Naʻe ʻAʻahi ʻa Pita kia Koliniusi

KO E ʻapositolo ʻeni ko Pitá ʻoku tuʻú, pea ko e niʻihi ʻena ʻo hono ngaahi kaungāmeʻá ʻi muí. Ka ko e hā oku punou ai ʻa e tangatá ni kia Pitá? ʻOku totonu ke ne fai pehē? ʻOkú ke ʻilo pe ko hai ia?

Ko e tangatá ni ko Koliniusi. Ko ha ʻofisa fakakautau Loma ia. Naʻe ʻikai ke ʻilo ʻe Koliniusi ia ʻa Pita, ka naʻe tala ki ai ke ne fakaafeʻi ʻa Pita ki hono falé. Tau ako ke ʻilo pe naʻe anga-fēfē ʻa e hoko ʻa e meʻa ko ʻení.

Ko e ʻuluaki kau muimui ʻo Sīsuú ko e kau Siu pē, ka ko Koliniusí naʻe ʻikai ko ha Siu ia. Ka naʻá ne ʻofa ki he ʻOtuá, naʻá ne lotu kiate ia, mo fai ʻa e ngaahi meʻa lelei lahi ki he kakaí. ʻI ha efiafi ʻe taha naʻe hā ʻa e ʻāngelo kiate ia ʻo pehē: ‘ʻOku fiefia ʻa e ʻOtuá ʻiate koe, pea te ne tali hoʻo ngaahi lotú. Fekau ha kau tangata ke nau ʻomai ʻa e tangata ko Pita. ʻOkú ne nofo ʻi Siopa ʻi he fale ʻo Saimone, ʻa ia ʻoku nofo ʻi he matātahí.’

Naʻe fekau leva ʻe Koliniusi ha kau tangata ke kumi kia Pita. ʻI he ʻaho hono hokó, ʻi he ofi atu ʻa e kau tangatá ki Siopá, naʻe ʻi he funga fale ʻato lafalafa ʻo Saimoné ʻa Pita. Naʻe ʻai ai ʻe he ʻOtuá ʻa Pita ke fakakaukau ʻokú ne sio ki ha fuʻu konga tupenu lahi ʻoku tukutuku hifo mei he langí. ʻOku ʻi ai ʻa e faʻahinga monumanu kehekehe ʻi he loto konga tupenú. Fakatatau ki he Lao ʻa e ʻOtuá, ko e fanga monumanu ko ʻení naʻe taʻemaʻa ia ke kai, ka naʻe pehē ʻe ha leʻo: ‘ʻE Pita, tuʻu hake. Tāmateʻi mo kai.’

Naʻe tali ange ʻe Pita: ‘ʻIkai! Kuo teʻeki ai ke u kai ʻa ia ʻoku taʻemaʻá.’ Ka naʻe tala ʻe he leʻó kia Pita: ‘Tuku hoʻo ui ʻoku taʻemaʻa ʻa e meʻa kuo fakahā ʻe he ʻOtuá ʻi he taimí ni ʻoku maʻá.’ Naʻe tuʻo tolu ʻa e hoko ʻa e meʻá ni. ʻI he lolotonga ʻa e fifili ʻa Pita pe ko e hā ʻa e ʻuhinga ʻo e ngaahi meʻa ko ʻení, naʻe aʻu mai ki he falé ʻa e kau tangata naʻe fekau mai ʻe Koliniusí ʻo ʻeke ʻa Pita.

Naʻe ʻalu hifo ʻa Pita ʻo ne pehē: ‘Ko e tangata au ʻoku mou kumi ki aí. Ko e hā kuo mou ōmai aí?’ ʻI he fakamatala ʻe he kau tangatá ʻo pehē naʻe tala ʻe ha ʻāngelo kia Koliniusi ke fakaafeʻi ʻa Pita ki hono falé, naʻe loto ʻa Pita ke nau ō. ʻI he ʻaho hono hokó naʻe ʻalu atu ʻa Pita mo hono ngaahi kaungāmeʻá ke ʻaʻahi kia Koliniusi ʻi Sesalia.

Naʻe fakatahatahaʻi fakataha ʻe Koliniusi hono ngaahi kāingá mo hono ngaahi kaungāmeʻa ofí. ʻI he haʻu ʻa Pitá, naʻe feʻiloaki ʻa Koliniusi mo ia. Naʻá ne tō ki lalo ʻo punou ʻi he vaʻe ʻo Pitá, ʻo hangē ko ia ʻokú ke sio ki ai hení. Ka naʻe pehē ʻe Pita: ‘Tuʻu hake; ko au ko ha tangata pē.’ ʻIo, ʻoku fakahā ʻe he Tohitapú ʻoku ʻikai ke totonu ke punou ʻo lotu ki ha tangata. ʻOku totonu ke tau lotu kia Sihova pē.

Naʻe malanga leva ʻa Pita ki he faʻahinga ko eni kuo fakatahataha maí. Naʻe pehē ʻe Pita: ‘Kuó u ʻilo kuo tali ʻe he ʻOtuá ʻa e kakai kotoa pē ʻoku nau fie tauhi kiate iá.’ Pea ʻi he lolotonga ʻa ʻene leá, naʻe fekau mai ʻe he ʻOtuá hono laumālie māʻoniʻoní, pea naʻe kamata ke lea ʻa e kakaí ni ʻi he ngaahi lea kehekehe. Naʻe ofo heni ʻa e kau ākonga Siu naʻe omi mo Pitá, koeʻuhi he naʻa nau fakakaukau ʻoku leleiʻia ʻa e ʻOtuá ʻi he kau Siú pē. Ko ia naʻe akoʻi heni kiate kinautolu ʻoku ʻikai ke fakakaukau ʻa e ʻOtuá ʻoku lelei ange pe mahuʻinga ange ha kakai ʻo ha matakali ʻe taha ʻi ha ngaahi matakali kehe. ʻIkai ko ha meʻa lelei ia kiate kitautolu hono kotoa ke tau manatuʻi?