Kau Tangata Naʻe Tataki ʻe ha Fetuʻu

ʻOKÚ KE sio ki he fetuʻu ngingila ʻoku tuhu ki ai ʻa e toko taha ʻo e kau tangata ko ʻení? ʻI heʻenau mavahe mei Selusalemá, naʻe hā ʻa e fetuʻu. Ko e kau tangata ʻeni mei he Hahaké, pea naʻa nau ako ki he ngaahi fetuʻú. Naʻa nau tui ko e fetuʻu foʻou ko ʻení ʻokú ne taki kinautolu ki ha tokotaha mahuʻinga.

ʻI he aʻu ʻa e kau tangatá ki Selusalemá, naʻa nau ʻeke: ‘Ko e fē ʻa e tama ʻa ia ʻe hoko ko e tuʻi ʻo e kakai Siú?’ Ko e “Siu” ko hono ui pē ia ʻe taha ʻo e kakai ʻIsilelí. Naʻe pehē ʻe he kau tangatá: ‘Naʻa mau ʻuluaki sio ki he fetuʻu ʻo e tama ko ʻení ʻi heʻemau kei ʻi he Hahaké, pea ko ʻemau ōmai ke lotu kiate ia.’

Naʻe ʻikai ke fiefia ʻa Hēlota, ko e tuʻi ia ʻo Selusalemá, ʻi heʻene fanongo ki he meʻa ko ʻení. Naʻe ʻikai te ne toe saiʻia ke fetongi ia ʻe ha tuʻi kehe. Ko ia naʻe fakatahaʻi ʻe Hēlota ʻa e houʻeiki taulaʻeikí ʻo ʻeke: ‘ʻE fāʻeleʻi ʻi fē ʻa e tuʻi ko ia naʻe talaʻofá?’ Naʻa nau tali: ‘ʻOku pehē ʻe he Tohitapú ko Pētelihema.’

Ko ia naʻe ui ʻe Hēlota ʻa e kau tangata mei he Hahaké ʻo ne pehē: ‘Mou ō ʻo kumi ki he tamá. ʻI haʻamou ʻilo ia pea fakahā mai kiate au. ʻOku ou fie ʻalu ʻo lotu kiate ia foki.’ Ka ko hono moʻoní, naʻe fiemaʻu ʻe Hēlota ia ke ʻilo ʻa e tamá ke tāmateʻi ia!

Naʻe ʻalu muʻomuʻa leva ʻa e fetuʻú ʻi he kau tangatá ʻo aʻu ki Pētelihema, pea tuʻu ʻi ʻolunga ʻi he feituʻu ko ia naʻe ʻi ai ʻa e tamá. ʻI he hū ʻa e kau tangatá ki he falé, naʻe ʻi ai ʻa Mele mo Sīsū. Naʻa nau toʻo hake ha ngaahi meʻaʻofa pea ʻoange ia kia Sīsū. Ka ki mui mai naʻe fai fakatokanga ʻe Sihova ki he kau tangatá ʻi ha misi ke ʻoua te nau toe foki kia Hēlota. Ko ia naʻa nau foki ki honau fonua totonú ʻi ha hala kehe.

ʻI hono ʻilo ʻe Hēlota naʻe ʻosi foki ʻa e kau tangata mei he Hahaké ki honau fonuá, naʻá ne fuʻu ʻita lahi. Ko ia naʻá ne tuʻutuʻuni ke tāmateʻi ʻa e tamaiki tangata kotoa pē ʻi Pētelihema mei he taʻu ua ʻo fai ki lalo. Ka naʻe ʻosi fai fakatokanga ʻa Sihova ia kia Siosefa ʻi ha misi, pea naʻe mavahe ʻa Siosefa ia mo hono fāmilí ki ʻIsipite. Ki mui mai, i hono ʻiloʻi ʻe Siosefa kuo mate ʻa Hēlotá, naʻá ne toe foki mai mo Mele mo Sīsū ki honau ʻapí ki Nāsaleti. Ko e feituʻu ʻeni naʻe tupu hake ai ʻa Sīsuú.

Ko hai ʻokú ke fakakaukau naʻá ne ʻai ʻa e fetuʻu foʻoú ke ngingilá? Manatuʻi, naʻe ʻuluaki ʻalu ʻa e kau tangatá ki Selusalema ʻi heʻenau sio ki he fetuʻú. Naʻe fiemaʻu ʻe Sētane ko e Tēvoló ke tāmateʻi ʻa e ʻAlo ʻo e ʻOtuá, pea naʻá ne ʻilo ʻe feinga ʻa Tuʻi Hēlota ʻo Selusalemá ke tāmateʻi ia. Ko ia ʻoku pau ko Sētane ko e tokotaha ia naʻá ne ʻai ʻa e fetuʻu ko ia ke ngingilá.