Ko Hono Tuku Ange mei he Pilīsoné

SIO ki he ʻāngelo ko ʻeni ʻokú ne fakaava mo pukepuke ʻa e matapā ʻo e pilīsoné. Ko e kau tangata ko ʻeni ʻoku tuku angé ko e kau ʻapositolo ʻa Sīsuú. Tau vakai ange pe ko e hā naʻe iku ai ʻo tuku pilīsone kinautolú.

Ko e taimi siʻi pē ia mei hono huaʻi hifo ʻa e laumālie māʻoniʻoní ki he kau ākonga ʻa Sīsuú. Pea ko e meʻa ʻeni naʻe hokó: Naʻe ʻalu ʻa Pita mo Sione ki he temipalé ʻi Selusalema ʻi he efiafi ʻe taha. Naʻe ʻi ai ofi ki he veʻe matapaá ha tangata kuó ne heke talu pē mei hono fāʻeleʻí. Naʻe ʻave ia ʻe he kakaí ki he feituʻu ko ʻení ʻi he ʻaho kotoa pē ke lava ke ne kole ha paʻanga meiate kinautolu ʻoku ʻalu ki he temipalé. ʻI heʻene sio kia Pita mo Sioné, naʻá ne kole kiate kinaua ke ʻoange haʻane meʻa. Ko e hā naʻe fai ʻe he ongo ʻapositoló?

Naʻá na tuʻu ʻo sio ki he tangata masivá ni. Naʻe pehē ange ʻe Pita: ‘ʻOku ʻikai ke ʻi ai haʻaku paʻanga, ka te u ʻoatu kiate koe ʻa ia ʻoku ou maʻú. ʻI he hingoa ʻo Sīsū, tuʻu ki ʻolunga ʻo ʻalu!’ Pea naʻe puke ʻe Pita ʻa e nima toʻomataʻu ʻo e tangatá, pea puna hake leva ʻa e tangatá ʻo ne kamata ʻalu. ʻI he sio ʻa e kakaí ki he meʻa ko ʻení, naʻa nau ʻohovale mo fiefia ʻaupito he mana fakaofo ko ʻení.

Naʻe pehē ʻe Pita: ‘Naʻá ma fai ʻa e mana ko ení ʻi he mālohi ʻo e ʻOtuá, ʻa ia naʻá ne fokotuʻu ʻa Sīsū mei he maté.’ ʻI he lolotonga ʻa ʻene lea mo Sioné, naʻe haʻu ha kau taki lotu. Naʻa nau ʻita koeʻuhi ʻoku tala ʻe Pita mo Sione ki he kakaí ʻo kau ki hono fokotuʻu ʻo Sīsū mei he maté. Ko ia naʻa nau puke kinaua ʻo tuku ki he pilīsoné.

ʻI he ʻaho hono hokó naʻe fai ʻa e fakataha lahi ʻa e kau taki lotú. Naʻe ʻomai ʻa Pita mo Sione, fakataha mo e tangata naʻá na fakamoʻuí. Naʻe ʻeke ʻe he kau taki lotú: ‘Ko e mālohi ʻo hai naʻá mo fai ai ʻa e mana ko ení?’

Naʻe tala ange ʻe Pita kiate kinautolu ko e mālohi ʻo e ʻOtuá, ʻa ia naʻá ne fokotuʻu ʻa Sīsū mei he maté. Naʻe ʻikai ke ʻilo ʻe he kau taulaʻeikí pe ko e hā ʻa e meʻa te nau faí, he naʻe ʻikai ke lava ke nau fakaʻikaiʻi ʻa e mana fakaofo ko eni naʻe hokó. Ko ia naʻa nau fai fakatokanga ki he ongo ʻapositoló ke ʻoua ʻe toe lave ʻo kau kia Sīsū, pea tuku ange ke na ō.

ʻI he faai atu ʻa e ngaahi ʻahó mo e hokohoko atu ʻa e malanga ʻa e kau ʻapositoló ʻo kau kia Sīsū pea mo fakamoʻui ʻa e kau mahakí. Naʻe movete atu ʻa e ongoongo ʻo fekauʻaki mo e ngaahi mana ko ʻení. Ko ia naʻa mo e fuʻu kakai mei he ngaahi kolo takatakai ʻi Selusalemá naʻa nau ʻomai ʻa e kau mahaki ki he kau ʻapositoló ke fakamoʻui. Naʻe ʻai ʻe he meʻá ni ʻa e kau taki lotú ke nau meheka, ko ia naʻa nau puke ʻa e kau ʻapositoló ʻo tuku pilīsone kinautolu. Ka naʻe ʻikai ke fuoloa ʻa ʻenau nofo aí.

ʻI he lolotonga ʻo e pō naʻe fakaava ʻe ha ʻāngelo ʻa e ʻOtuá ʻa e matapā ʻo e pilīsoné, ʻa ia ʻoku lava ke ke sio ki ai hení. Naʻe pehē ʻe he ʻāngeló: ‘Mou ʻalu ʻo tuʻu ʻi he temipalé, ʻo hokohoko atu hoʻomou lea ki he kakaí.’ ʻI he pongipongi hono hokó, ʻi hono fekau ʻe he kau taki lotú ha kau tangata ki he pilīsoné ke ʻomai ʻa e kau ʻapositoló, kuo nau ʻosi ʻalu kinautolu mei ai. Ki mui mai ai naʻe maʻu kinautolu ʻe he kau tangatá ʻoku nau faiako ʻi he temipalé pea naʻa nau ʻomai kinautolu ki he fale fakataha ko e Sanitalimí.

Naʻe pehē ʻe he kau taki lotú: ‘Naʻa mau ʻoatu kiate kimoutolu ʻa e tuʻutuʻuni mamafa ke ʻoua te mou toe ako ʻo fekauʻaki mo Sīsū. Ka kuo mou fakafonu ʻa Selusalema ʻaki hoʻomou akonakí.’ Pea naʻe tali ange ʻe he kau ʻapositoló: ‘Kuo pau ke mau talangofua ange ki he pule ʻa e ʻOtuá ʻi he tangatá.’ Ko ia naʻa nau hokohoko atu hono akoʻi ʻa e “ongoongo lelei.” ʻIkai ko ha faʻifaʻitakiʻanga lelei ia kiate kitautolu ke tau muimui ai?