Naʻe Tāmateʻi ʻa Sīsū

SIO ki he meʻa fakailifia ko eni kuo hokó! Kuo mei mate ʻa Sīsū. Kuo nau ʻai ia ki ha ʻakau. Naʻe tuki faʻo ki hono ongo nimá mo e vaʻé. Ko e hā naʻe fie fai ai ʻe ha taha ha meʻa pehē kia Sīsuú?

ʻOku ʻuhingá he naʻe fehiʻa ha niʻihi kia Sīsū. ʻOkú ke ʻilo pe ko hai ʻa kinautolu? Ko e taha ʻo kinautolu ko e ʻāngelo kovi ʻaupito ko Sētane ko e Tēvoló. Ko e tokotaha ia naʻá ne malava ke ʻai ʻa ʻĀtama mo ʻIvi ke na talangataʻa kia Sihová. Pea ko Sētane ʻa e tokotaha naʻá ne ʻai ʻa e ngaahi fili ʻo Sīsuú ke nau fai ʻa e hia fakalilifu ko ʻení.

Naʻa mo e ki muʻa ke tutuki ʻa Sīsū ki he ʻakaú, naʻe fai ʻe he ngaahi fili ʻo Sīsuú kiate ia ha ngaahi meʻa naʻe kovi. Manatuʻi ʻa ʻenau haʻu ki he ngoue ko Ketisemaní ʻo ʻave ai iá? Ko hai ʻa e ngaahi fili ko iá? ʻIo, ko e kau taki lotu. Tau sio ange pe ko e hā naʻe toki hoko atu aí.

ʻI hono ʻave ʻo Sīsū ʻe he kau taki lotú, naʻe hola ʻa ʻene kau ʻapositoló. Naʻa nau tuku tokotaha pē ʻa Sīsū mo hono ngaahi filí, koeʻuhi he naʻa nau ilifia. Ka naʻe ʻikai ke ʻalu ʻo fuʻu mamaʻo ʻa e ongo ʻapositolo ko Pita mo Sioné. Naʻá na muimui atu pē ke na ʻilo pe ko e hā ʻe hoko kia Sīsuú.

Naʻe ʻave ʻe he kau taulaʻeikí ʻa Sīsū ki he tangata matuʻotuʻa ko ʻAnasi, ʻa ia naʻe hoko ki muʻa ko e taulaʻeiki lahí. Naʻe ʻikai ke nofo fuoloa ʻa e fuʻu kakaí ʻi heni. Ko hono hokó naʻa nau ʻave ʻa Sīsū ki he fale ʻo Kaiafasi, ʻa ia ko e taulaʻeiki lahi ʻi he taimi ko iá. Naʻe ʻosi fakatahataha ʻa e kau taki lotu tokolahi ki hono falé.

Naʻa nau fai ha hopo ʻi he fale ko ʻeni ʻo Kaiafasí. Naʻe ʻomai ha kakai ke nau tala ha ngaahi loi ʻo fekauʻaki mo Sīsū. Naʻe pehē kotoa pē ʻe he kau taki lotú: ‘ʻOku totonu ke tāmateʻi ʻa Sīsū.’ Pea nau ʻanuhi hono fofongá, pea nau tuki ia.

ʻI he lolotonga ʻo hono fai ʻa e ngaahi meʻa kotoa ko ʻení, naʻe ʻi tuʻa pē ʻa Pita. Ko ha pō momoko eni, ko ia naʻe tafu afi ʻa e kakaí. Lolotonga ʻa ʻenau fakamāfana takatakai ʻi he afí, naʻe hanga hake ha taʻahine sevāniti kia Pita, mo ne pehē: ‘Ko e tangata foki ko ʻení naʻe ʻia Sīsū.’

Naʻe tali ange ʻe Pita: ‘ʻIkai, naʻe ʻikai te u kau mo ia!’

