Ko ha Tokotaha Kaihaʻa ʻi ʻIsileli

SIO ki he meʻa ʻoku tanu ʻe he tangata ko ʻení ʻi hono tēnití! Ko ha pulupulu fakaʻofoʻofa, mo ha konga koula mo e ngaahi konga siliva. Naʻá ne toʻo ia mei he kolo ko Sielikoó. Ka ko e hā ʻa e meʻa naʻe totonu ke fai ki he ngaahi meʻa ʻi Sielikoó? ʻOkú ke manatuʻi?

Naʻe totonu ke fakaʻauha kinautolu, pea ke ʻave ʻa e koulá mo e silivá ki he tukuʻanga koloa ʻo e tāpanekale ʻo Sihová. Ko ia kuo talangataʻa ʻa e kakaí ni ki he ʻOtuá. Kuo nau kaihaʻasi ʻa e meʻa ʻa e ʻOtuá. Ko e hingoa ʻo e tangatá ko ʻĀkani, pea ko e faʻahinga ko ʻení ko hono fāmili pē. Tau vakai ange pe ko e hā ʻa e meʻa naʻe hokó.

ʻI he hili hono kaihaʻasi ʻe ʻĀkani ʻa e ngaahi meʻá ni, naʻe tuku atu ʻe Siōsiua ha kau tangata ke tauʻi ʻa e kolo ko ʻAí. Ka naʻa nau foʻi ʻi he tau ko iá. Ko e niʻihi naʻe tāmateʻi, pea naʻe hola ʻa e toengá. Naʻe loto-mamahi ʻaupito ʻa Siōsiua. Naʻe tokoto foʻohifo hono matá ki he kelekelé mo lotu kia Sihova: ‘Ko e hā kuó ke tuku ai ke hoko ʻa e meʻá ni kiate kimautolú?’

Naʻe tali ʻe Sihova: ‘Tuʻu hake! Kuo fai angahala ʻa ʻIsileli. Kuo nau toʻo ʻa e ngaahi meʻa naʻe totonu ke fakaʻauha pe ke ʻave ki he tāpanekale ʻo Sihová. Kuo nau kaihaʻasi ha pulupulu fakaʻofoʻofa ʻo fūfuuʻi ia. Heʻikai te u toe tāpuakiʻi kimoutolu kaeʻoua ke mou fakaʻauha ia mo e tokotaha naʻá ne ʻave ʻa e ngaahi meʻá ni.’ Naʻe pehē ʻe Sihova te ne fakahā kia Siōsiua ʻa e tangata kovi ko iá.

Ko ia naʻe fakatahaʻi ʻe Siōsiua ʻa e kakai kotoa pē, pea naʻe toki fakahā ʻe Sihova ʻa e tangata kovi ko ʻĀkaní. Naʻe pehē ʻe ʻĀkani: ‘Kuó u angahala. Naʻá ku sio ki ha pulupulu fakaʻofoʻofa, mo e konga koula pea mo e ngaahi konga siliva. Naʻá ku fuʻu fiemaʻu ʻaupito ia pea naʻá ku ʻave ia. Te mou ʻilo ia ʻoku tanu ʻi hoku loto tēnití.’

ʻI hono maʻu ʻa e ngaahi meʻá ni pea ʻomai kia Siōsiuá, naʻá ne pehē kia ʻĀkani: ‘Ko e hā kuó ke ʻomai ai ʻa e faingataʻá kiate kitautolú? ʻI he taimí ni ʻe ʻomai ʻe Sihova ʻa e faingataʻa kiate koe!’ ʻI he meʻá ni naʻe tolomakaʻi ai ʻa ʻĀkani mo hono fāmilí ʻe he kakaí kotoa ʻo nau mate. ʻIkai ʻoku fakahā heni ʻoku totonu ke ʻoua ʻaupito naʻa tau ʻave ha ngaahi meʻa ʻoku ʻikai ko ʻetau meʻa?

ʻI he ʻosi ʻení naʻe toe ʻalu ʻa ʻIsileli ke tauʻi ʻa ʻAi. Naʻe tokoni ʻa Sihova ki heʻene kakaí he taimi ko ení, pea naʻa nau ikuna ʻi he taú.