Ngaahi Fakatahaʻanga ke Langa Hake ʻi he ʻOfa mo e Fāʻūtaha

Mahalo pē kuo ke ʻosi maʻu ha fakataha ʻa e fakatahaʻanga ʻa e Kau Fakamoʻoni ʻa Sihová ʻoku ofi ki he feituʻu ʻokú ke nofo aí. Ko e kakai mei he ngaahi tapa kehekehe ʻo e moʻui​—ngaahi fāmili, kakai teʻeki mali, motuʻa mo talavou​—naʻa nau ʻi ai. Naʻa nau fāʻūtaha ʻi heʻenau lotú pea loto ke tokoni ki he kakai kehé.

ʻI ha taimi pē ʻoku fiemaʻu ai ha kakai tokolahi ke nau ngāue fāʻūtaha, ʻoku fiemaʻu ke pule ha taha ki ai. Ko e ʻOtuá ko ha ʻOtua maau; ko ia ai, ʻoku totonu ke hā mai ʻa e maau ko iá ʻi he fakatahaʻanga ʻa ʻene kakaí. Hangē pē ko ia ʻi he ʻuluaki senitulí, ʻoku pehē pē mo e ʻahó ni, ko e kau tangata Kalisitiane alafuá, matuʻotuʻá, mo taukeí ʻoku fakanofo ko e kau mātuʻa, pe kau ʻovasia. ʻOku tokangaʻi ʻe he faʻahinga ko ʻení ʻa e fakatahaʻangá mo tauhi ʻene ngaahi fiemaʻu fakalaumālié. ʻOku tokoniʻi kinautolu ʻe he kau tangata loto-tōnunga kehe ʻoku ui ko e kau sevāniti. ʻOku ʻikai maʻu vāhenga pe ko ha toe tokoni fakapaʻanga kehe ʻa e kau tangatá ni ka ʻoku nau ngāue taʻetotongi pē, ʻoku totongi ʻenau ngaahi fakamolé ʻanautolu ʻaki ʻenau ngāue fakamāmani.​—1 Kolinitō 14:33, 40; Filipai 1:1; 1 Tīmote 3:​8, 9.

ʻOku fēfē hono fili kinautolú? Ko ha meʻa ʻikai ala tuku ke nau hoko ko e kau sevāniti loto-tōnunga ʻa e ʻOtuá pea ʻasi ʻiate kinautolu ʻa e ngaahi anga faka-Tohitapu makehe. Ko e niʻihi ʻeni ʻo e meʻá ni: ‘anga-fakanānā, anga-fakamaʻumaʻu, ʻoku maau ʻene tōʻongá, ʻoku faʻa fakaafe ʻaunofo, ʻoku poto ʻi he faiakó, ʻoku anga-kātaki; ʻoku ʻikai ʻofa ki he paʻangá; ko e tokotaha ʻokú ne pule lelei ki hono fale ʻoʻoná; ko e tokotaha ʻoku ʻikai ko e toki liliu; ke ne ongoongo lelei mei he kakai ʻo tuaʻā’; ‘ʻokú ne puke ʻa e lea moʻoni, ʻo hangē ko hono akonekina.’—1 Tīmote 3:​1-15; Taitusi 1:​7-9.

Ko e kau tangata ko ʻení ʻoku ʻikai fili ia ʻe he fakatahaʻangá, ʻa ia ko e tokolahi taha ai ko e kau Kalisitiane foʻofoʻou nai. Ka, ʻoku fakaongoongoleleiʻi kinautolu ʻe he kau tangata matuʻotuʻa mo taukei ʻa ia ko e kau mātuʻá. ʻA ia ʻoku nau ʻilo lelei ʻa hono lahi ʻoku fakahā ai ʻe he faʻahingá ni ʻa e ngaahi tuʻunga faka-Tohitapú. Pea ko e fakanofo ʻo e kau mātuʻá mo e kau sevānití ʻoku fai ʻi he tataki ʻa e Kulupu Pule ʻo e Kau Fakamoʻoni ʻa Sihová, ko e muimui ʻeni ki he sīpinga naʻe fokotuʻu ʻe he fakatahaʻanga Kalisitiane ʻi he ʻuluaki senitulí.

ʻOku ʻikai ko ha kalasi haʻa faifekau ʻa e kau mātuʻá, pe kau ʻovasiá ni; ʻoku ʻikai ko ha kau pule kinautolu ki ha niʻihi kehe. Hangē ko e lea ʻa Sīsū, ko kinautolu ʻoku takimuʻá kuo pau ke nau hoko ko e tamaioʻeiki maʻá e kakai kotoa pē. ʻI he fakatahaʻanga ʻa e Kau Fakamoʻoni ʻa Sihová, ʻoku moʻoni ko e kau mātuʻá ko e kau kaungāngāue ki he Puleʻanga ʻo e ʻOtuá.​—Mātiu 20:​26, 27; 23:​8-11; Loma 12:8; 1 Kolinitō 3:5; 4:​1, 2; Kolose 4:11; 1 Tesalonaika 5:​12-14.

ʻI honau tuʻunga ko e kau ʻovasiá, ʻoku nau tokanga ki hono tokonaki mai ʻa e fakahinohino ʻi he ngaahi fakatahá pea ʻoku nau takimuʻa ʻi he ngāue fakamalangá. Ko ha meʻa muʻomuʻa ki he ­fakatahaʻangá ʻa hono malangaʻi ʻo e ongo­ongo lelei ʻo e Puleʻangá ʻi hono vāhenga-ngāué. ʻOku toe ngāue ʻa e kau ʻovasiá ko e kau tauhi-sipi, ʻo nau ʻaʻahi ki he kau mēmipa ʻo e fakatahaʻangá ke fakalotolahiʻi kinautolu ʻo ka fiemaʻu.​—Mātiu 24:14; Ngāue 1:8; 1 Tesalonaika 2:​11, 12; 5:​14, 15; 2 Tīmote 2:​24-26; Hepelū 13:17; Sēmisi 5:​13-16; 1 Pita 5:​1-4.

ʻOku toe maʻu ʻe he kau mātuʻá ʻa e fatongia ke valokiʻi mo fai ha akonaki ki ha taha ʻoku laka hala ʻa ia ʻe ngali fakatuʻutāmaki nai ki he maʻa fakalaumālie mo e ʻulungaanga pea mo e fāʻūtaha ʻa e fakatahaʻangá.​—1 Kolinitō 5:​4, 5, 7, 11-13; Taitusi 1:9; 2:15; 3:​10, 11.

ʻI hoʻo kau maʻu pē mo e fakatahaʻangá te ke maʻu ai ha feohi lelei pea mo ha ngaahi ʻaonga fakalaumālie lahi.​—Sāme 35:18; 84:10.

• Ko hai ʻoku tokanga ki he ngaahi meʻa ʻa e fakatahaʻanga taki taha?

• ʻOku makatuʻunga ʻi he hā ʻa hono fili ʻo ha kau ʻovasia?

• Ko e hā honau ngaahi fatongiá?

[Fakatātā ʻi he peesi 13]

Ko e kau ʻovasiá ʻoku nau akonaki ki he fakatahaʻangá, takimuʻa ʻi he malanga fale ki he falé, fakalototoʻa ʻaki ʻa e ngaahi ʻaʻahi fakatauhisipi, fai ha akonaki mo e valoki ʻo ka fiemaʻu