Naʻe tuʻo tolu ʻa e pehē ʻe he kakaí kia Pita naʻe ʻia Sīsū. Ka naʻe tali ai pē ʻe Pita ʻo tuʻo tolu ʻo pehē ʻoku ʻikai ke moʻoni. ʻI he lea tuʻo tolu pehē ʻa Pitá naʻe tafoki ʻa Sīsū ʻo sio kiate ia. Naʻe ongoʻi fakatomala ʻaupito ʻa Pita ʻi heʻene tala ʻa e ngaahi loi ko ʻení, pea naʻá ne ʻalu ʻo tangi mamahi.

ʻI he kamata hopo hake ʻa e laʻaá ʻi he pongipongi Falaité, naʻe ʻave ʻe he kau taulaʻeikí ʻa Sīsū ki honau faiʻanga fakataha lahí, ko e holo Sanitalimí. Naʻa nau laulau ai pē pe ko e hā te nau fai kiate iá. Naʻa nau ʻave ia kia Ponito Pailato, ko e pule ia ʻo e vahefonua ko Siuteá.

Naʻe tala ʻe he kau taulaʻeikí kia Pailato: ‘Ko e tangata kovi ʻeni. ʻOku totonu ke tāmateʻi ia.’ ʻI he ʻosi ʻa hono fakafehuʻi ʻo Sīsuú, naʻe pehē ʻe Pailato: ‘ʻOku ʻikai te u ʻilo ʻe au ha hala kuó ne fai.’ Pea naʻe fekau ʻe Pailato ke ʻave ʻa Sīsū kia Hēlota ʻAnitipasa. Ko Hēlotá ko e pule ia ʻo Kālelí, ka naʻe nofo ia ʻi Selusalema. Naʻe ʻikai ke ʻilo foki ʻe Hēlota ia ha hala kuo fai ʻe Sīsū, ko ia naʻá ne toe fakafoki ia kia Pailato.

Naʻe loto ʻa Pailato ke tuku ange ʻa Sīsū. Ka naʻe loto ʻa e ngaahi fili ʻo Sīsuú ke tuku ange ha pōpula ia ʻe taha. Ko e tangata ko ʻení ko e kaihaʻakau ko Palapasa. Ko e hoʻataá nai naʻe ʻomai ai ʻe Pailato ʻa Sīsū ki tuʻa. Naʻá ne pehē ki he kakaí: ‘Sio! Ko homou tuʻí ē!’ Ka naʻe kaila ʻa e houʻeiki taulaʻeikí: ‘ʻAve ia! Tāmateʻi ia! Tāmateʻi ia!’ Ko ia naʻe tuku ange ʻe Pailato ʻa Palapasa ke ʻalu ʻo tauʻatāina, pea nau ʻave ʻa Sīsū ke tāmateʻi.

Naʻe tutuki ʻa Sīsū ki he ʻakaú ʻi he hoʻatā efiafi Falaité. ʻI he ongo tafaʻaki ʻo Sīsuú naʻe tautau ai ha faihia ke na mate ka ʻoku ʻikai te ke sio kiate kinaua ʻi he fakatātaá. Ki muʻa siʻi pea mate ʻa Sīsuú, naʻe pehē ʻe ha taha ʻo e ongo faihiá kiate ia: ‘Manatuʻi au ʻi hoʻo hoko ki ho puleʻangá.’ Pea naʻe tali ange ʻe Sīsū: ‘ʻOku ou talaʻofa atu te ke ʻi Palataisi pea mo au.’

ʻIkai ko ha talaʻofa fakafiefia ia? ʻOkú ke ʻilo ʻa e palataisi naʻe lau ki ai ʻa Sīsuú? Naʻe ʻi fē ʻa e palataisi naʻe ngaohi ʻe he ʻOtuá ʻi he kamataʻangá? ʻIo, ʻi māmani. Pea ʻi he pule ʻa Sīsū ko e tuʻi ʻi hēvaní, te ne toe fakafoki ke moʻui ʻa e tangata ko ʻení ke fiefia ʻi he Palataisi foʻou ʻi he māmaní. ʻIkai ʻoku tau fiefia ʻi he meʻá ni?