʻá ne pehē: ‘ʻAi ho nimá ki ho loto noʻó.’ Naʻe fai ia ʻe Mōsese, pea ʻi hono toʻo hake hono nimá ki tuʻá, naʻe hinehina ia ʻo hangē ha sinoú! Ko hono nimá naʻe hangē ʻoku maʻu ia ʻe he faʻahinga mahaki kovi ko ia ʻoku ui ko e kiliá. Ko hono hokó naʻe ʻoange ʻe Sihova kia Mōsese ha ivi ke ne fai ʻa e mana hono tolú. Ko hono fakaʻosi naʻá ne pehē: ‘ʻI hoʻo fai ʻa e ngaahi mana ko ʻení pea ʻe tui leva ʻa e kau ʻIsilelí naʻá ku fekau atu koe.’

Hili pē ʻeni naʻe ʻalu atu ʻa Mōsese ki honau ʻapí ʻo pehē kia Setelō: ‘Kātaki tuku mai au ke u foki ki hoku kāinga ʻi ʻIsipité ʻo vakai pe ʻoku nau fēfē.’ Ko ia naʻe lea māvae ʻa Setelō kia Mōsese, pea naʻe kamata leva ʻe Mōsese ʻa ʻene fononga ki ʻIsipité.