Ko e Fakatahaʻanga Kalisitiane he ʻUluaki Senitulí
ʻI he Penitekosi 33 T.S., naʻe huaʻi hifo ai ʻa e laumālie māʻoniʻoní ki he kau ākonga ʻe toko 120 ʻa Sīsū, pea naʻa nau kamata ke lea ʻi he ngaahi lea kehekehe fekauʻaki mo e ngaahi ngāue fakaofo ʻa e ʻOtuá. Ko hono fokotuʻu ʻeni ʻo e fakatahaʻanga Kalisitiané. Naʻe papitaiso ʻi he ʻaho ko iá ʻa e kau ākonga foʻou ʻe meimei toko 3,000.—Ngāue, vahe 2.
Naʻe tupu ʻo lahi ʻa e ngaahi fakatahaʻangá he feituʻu kehekehe ʻi he hanganaki lea loto-toʻa ʻa e kau ʻapositoló mo e niʻihi kehé ʻo fekauʻaki mo e Folofola ʻa e ʻOtuá. Hangē ko hono tohi ʻi he tohi ʻa Ngāué, naʻe vave ʻa e mafola atu ʻa e malangá ki he feituʻu Metitelenianí, mei Pāpilone mo ʻAfilika Tokelau ki Loma pea mo Sēpeni nai.—Loma 15:18-29; Kolose 1:23; 1 Pita 5:13.
ʻIlonga ha feituʻu naʻe hoko ai ha kakai ko e kau ākonga, naʻa nau fokotuʻu ʻa e ngaahi fakatahaʻanga. Naʻe fakanofo ʻa e kau tangata alafua mo matuʻotuʻá ko e kau mātuʻa, pe kau ʻovasia, ke nau tauhi ʻa e tuʻunga totonu ʻo e akonakí pea mo e ʻulungaangá ʻi he ngaahi fakatahaʻangá. Ka naʻe ʻikai te nau hoko ko ha kalasi ʻo e haʻa faifekau; ka ko e kau faifekau mo e kau kaungāngāue ki he Puleʻanga ʻo e ʻOtuá.—Ngāue 14:23; 20:28; 1 Kolinitō 3:5; 5:13; Kolose 4:11; 1 Timote 3:1-15; Hepelū 13:17; 1 Pita 5:1-4.
Ko e kau ʻapositoló mo e kau kaungāngāue ofí naʻa nau fai fatongia ko ha kulupu pule. Naʻa nau taki ʻi he ngāue fakamalangá. Naʻa nau fakaleleiʻi ʻa e ngaahi palopalema ʻi he fakatahaʻangá ʻi Selusalema. Naʻa nau fekau atu ha fanga tokoua alafua ki Samēlia mo ʻAniteoke ke fakalotolahiʻi ʻa e kau tui foʻou ʻi aí. Naʻa nau fakaleleiʻi ʻa e fakakikihi fekauʻaki mo e kamú, mo ʻoatu ʻenau ngaahi tuʻutuʻuni ke tauhi ki ai ʻa e ngaahi fakatahaʻangá kātoa. Ka neongo ia naʻe ʻikai ko ha kau pule ʻa e kau tangatá ni ki he niʻihi kehé ka ko e kau sevāniti mo e kau kaungāngāue ʻo e fakatahaʻangá fakakātoa.—Ngāue 4:33; 6:1-7; 8:14-25; 11:22-24; 15:1-32; 16:4, 5; 1 Kolinitō 3:5-9; 4:1, 2; 2 Kolinitō 1:24.
Ko e muʻaki kau ākongá naʻe ʻiloa ko ha kau Kalisitiane, naʻe ui pehē kinautolu ʻi he tataki fakaʻotua. Naʻa nau maʻu foki mo e ngaahi akonaki ʻa ia naʻá ne fakamakeheʻi kinautolu; naʻe ui ʻeni ko e faiako ʻa e kau ʻapositoló, pe ko e anga ʻo e ngaahi lea moʻui. Ko e akonaki faka-Tohitapú ni naʻe toe ʻiloa foki ia ko e moʻoni.—Sione 17:17; Ngāue 2:42; 11:26; Loma 6:17; 1 Tīmote 4:6; 6:1, 3; 2 Tīmote 1:13; 2 Pita 2:2; 2 Sione 1, 4, 9.
