Naʻe Langa ʻe Solomone ʻa e Temipalé

KI MUʻA ke mate ʻa Tēvitá, naʻá ne ʻoange kia Solomone ʻa e ngaahi palani mei he ʻOtuá ki hono langa ʻa e temipale ʻo Sihová. ʻI he taʻu hono fā ʻo e pule ʻa Solomoné, naʻá ne kamata hono langa ʻa e temipalé, pea naʻe feʻunga mo e taʻu ʻe fitu mo e konga pea toki ʻosi ia. Naʻe laui kilu ʻa e kau tangata naʻa nau ngāue ki he temipalé, pea naʻe lahi ʻaupito ʻaupito ʻa e paʻanga naʻe fakamole ki he langá. Ko hono ʻuhingá ko e lahi ʻa e koula mo e siliva naʻe ʻi aí.

Naʻe ʻi ai ha ongo loki lalahi ʻe ua ʻi he temipalé, ʻo hangē pē ko ia naʻe ʻi he tāpanekalé. Ka ko e ongo loki ko ʻení naʻe liunga ua ai ʻa e lahi ʻo e ongo loki naʻe ʻi he tāpanekalé. Naʻe ʻai ʻe Solomone ke tuku ʻa e puha ʻo e fuakavá ʻi he loki ʻi loto ʻi he temipalé, pea ko e ngaahi meʻa kehe naʻe tauhi ʻi he tāpanekalé naʻe tuku ia ki he loki ʻe tahá.

ʻI he ʻosi ʻa e temipalé, naʻe fai ha kātoanga lahi. Naʻe tūʻulutui ʻa Solomone ʻi muʻa ʻi he temipalé ʻo lotu, ʻo hangē pē ko ia ʻokú ke sio ki ai ʻi he fakatātaá. Naʻe pehē ʻe Solomone kia Sihova: ‘Naʻa mo hēvani kotoa ʻe ʻikai feʻunga ia ke ke hao ki ai, pea anga-fēfē ai ha lava ke ke hao ʻi he temipale ko ʻení. Ka, ʻe hoku ʻOtua, kātaki ʻo fanongo ki hoʻo kakaí ʻi haʻanau lotu atu ʻi he feituʻú ni.’

ʻI he ʻosi ʻa e lotu ʻa Solomoné, naʻe ʻalu hifo ha afi mei he langí. Naʻá ne tutu ʻa e ngaahi feilaulau monumanu naʻe faí. Pea naʻe fonu ʻa e temipalé ʻi he maama ngingila meia Sihova. Naʻe fakahā ʻe he meʻa ko ʻení ʻoku fanongo mai ʻa Sihova, pea naʻá ne leleiʻia ki he temipalé pea mo e lotu ʻa Solomoné. Naʻe toki hoko leva ʻa e temipalé ko e feituʻu ia ke haʻu ki ai ʻa e kakaí ke lotu, kae ʻikai ko e tāpanekalé.

Naʻe taimi fuoloa ʻa e pule ʻa Solomoné ʻi ha founga fakapotopoto, pea naʻe fiefia ʻa e kakaí. Ka naʻe mali ʻa Solomone mo e kau fefine tokolahi mei he ngaahi fonua kehe ʻa ia naʻe ʻikai te nau lotu kia Sihova. ʻOkú ke sio ki he tokotaha ʻo kinautolu ʻokú ne lotu ki he ʻaitolí? Faifai atu pē naʻe ʻai ʻe he ngaahi uaifi ʻo Solomoné ʻa Solomone ke ne lotu ki he ngaahi ʻotua kehé foki. ʻOkú ke ʻilo pe ko e hā ʻa e meʻa naʻe hoko ʻi he fai ʻe Solomone ʻa e meʻa ko ʻení? Naʻe ʻikai leva ke ne kei fai ʻofa ki he kakaí. Naʻá ne hoko ʻo anga-taʻeʻofa, pea naʻe ʻikai ke toe fiefia ʻa e kakaí.

Naʻe ʻai ʻe he meʻá ni ke ʻita ʻa Sihova kia Solomone, peá ne tala kiate ia: ‘Te u toʻo ʻa e puleʻangá meiate koe pea te u foaki ia ki ha tangata kehe. Heʻikai te u fai ʻeni lolotonga hoʻo kei moʻuí, ka ʻi he lolotonga ʻo e pule ʻa ho fohá. Ka heʻikai te u toʻo kotoa ʻa e kakai ʻo e puleʻangá mei ho fohá.’ Tau sio ange ki he founga naʻe hoko ai ʻa e meʻa ko ʻení.