Ko Paula ʻi Loma

SIO ki he seini ʻia Paulá, pea vakai ki he sōtia Loma ʻokú ne leʻohi iá. Ko Paulá ko ha pōpula ia ʻi Loma. Naʻá ne tatali kaeʻoua ke fili ʻe he Sisa ʻo Lomá pe ko e hā ʻa e meʻa ʻe fai ki aí. Lolotonga ʻene nofo pōpulá, naʻe ʻatā pē ʻa e kakaí ke ʻaʻahi kiate ia.

ʻI he ʻosi ʻa e ʻaho ʻe tolu ʻo e aʻu ʻa Paula ki Lomá naʻá ne kole ki he kau taki Siu ʻe niʻihi ke nau haʻu ʻo feʻiloaki mo ia. Ko hono olá, naʻe tokolahi ʻa e kau Siu ʻi Loma naʻa nau haʻu. Naʻe malanga ʻa Paula kiate kinautolu ʻo kau kia Sīsū mo e puleʻanga ʻo e ʻOtuá. Naʻe tui ʻa e niʻihi ʻo hoko ko e kau Kalisitiane, ka naʻe ʻikai ke tui ʻa e niʻihi kehe.

Naʻe toe malanga foki ʻa Paula ki he kau sōtia kehekehe naʻa nau ngāue ko hono leʻohi iá. ʻI he taʻu ʻe ua naʻe tuku pōpula ai iá naʻe malanga ʻa Paula ki he tokotaha kotoa pē naʻe malava ke ne malanga ki ai. Ko hono olá, naʻa mo e fale ʻo Sisá naʻa nau fanongo ʻo kau ki he ongoongo lelei ʻo e Puleʻangá, pea ko e niʻihi ʻo kinautolu naʻa nau hoko ko e kau Kalisitiane.

Ka ko hai ʻa e tokotaha ʻaʻahi ko ʻeni ʻokú ne hiki ha meʻa ʻi he tēpilé? ʻE lava ke ke mateʻi mai? ʻIo, ko Tīmote ia. Naʻe ʻi he pilīsone foki mo Tīmote koeʻuhi ko ʻene malanga ʻo kau ki he Puleʻangá, ka naʻe toe tuku ange ia. Pea naʻá ne haʻu ki heni ke tokoni kia Paula. ʻOkú ke ʻilo pe ko e hā ʻoku hiki ʻe Tīmoté? Tau sio ange.

ʻOkú ke manatuʻi ʻa e ongo kolo ko Filipai mo ʻEfesō ʻi he Talanoa 110? Naʻe tokoni ʻa Paula ki hono kamata ʻa e ngaahi fakatahaʻanga Kalisitiane ʻi he ongo kolo ko iá. ʻI he lolotonga ko ʻeni ʻo ʻene nofo pōpulá, naʻe fai ʻe Paula ha ngaahi tohi ki he kau Kalisitiane ko ʻení. Ko e ngaahi tohí ni ʻoku ʻi he Tohitapú, pea ʻoku ui ko ʻEfesō mo Filipai. Naʻe tala ʻe Paula kia Tīmote ʻa e meʻa ke ne tohi ki hona ngaahi kaungāmeʻa Kalisitiane ʻi Filipaí.

Naʻe anga-ʻofa ʻaupito ʻa e kau Filipaí kia Paula. Naʻa nau ʻomai ha meʻaʻofa kiate ia ki he pilīsoné, pea naʻe fakamālō ʻa Paula kiate kinautolu ʻi he tohi ʻo fekauʻaki mo e meʻaʻofá. Ko e tangata ko ʻEpafalotaito naʻá ne ʻomai ʻa e meʻaʻofa. Ka naʻá ne hoko ʻo puke lahi ʻaupito ʻo meimei mate. Naʻá ne toe sai ʻo mateuteu ke foki ki ʻapi. Naʻá ne ʻave ʻa e tohi ko ʻeni meia Paula mo Tīmoté ʻi heʻene foki ki Filipaí.