Naʻa nau hoko ko ha feohiʻanga ʻi māmani lahi ʻo e fanga tokoua fāʻūtaha ʻi he ʻofa. Naʻa nau fakahāhā ʻenau mahuʻingaʻia ʻi honau kaungātui ʻi he ngaahi fonua kehé. ʻI heʻenau fononga ki mulí, naʻe talitali lelei ai kinautolu ʻe honau kaungātuí ki honau ngaahi ʻapí. Naʻa nau maʻu ʻa e tuʻunga māʻolunga ʻo e ʻulungaanga totonú, ko e kakai tapu ʻoku mavahe mei he māmaní. Naʻa nau ʻai maʻu pē ʻi heʻenau fakakaukaú ʻa e taimi ʻe hoko mai ai ʻa e ʻaho ʻo Sihová pea nau faivelenga ʻi hono fakahāhā ʻenau tuí.—Sione 13:34, 35; 15:17-19; Ngāue 5:42; 11:28, 29; Loma 10:9, 10, 13-15; Taitusi 2:11-14; Hepelū 10:23; 13:15; 1 Pita 1:14-16; 2:9-12; 5:9; 2 Pita 3:11-14; 3 Sione 5-8.
Kaekehe, hangē ko ia naʻe kikiteʻí, naʻe kamata ke hoko ha mavahe lahi mei he tuí, ʻi he senituli hono uá mo hono tolú. Naʻe hoko mei he meʻá ni ʻa e ngaahi kautaha fakalotu lalahi ʻa ia naʻe ʻikai te nau tauhi ʻa e tuʻunga maʻa ʻa e muʻaki fakatahaʻanga Kalisitiané fekauʻaki mo e akonaki, ʻulungaanga, fokotuʻutuʻu maau mo honau tuʻunga ki he māmaní.—Mātiu 13:24-30, 37-43; 2 Tesalonaika, vahe 2.
Kaekehe, naʻe kikiteʻi ʻe Sīsū ʻe toe fakafoki mai ʻa e lotu moʻoní ʻi he fakaʻosiʻosi ʻo e tuʻu ko ʻení. ʻOku tui ʻa e Kau Fakamoʻoni ʻa Sihová ko e fakafoki ko ʻení ʻoku hā ia ʻi heʻenau ngāue ʻi māmani lahi ʻi hotau taimí, meimei ko e taʻu ia ʻe 1,900 mei he kikite ʻa Sīsū. Ko e ngaahi peesi ʻoku hoko maí ʻe fakamahinoʻi ai hono ʻuhingá.
• Naʻe fēfē hono fokotuʻu ʻa e fakatahaʻanga Kalisitiané, pea naʻe fēfē ʻene tupú?
• Naʻe fēfē hono tokangaʻi ʻo e fakatahaʻanga ko ʻení?
• Ko e hā ʻa e ngaahi meʻa naʻá ne fakamakeheʻi ʻa e kau Kalisitiane he ʻuluaki senitulí?
[Mape ʻi he peesi 7]
(Ki he konga tohi kuo fokotuʻu kakato, sio ki he tohi)
Tahi ʻUliʻuli
Tahi Kesipiane
Tahi Lahi
Tahi Kulokula
Komaki Pēsia
Ngaahi feituʻu naʻe aʻu ki ai ʻa e ongoongo leleí ʻi he ʻuluaki senitulí
ʻĪTALI
Loma
KALISI
MĒLITA
KĒLITI
SAIPALO
PITINIA
KALĒTIA
ʻĒSIA
KAPATŌSIA
SILISIA
SĪLIA
ʻISILELI
Selusalema
MESOPOTĒMIA
Pāpilone
Naʻe hoko ko e kau tui ʻa e niʻihi mei he ngaahi feituʻú ni
ʻILILIKUMI
MĪTIA
PĀTIA
ʻĪLAMI
ʻALEPEA
LĪPIA
ʻISIPITE
ʻITIOPEA
[Fakatātā ʻi he peesi 7]
Naʻe malangaʻi ʻe he muʻaki kau Kalisitiané ʻa e Folofola ʻa e ʻOtuá ʻi he loto-toʻa
ʻIlonga ha feituʻu naʻe fononga ki ai ʻa e kau Kalisitiané naʻe talitali lelei ʻe honau kaungātuí ki honau ʻapí