Naʻá Ne ʻOfa ki he Fānau Iikí

SIO kia Sīsū ki heʻene kuku mai ʻa e kiʻi tamasiʻí. ʻOku lava ke ke ʻilo ʻoku tokanga moʻoni ʻa Sīsū ki he fānau iikí. Ko e kau tangata ʻoku nau mamata ki aí ko ʻene kau ʻapositoló. Ko e hā ʻoku tala ange ʻe Sīsū kiate kinautolú? Tau vakai ange.

Naʻe toki aʻu mai ʻa Sīsū mo ʻene kau ʻapositoló mei haʻanau fononga mamaʻo. ʻI he halá naʻe fekīhiaki ai ʻa e kau ʻapositoló ʻiate kinautolu pē. Ko ia ʻi he ʻosi ʻa e fonongá naʻe ʻeke ange ʻe Sīsū: ‘Ko e hā naʻa mou fekīhiaki ki ai ʻi he halá?’ Ko hono moʻoní, naʻe ʻilo pē ʻe Sīsū ia ʻa e meʻa naʻe fai ki ai ʻa e fekīhiakí. Ka ko ʻene ʻeke pē ʻa e fehuʻí ke ʻilo pē ʻe tala ange ʻe he kau ʻapositoló kiate ia.

Naʻe ʻikai ke tali ange ia ʻe he kau ʻapositoló, koeʻuhi he ko ʻenau fekīhiaki ʻi he halá ʻo fekauʻaki pe ko hai ʻiate kinautolu ʻoku lahi tahá. Naʻe loto ʻa e kau ʻapositolo ʻe niʻihi ke nau mahuʻinga ange ʻi he niʻihi ko ē. Naʻe anga-fēfē ʻa hano tala ʻe Sīsū kiate kinautolu ʻoku ʻikai ke totonu ke fie hoko ko e lahi taha?

Naʻá ne ui ha kiʻi tamasiʻi ʻo ne fokotuʻu ia ʻi muʻa ʻiate kinautolu hono kotoa. Peá ne pehē ki heʻene kau ākongá: ‘ʻOku ou fiemaʻu ke mou ʻilo lelei ʻa e meʻa ko ʻení, ʻE ʻikai ʻaupito te mou hū ki he puleʻanga ʻo e ʻOtuá kaeʻoua ke mou liliu ʻo hoko ʻo hangē ko e fānau iiki. Ko e tokotaha lahi taha ʻi he puleʻangá ko e tokotaha ʻoku hoko ʻo hangē ko e kiʻi tamasiʻi ko ʻení.’ ʻOkú ke ʻilo ʻa e ʻuhinga naʻe lea pehē ai ʻa Sīsuú?

Koeʻuhi ʻoku ʻikai ke tokanga ʻa e fānau iikí ki he hoko ko ha tokotaha lahi ange pe mahuʻinga ange ʻi he niʻihi kehé. Ko ia naʻe totonu ke ako ʻa e kau ʻapositoló ke nau hangē ko e fānaú ʻi he founga ko ʻení pea ʻoua te nau kē ʻo kau ki he hoko ʻo lahi pe mahuʻinga.

Naʻe toe ʻi ai foki mo e ngaahi taimi kehe naʻe fakahā ai ʻe Sīsū ʻa e lahi ʻo ʻene tokanga ki he fānau iikí. ʻI ha ngaahi māhina siʻi ki mui mai naʻe ʻomai ʻe ha kakai ʻe niʻihi ʻenau fānaú ke sio kia Sīsū. Naʻe feinga ʻa e kau ʻapositoló ke taʻofi kinautolu. Ka naʻe fakahā ʻe Sīsū ki heʻene kau ʻapositoló: ‘Tuku ʻa e fānaú ke haʻu kiate au, pea ʻoua te mou taʻofi kinautolu, koeʻuhi he ko e puleʻanga ʻo e ʻOtuá ʻoku ʻo e faʻahinga pehē.’ Pea naʻe fua leva ʻe Sīsū ʻa e fānaú, mo tāpuakiʻi kinautolu. ʻIkai ʻoku lelei ke ʻilo ʻoku ʻofaʻi ʻe Sīsū ʻa e fānau iikí?