Ko e Tēniti ki he Lotú

ʻOKÚ KE ʻilo pe ko e hā ʻa e fale ko ʻení? Ko ha tēniti makehe ia ki he lotu kia Sihová. Naʻe toe ui foki ko e tāpanekale. Naʻe fakaʻosi hono langa ia ʻe he kakaí ʻi he taʻu ʻe taha hili ʻa ʻenau mavahe mei ʻIsipité. ʻOkú ke ʻilo pe ko e fakakaukau ʻa hai ke langa iá?

Ko e fakakaukau ia ʻa Sihova. ʻI he taimi naʻe ʻi he Moʻunga Sainaí ai ʻa Mōsesé, naʻe fakahā ange ai ʻe Sihova ʻa e anga hono langa iá. Naʻá ne pehē ke ngaohi ia ʻi ha founga ke faingofua ai hano toe veteki. ʻI he foungá ni naʻe lava pē ke hiki ʻa e ngaahi kongokongá ki ha feituʻu pē, pea toe fokotuʻu ai. Ko ia ʻi he taimi naʻe hiki holo ai ʻa e kau ʻIsilelí ʻi he toafá, naʻa nau ʻave ai pē mo e tēnití.

Kapau te ke sio ki he kiʻi loki ʻi he tuliki ʻo e tēnití, te ke sio ai ki he puha. Naʻe ui ia ko e puha ʻo e fuakavá. ʻI he ongo muiʻi puhá naʻe ʻi ai ʻa e ongo ʻāngelo pe selupi naʻe ngaohi mei he koulá. Naʻe toe hiki foki ʻe he ʻOtuá ʻa e Fekau ʻe Hongofulú ʻi ha ongo maka lafalafa ʻe ua, koeʻuhi he naʻe maumauʻi ʻe Mōsese ʻa e ongo ʻuluaki maká. Pea ko e ongo maka ko ʻení naʻe tuku ia ʻi he loto puha ʻo e fuakavá. Naʻe toe tauhi ʻi loto mo e siā naʻe faʻo ai ʻa e mana. ʻOkú ke manatuʻi pe ko e hā ʻa e meʻakai ko e maná?

Ko ʻĒlone ʻa e tokoua ʻo Mōsesé ko e tokotaha ia naʻe fili ʻe Sihova ke hoko ko e taulaʻeiki lahí. Naʻá ne taki ʻa e kakaí ʻi he lotu kia Sihová. Pea ko e kau taulaʻeiki foki ʻa hono ngaahi fohá.

Sio ange ki he loki lahi ʻo e tēnití. ʻOku liunga ua ai ʻa e lahi ʻo e loki siʻisiʻí. ʻOkú ke sio ki he puha ʻa ia ʻoku ʻalu hake mei ai ʻa e kohú? Ko e ʻōlita ia naʻe tutu ai ʻe he kau taulaʻeikí ʻa e meʻa namu lelei naʻe ui ko e ʻinisēnisí. Pea naʻe ʻi ai mo e tuʻuʻanga maama ʻoku ʻi ai ʻa e ngaahi maama ʻe fitu. Pea ko e meʻa hono tolu ʻi he lokí ko ha tēpile. ʻI he funga tēpilé naʻe ʻi ai ʻa e foʻi mā ʻe 12.

ʻI he lotoʻā ʻo e tāpanekalé naʻe ʻi ai ʻa e fuʻu poulu, pe pēsoni, naʻe fonu ʻi he vai. Naʻe ngāueʻaki ia ʻe he kau taulaʻeikí ki he fanofano. Naʻe ʻi ai foki mo e ʻōlita lahi. Naʻe tutu ʻi ai ʻa e fanga manu ʻoku mate ko e feilaulau kia Sihová. Naʻe tuʻu ʻi he loto mālie ʻo e ʻapitangá ʻa e tēnití, pea naʻe nofo takatakai leva ki ai ʻa e kau ʻIsilelí ʻi honau ngaahi tēniti.