Ko e Tamaiki Tangata ʻe Toko Fā ʻi Pāpilone

NAʻE ʻave ʻe he Tuʻi ko Nepukanesá ʻa e kau ʻIsileli ako lelei tahá ki Pāpilone. ʻI he ʻosi iá naʻe fili ʻe he tuʻí meiate kinautolu ʻa e kau tangata talavou mo poto tahá. Ko e toko fā ʻo kinautolu ko e tamaiki tangata ʻokú ke sio ki ai ʻi hení. Ko e taha ko Tāniela, pea ko e toko tolu kehé naʻe ui ia ʻe he kau Pāpiloné ko Setaleki, Mēsake mo ʻApitenikō.

Naʻe faʻufaʻu ʻe Nepukanesa ke akoʻi ʻa e kau tangata talavoú ke nau ngāue ʻi hono palasí. ʻI ha ʻosi ʻa e akó ʻi he taʻu ʻe tolu naʻá ne fili pē ʻa e faʻahinga poto tahá ke tokoni kiate ia ke fakaleleiʻi ʻa e ngaahi palopalemá. Naʻe fiemaʻu ʻe he tuʻí ʻa e tamaiki tangatá ke nau mālohi mo moʻui lelei lolotonga hono akoʻi kinautolú. Ko ia naʻá ne fai ha fekau ki heʻene kau sevānití ke nau ʻoatu ki he kau tangata talavoú hono kotoa ʻa e meʻakai lelei mo e uaine ʻo tatau pē mo ia ʻoku maʻu ʻe he tuʻí mo hono fāmilí.

Sio ki he talavou ko Tānielá. ʻOkú ke ʻilo ʻa e meʻa ʻokú ne leaʻaki ki he sevāniti pule ʻa Nepukanesa ko Asipenasí? Naʻe tala ʻe Tāniela kiate ia ʻoku ʻikai te ne fie kai ʻi he ngaahi meʻakai lelei mei he tēpile ʻa e tuʻí. Ka naʻe hohaʻa ʻa Asipenasi. Naʻá ne pehē: ‘Kuo ʻosi fili ʻe he tuʻí ʻa e meʻa ke mou kai mo inú, pea kapau ʻe ʻikai te mou hā moʻui lelei ʻo hangē ko e kau tangata talavou ko ē, te ne tāmateʻi nai au.’

Ko ia naʻe ʻalu ʻa Tāniela ki he leʻo naʻe vaheʻi ʻe Asipenasí ke ne tokangaʻi ia mo hono kaungāmeʻa ʻe toko tolú. Naʻá ne pehē kiate ia: ‘Kātaki hanga ʻo ʻahiʻahiʻi kimautolu ʻi ha ʻaho ʻe 10. ʻOmai pē kiate kimautolu ha vesitapolo ke mau kai mo ha vai ke mau inu. Pea hili ia fakahoa kimautolu mo e kau talavou kehé ʻa ia ʻoku nau kai ʻa e meʻakai ʻa e tuʻí, pea vakai pe ko hai ʻoku hā lelei angé.’

Naʻe loto ʻa e tokotaha leʻó ke ne fai ʻa e meʻa ko ʻení. Pea ʻi he ʻosi ʻa e ʻaho ʻe 10, naʻe hā moʻui lelei ange ʻa Tāniela mo hono kaungāmeʻa ʻe toko tolú ʻi he kau talavou kehé. Ko ia naʻe hokohoko atu ʻa e leʻó ke fakaʻatā ke nau kai vesitapolo pē kae ʻikai ko ia naʻe tokonaki mai ʻe he tuʻí.

ʻI he ʻosi ʻa e taʻu ʻe tolu naʻe ʻave ʻa e kau tangata talavou kotoa pē kia Nepukanesa. ʻI he ʻosi ʻene talanoa mo kinautolu hono kotoa, naʻe ʻilo ai ʻe he tuʻí ko Tāniela mo hono kaungāmeʻa ʻe toko tolú ko e kau poto tahá ia. Ko ia naʻá ne tuku kinautolu ke tokoni kiate ia ʻi he palasí. Pea ʻi hano ʻeke ʻe he tuʻí kia Tāniela, Setaleki, Mēsake, mo ʻApitenikō ha ngaahi fehuʻi pe ʻoange kiate kinautolu ha ngaahi palopalema faingataʻa, naʻe liunga 10 ʻenau ʻiló ʻi ha taha ʻo ʻene kau taulaʻeikí pe kau tangata potó.