Lolotonga ʻa e ʻi pilīsone ʻa Paulá naʻá ne toe hiki ai ha ongo tohi ʻe ua ʻoku tau maʻu ʻi he Tohitapú. Ko e taha ki he kau Kalisitiane ʻi he kolo ko Kolosé. ʻOkú ke ʻilo pe ʻoku ui ʻa e tohi ko iá ko e hā? Ko Kolose. Ko e tohi ʻe tahá ko ha tohi fakaeia pē ki ha kaungāmeʻa ofi ko Filimone naʻe nofo foki ʻi Kolose. Ko e tohí ni naʻe fekauʻaki mo e sevāniti ʻa Filimone ko ʻOnesema.

Naʻe hola ʻa ʻOnesema meia Filimone ʻo ʻalu ki Loma. Ne ʻilo ai ʻe ʻOnesema ʻoku nofo pilīsone ai ʻa Paula. Naʻá ne haʻu ʻo ʻaʻahi ki ai, pea naʻe malanga ai ʻa Paula kia ʻOnesema. Naʻe ʻikai ke fuoloa pea naʻe hoko leva ʻa ʻOnesema ko ha Kalisitiane. Naʻe fakatomala ʻa ʻOnesema ʻi heʻene holá. Ko ia ʻokú ke ʻilo pe ko e hā naʻe tohi ʻe Paula ʻi heʻene tohi kia Filimoné?

Naʻe kole ʻe Paula kia Filimone ke ne fakamolemoleʻi ʻa ʻOnesema. Naʻe tohi ʻe Paula: ‘ʻOku ou fakafoki atu ia kiate koe. Ka ʻi he taimí ni ʻoku ʻikai ko hoʻo sevāniti pē. Ko ha tokoua Kalisitiane lelei foki ia.’ ʻI he foki ʻa ʻOnesema ki Kolosé naʻá ne ʻave ai ʻa e ongo tohi ko iá, ko e taha ki he kau Kolosé pea mo e taha kia Filimone. ʻOku lava ke tau fakakaukau atu ki he fiefia ʻa Filimone ʻi heʻene ʻilo ko ʻene sevānití kuo hoko ko e Kalisitiane.

ʻI he tohi ʻa Paula ki he kau Filipaí mo ia kia Filimoné, naʻe ʻi ai ʻa e ongoongo lelei moʻoni. Naʻe fakahā ʻe Paula ki he kau Filipaí: ‘ʻOku ou fekau atu ʻa Tīmote kiate kimoutolu. Ka ʻe vavé ni haʻaku toe ʻaʻahi atu kiate kimoutolu.’ Pea naʻá ne tohi kia Filimone ʻo pehē: ‘Teuteu ha potu moʻoku ke u nofo ai.’

ʻI hono tuku ange ʻo Paulá naʻá ne ʻaʻahi ki hono ngaahi tokouá mo e ngaahi tuofāfine Kalisitiané ʻi he ngaahi feituʻu lahi. Ka ki mui mai naʻe toe tuku pōpula ʻa Paula ʻi Loma. ʻI he taimi ko ʻení naʻá ne ʻilo ʻe tāmateʻi ai ia. Ko ia naʻá ne tohi kia Tīmote ʻo kole ke ne haʻu vave. Naʻe tohi ʻe Paula: ‘Kuó u angatonu ki he ʻOtuá pea ʻe fakapaleʻi au ʻe he ʻOtuá.’ ʻI ha ngaahi taʻu siʻi mei hono tāmateʻi ʻa Paulá, naʻe toe fakaʻauha ʻa Selusalema ʻe he kau Lomá.

Ka ʻoku toe lahi pē ʻi he Tohitapú. Naʻe ngāueʻaki ʻe he ʻOtua ko Sihová ʻa e ʻapositolo ko Sioné ke tohi ʻa e ngaahi tohi fakaʻosi ʻi he Tohitapú, kau ki ai mo e tohi Fakahaá. Ko e tohi ko ʻeni ʻi he Tohitapu ʻokú ne tala ʻo fekauʻaki mo e kahaʻu. Tau ako ʻi he taimí ni ʻo kau ki he meʻa ʻe hoko ʻi he kahaʻú.